കോഴിക്കോട്: ഒന്നര വർഷം മുൻപ് കോഴിക്കോട്ടുനിന്ന് കാണാതായ വയനാട് സ്വദേശിയുടെ തിരോധാനക്കേസിലെ ദുരൂഹത നീങ്ങി. സുൽത്താൻ ബത്തേരി സ്വദേശി ഹേമചന്ദ്രനെ (48) കൊലപ്പെടുത്തി തമിഴ്‌നാട്ടിലെ നീലഗിരി വനത്തിൽ കുഴിച്ചുമൂടിയതാണെന്ന് പോലീസ് കണ്ടെത്തി. സാമ്പത്തിക ഇടപാടുകളെച്ചൊല്ലിയുള്ള തർക്കമാണ് കൊലപാതകത്തിൽ കലാശിച്ചത്. സംഭവവുമായി ബന്ധപ്പെട്ട് മൂന്നുപേർ പോലീസ് കസ്റ്റഡിയിലുണ്ട്.
2024 മാർച്ച് 20-നാണ് ഹേമചന്ദ്രനെ കാണാതാകുന്നത്. ഈ സമയം, കോഴിക്കോട് മെഡിക്കൽ കോളേജ് പോലീസ് സ്റ്റേഷൻ പരിധിയിൽ വാടകയ്ക്ക് താമസിക്കുകയായിരുന്നു അദ്ദേഹം. ഭർത്താവിനെ കാണാനില്ലെന്ന് കാണിച്ച് ഭാര്യ നൽകിയ പരാതിയിലാണ് പോലീസ് അന്വേഷണം ആരംഭിച്ചത്.
കൊലപാതകത്തിന്റെ ചുരുളഴിഞ്ഞതിങ്ങനെ
ചെറിയ ചിട്ടി നടത്തിപ്പുകാരനായിരുന്ന ഹേമചന്ദ്രന് പലർക്കുമായി 20 ലക്ഷത്തോളം രൂപ നൽകാനുണ്ടായിരുന്നു. ഈ പണം തിരികെ ആവശ്യപ്പെട്ട് പ്രതികൾ ഹേമചന്ദ്രനെ കോഴിക്കോട്ടുനിന്ന് ബലമായി തട്ടിക്കൊണ്ടുപോയി വയനാട്ടിലെ ഒരു ഒളിത്താവളത്തിൽ പാർപ്പിച്ചു. പണം നൽകാൻ തയ്യാറാകാതിരുന്നതോടെ, ഇവർ ഹേമചന്ദ്രനെ ക്രൂരമായി മർദ്ദിക്കുകയും മുറിയിൽ പൂട്ടിയിടുകയും ചെയ്തു. അടുത്ത ദിവസം തിരിച്ചെത്തിയപ്പോൾ ഹേമചന്ദ്രൻ മരിച്ചുകിടക്കുന്നതാണ് കണ്ടത്. തുടർന്നാണ് മൃതദേഹം തമിഴ്‌നാട് അതിർത്തിയിലെ ചേരമ്പാടി വനത്തിനുള്ളിൽ കൊണ്ടുപോയി കുഴിച്ചുമൂടിയത്.
പ്രതികളെ കുടുക്കിയ ഫോൺ കോൾ
കൊലപാതകത്തിന് ശേഷം, പ്രതികളിലൊരാൾ ഹേമചന്ദ്രന്റെ സിം കാർഡ് ഉപയോഗിച്ച് അദ്ദേഹത്തിന്റെ മകളെ വിളിച്ച്, അച്ഛൻ മൈസൂരിൽ സുഖമായിരിക്കുന്നു എന്ന് പറഞ്ഞ് തെറ്റിദ്ധരിപ്പിച്ചു. ഈ വിവരം മകൾ പോലീസിനെ അറിയിച്ചതോടെ, അന്വേഷണം വഴിതെറ്റിയെന്ന് പോലീസ് കരുതി. എന്നാൽ, ഈ ഫോൺ കോളിന്റെ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണമാണ് പ്രതികളിലേക്ക് എത്താൻ പോലീസിനെ സഹായിച്ചത്.
വയനാട് സ്വദേശികളായ ജ്യോതിഷ് കുമാർ, ബി.എസ്. അജേഷ് എന്നിവരെ പോലീസ് പിടികൂടി. ചോദ്യം ചെയ്യലിൽ ഇവർ കുറ്റം സമ്മതിച്ചു. പ്രതികളെ സംഭവസ്ഥലത്തെത്തിച്ച് കേരള-തമിഴ്‌നാട് പോലീസ് സംയുക്തമായി നടത്തിയ തിരച്ചിലിലാണ് മൃതദേഹത്തിന്റെ അവശിഷ്ടങ്ങൾ കണ്ടെത്തിയത്.
