സ്‌കൂൾ കുട്ടികളിൽ ലഹരി ഉപയോഗം കൂടുന്നത് വി. ശിവൻകുട്ടിയുടെ ശ്രദ്ധയിൽപ്പെട്ടിട്ടില്ല

സംസ്ഥാനത്ത് സ്‌കൂൾ വിദ്യാർത്ഥികളിൽ ലഹരി ഉപയോഗം കൂടിവരുന്ന സാഹചര്യത്തെക്കുറിച്ച് ശ്രദ്ധയിൽപ്പെട്ടിട്ടില്ലെന്ന് പൊതുവിദ്യാഭ്യാസ മന്ത്രി വി. ശിവൻകുട്ടി. ഇതുസംബന്ധിച്ച നിയമസഭ ചോദ്യത്തിന് മറുപടിയായാണ് വിദ്യാഭ്യാസ മന്ത്രി ശ്രദ്ധയിൽപ്പെട്ടിട്ടില്ലെന്ന് വ്യക്തമാക്കിയിരിക്കുന്നത്. തിരുവഞ്ചൂർ രാധാകൃഷ്ണൻ, പി.സി. വിഷ്ണുനാഥ്, കെ.കെ. രമ, സജീവ് ജോസഫ് എന്നിവർക്കാണ് ശിവൻകുട്ടിയുടെ മറുപടി.

വിദ്യാർത്ഥികൾക്കിടയിൽ ലഹരി ഉപയോഗം വർദ്ധിക്കുന്ന സാഹചര്യമില്ലെന്ന് എം.ബി. രാജേഷ്.

സ്ക്കൂൾ കുട്ടികൾക്കിടയിൽ ലഹരി ഉപയോഗവും അതിനെ തുടർന്നുള്ള അതിക്രമങ്ങളും സംബന്ധിച്ച നിരവധി വാർത്തകൾ സംസ്ഥാനത്ത് റിപ്പോർട്ട് ചെയ്യപ്പെടുമ്പോഴാണ് മന്ത്രി എം.ബി രാജേഷിൻ്റെ വ്യത്യസ്ത മറുപടി.

സ്ക്കൂൾ കുട്ടികൾക്ക് ഇടയിൽ ലഹരി ഉപയോഗം വർദ്ധിക്കുന്ന സാഹചര്യം നിലവിൽ ഉണ്ടോ എന്ന ഒ.എസ്. അംബിക എം എൽ എ യുടെ നിയമസഭ ചോദ്യത്തിനാണ് എം.ബി രാജേഷിൻ്റ മറുപടി. ജനുവരി 23 നാണ് എം.ബി രാജേഷ് നിയമസഭയിൽ മറുപടി നൽകിയിരിക്കുന്നത്.

ലഹരി ഉൽപന്നങ്ങളിൽ നിന്നും കുട്ടികൾക്ക് സുരക്ഷയും സംരക്ഷണവും ഉറപ്പ് വരുത്തുന്നതിനായി വിദ്യാഭ്യാസ സ്ഥാപനങ്ങളും പരിസര പ്രദേശങ്ങളും കേന്ദ്രികരിച്ച് ശക്തമായ എൻഫോഴ്സ് മെൻ്റ് പ്രവർത്തനങ്ങൾ നടത്തുന്നുണ്ടെന്നും എം.ബി രാജേഷ് പറഞ്ഞു.