ന്യൂഡൽഹി: വൻകിട കോർപ്പറേറ്റ് സ്ഥാപനങ്ങൾക്ക് ബാങ്കുകളുടെ നിയന്ത്രണം നൽകുന്നതിൽ വെല്ലുവിളികളും ആശങ്കകളും ചർച്ചയാക്കി കേന്ദ്ര സർക്കാർ. കോർപ്പറേറ്റുകൾക്ക് ബാങ്കിംഗ് ലൈസൻസ് അനുവദിക്കുന്നത് ‘സ്വയം വായ്പ’ (self-lending) പോലുള്ള അപകടസാധ്യതകൾ വർദ്ധിപ്പിക്കുമെന്നും ഇത് രാജ്യത്തിന്റെ സാമ്പത്തിക സ്ഥിരതയെ ബാധിക്കുമെന്നും ഒരു മുതിർന്ന സർക്കാർ ഉദ്യോഗസ്ഥൻ വ്യക്തമാക്കി. ബാങ്ക് ദേശസാൽക്കരണത്തിലേക്ക് നയിച്ച ചരിത്രപരമായ പ്രശ്നങ്ങൾ വീണ്ടും തലപൊക്കാൻ ഇത് കാരണമായേക്കുമെന്നതാണ് സർക്കാരിന്റെ പ്രധാന ആശങ്ക.
ചില വലിയ ബാങ്കിതര ധനകാര്യ സ്ഥാപനങ്ങൾ (NBFCs) മികച്ച രീതിയിൽ പ്രവർത്തിക്കുന്നുണ്ടെന്നും ശക്തമായ റിസ്ക് മാനേജ്മെന്റ് സംവിധാനങ്ങൾ പാലിക്കുന്നുണ്ടെന്നും ഉദ്യോഗസ്ഥൻ സമ്മതിച്ചു. എന്നിരുന്നാലും, കോർപ്പറേറ്റുകളുടെ ഉടമസ്ഥതയിലുള്ള ബാങ്കുകൾ അനുവദിക്കുന്നത് ബന്ധുത്വ ഇടപാടുകൾക്കും (related-party transactions) അതുവഴി സാമ്പത്തിക വ്യവസ്ഥയുടെ ആകെ തകർച്ചയ്ക്കും വഴിവെച്ചേക്കാം. നിലവിൽ കോർപ്പറേറ്റ് ഓഹരി പങ്കാളിത്തത്തിന് 26 ശതമാനം പരിധി നിശ്ചയിച്ചിരിക്കുന്നത് ഇത്തരം അപകടസാധ്യതകൾ ഒഴിവാക്കാനാണ്.
“കോർപ്പറേറ്റുകൾക്ക് ബാങ്ക് ലൈസൻസ് വേണം, ഒപ്പം കൂടുതൽ ഓഹരി പങ്കാളിത്തത്തിലൂടെ ബാങ്കിന്റെ പൂർണ്ണ നിയന്ത്രണവും വേണം. എന്നാൽ ഇവ രണ്ടും ഒരുമിച്ച് നടക്കില്ല,” പേര് വെളിപ്പെടുത്താത്ത ഉദ്യോഗസ്ഥൻ കൂട്ടിച്ചേർത്തു.
ബാങ്ക് ഉടമസ്ഥാവകാശം, പ്രൊമോട്ടർമാരുടെ ഓഹരി പങ്കാളിത്തം എന്നിവ സംബന്ധിച്ച മാനദണ്ഡങ്ങൾ റിസർവ് ബാങ്ക് പുനഃപരിശോധിച്ചു വരികയാണെന്ന് ആർബിഐ ഗവർണർ സഞ്ജയ് മൽഹോത്ര മെയ് 23-ന് പ്രസ്താവിച്ചിരുന്നു. ഈ സാഹചര്യത്തിൽ സർക്കാരിന്റെ ഈ നിലപാട് ഏറെ നിർണായകമാണ്.
