ചിത്രം ഗോട്ട് തിയറ്ററുകളിലെത്താൻ ഇനി ദിവസങ്ങൾ മാത്രം . ചിത്രത്തിന്റേതായി ഇതുവരെ പുറത്തുവന്ന എല്ലാ അപ്ഡേഷനുകൾക്കും വൻ സ്വീകാര്യതയാണ് ലഭിച്ചത് . ചിത്രത്തിന്റെ സംവിധായകൻ വെങ്കട് പ്രഭു പങ്കുവച്ചിരിക്കുന്ന ഒരു ഫോട്ടോയാണ് ആരാധകർക്കിടയിലും സോഷ്യൽ മീഡിയയിലും ഇപ്പോൾ തരംഗമായി കൊണ്ടിരിക്കുന്നത്.
മോഹൻലാലിനൊപ്പം നിൽക്കുന്ന ചിത്രമാണ് സംവിധായകൻ പങ്കുവച്ചിരിക്കുന്നത്. ‘വിത്ത് ദ് വൺ ആൻഡ് ഒൺലി ലാലേട്ടാ’ എന്നാണ് വെങ്കട് പ്രഭു ചിത്രത്തിന്റെ ക്യാപ്ഷൻ . ഇതോടെ മോഹൻലാൽ ചിത്രത്തിൽ അതിഥി വേഷത്തിലെത്തുമോ എന്നാണ് ആരാധകർ ചോദിക്കുന്നത്. ചിത്രത്തിൽ മോഹൻലാൽ എത്തുന്നുണ്ടെങ്കിൽ വിജയ്‌യ്ക്കൊപ്പമുള്ള അദ്ദേഹത്തിന്റെ രണ്ടാമത്തെ ചിത്രമായിരിക്കും ഇത്.
മുൻപ് ജില്ലയെന്ന ചിത്രത്തിനായാണ് ഇരുവരുമൊന്നിച്ചത്. അടുത്തിടെ നെൽസൺ ദിലീപ് കുമാർ – രജിനികാന്ത് കൂട്ടുകെട്ടിലെത്തിയ ജയിലറിലും മോഹൻലാൽ അതിഥി വേഷത്തിലെത്തിയിരുന്നു. അതേസമയം സയൻസ് ഫിക്ഷനായൊരുങ്ങുന്ന ഗോട്ടിൽ ഇരട്ട വേഷത്തിലാണ് വിജയ് എത്തുന്നത്. സെപ്റ്റംബർ 5 നാണ് ചിത്രം തിയറ്ററുകളിലെത്തുക.
