സൗദിയിൽ ടെസ്‌ലയ്ക്ക് പിന്നാലെ ചൈനീസ് ഭീമൻ ബിവൈഡിയും; ഇലക്ട്രിക് വാഹന വിപണിയിൽ പോരാട്ടം മുറുകുന്നു
റിയാദ്: സൗദി അറേബ്യയിലെ ഇലക്ട്രിക് വാഹന വിപണി പിടിക്കാൻ അമേരിക്കൻ കമ്പനിയായ ടെസ്‌ലയ്ക്ക് പിന്നാലെ ചൈനീസ് ഭീമനായ ബിവൈഡിയും (BYD). ടെസ്‌ല രാജ്യത്ത് ആദ്യ ഷോറൂം തുറന്ന് മാസങ്ങൾക്കുള്ളിലാണ്, തങ്ങളുടെ സാന്നിധ്യം ശക്തമാക്കാനുള്ള ബൃഹത്തായ പദ്ധതികളുമായി ബിവൈഡിയും രംഗത്തെത്തിയിരിക്കുന്നത്. ഇതോടെ, ഗൾഫിലെ ഏറ്റവും വലിയ വാഹന വിപണികളിലൊന്നായ സൗദിയിൽ ഇലക്ട്രിക് വാഹന ഭീമന്മാർ തമ്മിലുള്ള മത്സരം കനക്കുകയാണ്.
2024 മെയ് മാസത്തിൽ ആദ്യ സൗദി ഷോറൂം തുറന്ന ബിവൈഡി, നിലവിൽ മൂന്ന് ഷോറൂമുകളാണ് പ്രവർത്തിപ്പിക്കുന്നത്. ഇത് 2026-ന്റെ രണ്ടാം പകുതിയോടെ പത്ത് ഷോറൂമുകളായി ഉയർത്താനാണ് പദ്ധതിയെന്ന് കമ്പനിയുടെ സൗദി അറേബ്യയിലെ മാനേജിംഗ് ഡയറക്ടർ ജെറോം സൈഗോട്ട് ബ്ലൂംബർഗിന് നൽകിയ അഭിമുഖത്തിൽ പറഞ്ഞു.
“സൗദി സങ്കീർണ്ണമായ ഒരു വിപണിയാണ്. ഇവിടെ വേഗത്തിൽ ചിന്തിക്കുകയും വലുതായി പ്രവർത്തിക്കുകയും വേണം. വർഷത്തിൽ അയ്യായിരമോ പതിനായിരമോ കാറുകൾ വിൽക്കാൻ മാത്രമല്ല ഞങ്ങൾ ഇവിടെ വന്നിരിക്കുന്നത്,” എന്ന് സൈഗോട്ട് പറഞ്ഞു. “ടെസ്‌ല വിപണനത്തിനായി കൂടുതൽ പണം ചെലവഴിക്കുന്നത് ഞങ്ങൾക്ക് കൂടുതൽ നല്ലതാണ്,” എന്നും അദ്ദേഹം കൂട്ടിച്ചേർത്തു.
ഹാൻ ഇവി, ആറ്റോ 3, സീൽ ഇവി തുടങ്ങിയ മോഡലുകളുമായി 2024 ഫെബ്രുവരിയിലാണ് ബിവൈഡി സൗദി വിപണിയിൽ ഔദ്യോഗികമായി പ്രവേശിച്ചത്. ഈ വർഷം 5,000-ത്തിൽ അധികം വാഹനങ്ങൾ വിൽക്കാനാണ് കമ്പനി ലക്ഷ്യമിടുന്നത്.
ഓഹരി വിപണിയിൽ ബിവൈഡിക്ക് കുതിപ്പ്
അതേസമയം, ഓഹരി വിപണിയിൽ ടെസ്‌ലയെ ബഹുദൂരം പിന്നിലാക്കിയാണ് ബിവൈഡിയുടെ കുതിപ്പ്. ഈ വർഷം ഇതുവരെ, ബിവൈഡിയുടെ യുഎസ്-ലിസ്റ്റ് ചെയ്ത ഓഹരികൾക്ക് 36 ശതമാനത്തിലധികം വളർച്ചയുണ്ടായപ്പോൾ, ടെസ്‌ലയുടെ ഓഹരികൾക്ക് 22 ശതമാനം ഇടിവാണ് രേഖപ്പെടുത്തിയത്.
സൗദിയിലെ ഇവി വിപണി
സൗദി അറേബ്യയിൽ ഇലക്ട്രിക് വാഹന വിപണി ഇപ്പോഴും ശൈശവാവസ്ഥയിലാണ്. 2024-ൽ ആകെ കാർ വിൽപ്പനയുടെ 1% മാത്രമായിരുന്നു ഇവികൾ. എന്നാൽ, തദ്ദേശീയമായി ഇവി നിർമ്മാണ ശേഷി വർധിപ്പിക്കാൻ രാജ്യം അതിവേഗം നീങ്ങുകയാണ്. കാലിഫോർണിയ ആസ്ഥാനമായുള്ള ലൂസിഡ് മോട്ടോഴ്‌സിൽ സൗദിക്ക് ഭൂരിഭാഗം ഓഹരി പങ്കാളിത്തമുണ്ട്.
ഏപ്രിലിൽ റിയാദിൽ ആദ്യ ഷോറൂം തുറന്ന ടെസ്‌ല, രാജ്യത്ത് റോബോടാക്സികൾ പുറത്തിറക്കുന്നതിലും താൽപര്യം പ്രകടിപ്പിച്ചിട്ടുണ്ട്.
