പച്ചക്കറി വിൽപ്പനക്കാരന് 29 ലക്ഷത്തിന്റെ GST നോട്ടീസ്, UPI ഇടപാട് 1.63 കോടി

ഹാവേരി (കർണാടക): ഡിജിറ്റൽ പണമിടപാടുകൾ നടത്തിയ ചെറുകിട പച്ചക്കറി വിൽപ്പനക്കാരന് 29 ലക്ഷം രൂപയുടെ ജിഎസ്ടി നോട്ടീസ്. കർണാടകയിലെ ഹാവേരി സ്വദേശിയായ ശങ്കർഗൗഡ ഹഡിമണിക്കാണ് ജിഎസ്ടി വകുപ്പിൽ നിന്ന് ഭീമമായ തുകയുടെ നോട്ടീസ് ലഭിച്ചത്. നാല് വർഷം കൊണ്ട് 1.63 കോടി രൂപയുടെ യുപിഐ ഇടപാടുകൾ നടത്തിയെന്ന് ചൂണ്ടിക്കാട്ടിയാണ് നടപടി. ഇതോടെ, ശങ്കർഗൗഡയെപ്പോലുള്ള നിരവധി ചെറുകിട വ്യാപാരികൾ യുപിഐ ഇടപാടുകൾ നിർത്തി, പണം നേരിട്ട് സ്വീകരിക്കാൻ തുടങ്ങി.

ജിഎസ്ടി ഇല്ലാത്ത പച്ചക്കറിക്ക് 29 ലക്ഷം നികുതി

കഴിഞ്ഞ നാല് വർഷമായി മുനിസിപ്പൽ ഹൈസ്കൂൾ ഗ്രൗണ്ടിന് സമീപം ഒരു ചെറിയ കട നടത്തിവരികയാണ് ശങ്കർഗൗഡ. കർഷകരിൽ നിന്ന് നേരിട്ട് പച്ചക്കറി വാങ്ങി, സംസ്കരിക്കാതെ വിൽക്കുന്നതിനാൽ, ജിഎസ്ടി നിയമപ്രകാരം തനിക്ക് നികുതി ബാധ്യതയില്ലെന്ന് അദ്ദേഹം പറയുന്നു. “ഇപ്പോൾ അധികം ആരും കയ്യിൽ പണം കൊണ്ടുനടക്കാത്തതുകൊണ്ടാണ് ഉപഭോക്താക്കൾ യുപിഐ വഴി പണം നൽകുന്നത്. ഞാൻ എല്ലാ വർഷവും ആദായനികുതി റിട്ടേൺ ഫയൽ ചെയ്യാറുണ്ട്. 29 ലക്ഷം രൂപ എങ്ങനെ അടയ്ക്കുമെന്നറിയില്ല,” എന്ന് ശങ്കർഗൗഡ ആശങ്കയോടെ പറയുന്നു.

ഡിജിറ്റൽ ഇടപാടുകൾ നിരീക്ഷണത്തിൽ

ഡിജിറ്റൽ പണമിടപാടുകൾ നടത്തുന്ന വ്യാപാരികളെ കർശനമായി നിരീക്ഷിച്ചുവരികയാണെന്ന് കർണാടക ജിഎസ്ടി വകുപ്പ് അടുത്തിടെ അറിയിച്ചിരുന്നു. ജിഎസ്ടി രജിസ്‌ട്രേഷന് ആവശ്യമായ പരിധി കടക്കുന്ന വ്യാപാരികൾ നികുതി അടച്ചില്ലെങ്കിൽ നോട്ടീസ് നൽകുമെന്നായിരുന്നു മുന്നറിയിപ്പ്. ഇതിന് പിന്നാലെയാണ് ശങ്കർഗൗഡയെപ്പോലുള്ളവർക്ക് നോട്ടീസ് ലഭിച്ചത്.

യുപിഐ ഒഴിവാക്കി പണം മാത്രം സ്വീകരിക്കുന്നതിലൂടെ നികുതി വെട്ടിക്കാമെന്ന് കരുതേണ്ടെന്ന് ജിഎസ്ടി വകുപ്പ് വ്യാപാരികൾക്ക് മുന്നറിയിപ്പ് നൽകി. “നികുതി ബാധകമാകുന്നത് ആകെ വിറ്റുവരവിനാണ്, അത് യുപിഐ വഴിയായാലും പണമായാലും. യഥാർത്ഥ വരുമാനം മറച്ചുവെക്കാൻ ശ്രമിക്കുന്നവർക്കെതിരെ കർശന നടപടിയെടുക്കും,” എന്ന് അധികൃതർ വ്യക്തമാക്കി.

ജിഎസ്ടി വകുപ്പിന്റെ പുതിയ നീക്കം ചെറുകിട വ്യാപാരികൾക്കിടയിൽ വലിയ ആശങ്കയും ആശയക്കുഴപ്പവുമാണ് സൃഷ്ടിച്ചിരിക്കുന്നത്.