ചേർത്തല: മൂന്ന് സ്ത്രീകളെ കൊലപ്പെടുത്തി കുഴിച്ചുമൂടിയെന്ന് സംശയിക്കുന്ന പള്ളിപ്പുറം സ്വദേശി സെബാസ്റ്റ്യന്റെ ക്രിമിനൽ പശ്ചാത്തലത്തെക്കുറിച്ച് പുറത്തുവരുന്നത് ഞെട്ടിക്കുന്ന വിവരങ്ങൾ. 17-ാം വയസ്സിൽ കുടുംബസ്വത്തിനെച്ചൊല്ലിയുള്ള തർക്കത്തിൽ സ്വന്തം ബന്ധുക്കളെ ഭക്ഷണത്തിൽ വിഷം കലർത്തി കൊലപ്പെടുത്താൻ ശ്രമിച്ചയാളാണ് സെബാസ്റ്റ്യനെന്ന് അന്വേഷണ സംഘത്തിന് വിവരം ലഭിച്ചു.
കടക്കരപ്പള്ളി സ്വദേശി ബിന്ദു പത്മനാഭൻ (52), വാരനാട് സ്വദേശിനി ഐഷ (57), ഏറ്റുമാനൂർ സ്വദേശിനി ജെയ്നമ്മ (54) എന്നിവരുടെ തിരോധാനവുമായി ബന്ധപ്പെട്ടാണ് സെബാസ്റ്റ്യൻ അറസ്റ്റിലായത്. സ്വർണത്തിനും സ്വത്തിനും വേണ്ടിയാണ് ഇയാൾ സ്ത്രീകളുമായി അടുപ്പം സ്ഥാപിച്ച് കൊലപാതകങ്ങൾ നടത്തിയതെന്നാണ് പോലീസിന്റെ നിഗമനം.
കുറ്റകൃത്യങ്ങളുടെ തുടക്കം
വർഷങ്ങൾക്ക് മുൻപ് കുടുംബ ഓഹരി വീതം വെച്ചതുമായി ബന്ധപ്പെട്ട തർക്കത്തെത്തുടർന്നാണ് സെബാസ്റ്റ്യൻ പിതൃസഹോദരന്റെ വീട്ടിലെത്തി ഭക്ഷണത്തിൽ വിഷം കലർത്തിയത്. അന്ന് ഭക്ഷണം കഴിച്ച മൂന്നുപേർ ഗുരുതരാവസ്ഥയിൽ ആശുപത്രിയിലായെങ്കിലും സംഭവം പോലീസിൽ അറിയിച്ചിരുന്നില്ല. എന്നാൽ, ഈ വിവരം സെബാസ്റ്റ്യന്റെ ഒരു ബന്ധു അടുത്തിടെ പോലീസിന് മൊഴിയായി നൽകുകയായിരുന്നു.
റിയൽ എസ്റ്റേറ്റ് ബ്രോക്കറായ ക്രിമിനൽ
പത്താം ക്ലാസ് വിദ്യാഭ്യാസത്തിനുശേഷം ബസ് ക്ലീനറായും ടാക്സി ഡ്രൈവറായും ജോലി ചെയ്ത സെബാസ്റ്റ്യൻ പിന്നീട് റിയൽ എസ്റ്റേറ്റ് രംഗത്തേക്ക് തിരിയുകയായിരുന്നു. വസ്തു ഇടപാടുകളിലൂടെയാണ് കാണാതായ ബിന്ദു പത്മനാഭനെയും ഐഷയെയും പരിചയപ്പെട്ടത്. 50-ാം വയസ്സിൽ വിവാഹം കഴിച്ച ഇയാൾ പിന്നീട് ഭാര്യവീടായ ഏറ്റുമാനൂരിലായിരുന്നു താമസം.
തെളിവുകൾ തേടി പോലീസ്
സെബാസ്റ്റ്യന്റെ പള്ളിപ്പുറത്തെ വീട്ടുവളപ്പിൽ ക്രൈംബ്രാഞ്ച് നടത്തിയ പരിശോധനയിൽ കത്തിക്കരിഞ്ഞ വാച്ചിന്റെ ഡയലും രണ്ട് ചെരുപ്പുകളും കണ്ടെത്തിയിട്ടുണ്ട്. ഇയാളുടെ സുഹൃത്തായ റോസമ്മയുടെ ഉടമസ്ഥതയിലുള്ള കോഴിഫാമിലും പോലീസ് പരിശോധന നടത്തി. മൃതദേഹങ്ങൾ കണ്ടെത്താനായി ഗ്രൗണ്ട് പെനിട്രേറ്റിങ് റഡാർ (ജിപിആർ) ഉപയോഗിച്ചുള്ള പരിശോധന തുടരുകയാണ്.
