ന്യൂഡൽഹി: ജപ്പാനീസ് ഇലക്ട്രോണിക്സ് ഭീമനായ പാനസോണിക്, ഇന്ത്യൻ വിപണിയിൽ നിന്ന് വാഷിംഗ് മെഷീൻ, റഫ്രിജറേറ്റർ വിഭാഗങ്ങൾ പൂർണ്ണമായി പിൻവലിക്കുന്നു. ആഗോളതലത്തിൽ കമ്പനി നടത്തുന്ന ഘടനാപരമായ മാറ്റങ്ങളുടെയും, ഇന്ത്യൻ വിപണിയിലെ കടുത്ത മത്സരത്തിൽ പിടിച്ചുനിൽക്കാനാകാതെ നഷ്ടം പെരുകിയതിന്റെയും ഭാഗമായാണ് ഈ നിർണായക തീരുമാനം.
കഴിഞ്ഞ ആറ് വർഷമായി ഈ രണ്ട് വിഭാഗങ്ങളിലും വിൽപ്പനയിലും ലാഭത്തിലും പാനസോണിക് വലിയ നഷ്ടം നേരിടുകയായിരുന്നു. എൽജി, സാംസങ് പോലുള്ള കൊറിയൻ ബ്രാൻഡുകളിൽ നിന്നും, ഹെയർ പോലുള്ള ചൈനീസ് ബ്രാൻഡുകളിൽ നിന്നുമുള്ള കടുത്ത മത്സരമാണ് പാനസോണിക്കിന് തിരിച്ചടിയായത്. ഇന്ത്യൻ വിപണിയിൽ വാഷിംഗ് മെഷീൻ രംഗത്ത് 1.8 ശതമാനവും, റഫ്രിജറേറ്റർ രംഗത്ത് 0.8 ശതമാനവും മാത്രമായിരുന്നു പാനസോണിക്കിന്റെ വിഹിതം.
പുതിയ ലക്ഷ്യങ്ങൾ
ഇനി മുതൽ റെസിഡൻഷ്യൽ, കൊമേഴ്സ്യൽ എയർ കണ്ടീഷണറുകൾ (എസി), എൽഇഡി ടിവികൾ, മൈക്രോവേവ്, ഇലക്ട്രിക്കൽ ഉൽപ്പന്നങ്ങൾ, ഹോം ഓട്ടോമേഷൻ, എനർജി സൊല്യൂഷൻസ് തുടങ്ങിയ ബിസിനസ്സുകളിൽ കൂടുതൽ ശ്രദ്ധ കേന്ദ്രീകരിക്കാനാണ് കമ്പനിയുടെ തീരുമാനം.
“ആഗോള തന്ത്രങ്ങൾക്കും മാറുന്ന വിപണി സാഹചര്യങ്ങൾക്കും അനുസൃതമായി, ഇന്ത്യയിലെ ഞങ്ങളുടെ പ്രവർത്തനങ്ങൾ പുനഃക്രമീകരിക്കുകയാണ്. ഭാവിയിൽ വളർച്ചാ സാധ്യതയുള്ള മേഖലകളിൽ ശ്രദ്ധ കേന്ദ്രീകരിക്കും,” എന്ന് പാനസോണിക് ഇന്ത്യയുടെ വക്താവ് അറിയിച്ചു.
ഉപഭോക്താക്കളെയും ജീവനക്കാരെയും ബാധിക്കുമോ?
- ഉപഭോക്താക്കൾ: നിലവിൽ പാനസോണിക് വാഷിംഗ് മെഷീനുകളും ഫ്രിഡ്ജുകളും ഉപയോഗിക്കുന്നവർക്ക് വാറന്റിയും മറ്റ് സേവനങ്ങളും തുടർന്നും ലഭിക്കുമെന്ന് കമ്പനി ഉറപ്പുനൽകിയിട്ടുണ്ട്. സ്പെയർ പാർട്സുകളുടെ ലഭ്യതയും ഉറപ്പാക്കും.
- ഡീലർമാർ: നിലവിലുള്ള സ്റ്റോക്കുകൾ വിറ്റഴിക്കാൻ ഡീലർമാർക്ക് പൂർണ്ണ പിന്തുണ നൽകും.
- ജീവനക്കാർ: ഈ തീരുമാനം കമ്പനിയിലെ ചില ജീവനക്കാരെ ബാധിക്കുമെന്നും, ഒഴിവാക്കാനാകാത്ത ഈ നടപടിയിൽ ഖേദമുണ്ടെന്നും കമ്പനി അറിയിച്ചു. പിരിച്ചുവിടുന്ന ജീവനക്കാർക്ക് ആവശ്യമായ എല്ലാ സഹായവും നൽകുമെന്നും അവർ വ്യക്തമാക്കി.
ഹരിയാനയിലെ ഝജ്ജർ പ്ലാന്റിലെ വാഷിംഗ് മെഷീൻ, റഫ്രിജറേറ്റർ ഉത്പാദന ലൈനുകൾ പാനസോണിക് നിർത്തലാക്കും.
