തിരുവനന്തപുരം: പ്രമുഖ മലയാള ദിനപത്രങ്ങളിൽ ഇന്ന് പ്രത്യക്ഷപ്പെട്ട ഒരു ഒന്നാം ചരമവാർഷിക പരസ്യം നാട്ടുകാരെയും വായനക്കാരെയും ഒരുപോലെ ഞെട്ടിച്ചു. ഒരു വർഷം മുൻപ് മരിച്ചയാളുടെ ഭാര്യയെ ‘മുൻ ഭാര്യ’ എന്ന് തിരുത്തി വായിക്കണമെന്ന വിചിത്രമായ ആവശ്യമാണ് കുടുംബം പരസ്യത്തിലൂടെ നൽകിയിരിക്കുന്നത്. പരേതന്റെ കോടിക്കണക്കിന് രൂപയുടെ സ്വത്തുമായി ബന്ധപ്പെട്ട തർക്കങ്ങളാണ് ഈ അസാധാരണ നീക്കത്തിന് പിന്നിലെന്നാണ് സംശയം.
മാറനല്ലൂർ ചീനിവിള വിനായകത്തിൽ വിനു സോമനാഥൻ പിള്ളയുടെ ഒന്നാം ചരമവാർഷികത്തോടനുബന്ധിച്ച് മലയാള മനോരമ, മാതൃഭൂമി പത്രങ്ങളിലാണ് കുടുംബം പരസ്യം നൽകിയത്.
പരസ്യത്തിലെ ‘തിരുത്ത്’
കഴിഞ്ഞ വർഷം ജൂൺ 29-ന് വിനു സോമനാഥൻ പിള്ള മരിച്ചപ്പോൾ നൽകിയ ചരമ അറിയിപ്പിൽ, കുടുംബാംഗങ്ങളുടെ കൂട്ടത്തിൽ ഭാര്യ അജിതയുടെ പേരും നൽകിയിരുന്നു. എന്നാൽ, ഇന്നത്തെ പരസ്യം ആ തെറ്റ് തിരുത്താനാണ്. പരസ്യത്തിലെ വാചകം ഇങ്ങനെ:
“പരേതന്റെ മരണവും സംസ്കാരവും അറിയിച്ചുകൊണ്ട്… പ്രസിദ്ധീകരിച്ച ചരമ അറിയിപ്പിൽ കുടുംബാംഗങ്ങളുടെ പേരുവിവരം കൊടുത്ത കൂട്ടത്തിൽ ‘ഭാര്യ’ എന്ന് കൊടുത്തിരുന്നത് ‘മുൻ ഭാര്യ’ എന്ന് തിരുത്തി വായിക്കണം എന്ന് അറിയിക്കുന്നു. തെറ്റ് പറ്റിയതിൽ ഖേദിക്കുന്നു.”
ദുരൂഹതയും സംശയവും
ഇതേക്കുറിച്ച് ചോദിച്ചപ്പോൾ, മരണസമയത്തെ തിരക്കിനിടയിൽ സംഭവിച്ച ഒരു പ്രൂഫ് റീഡിംഗ് പിഴവാണ് ഇതെന്നും, അത് ഇപ്പോൾ തിരുത്തിയെന്നേയുള്ളൂ എന്നുമാണ് പരേതന്റെ സഹോദരൻ മനു സോമനാഥൻപിള്ളയുടെ വിശദീകരണം. എന്നാൽ, സ്വത്തുതർക്കത്തെക്കുറിച്ചുള്ള ചോദ്യങ്ങൾക്ക് അദ്ദേഹം വ്യക്തമായ മറുപടി നൽകിയില്ല.
ഒരു “തെറ്റ്” തിരുത്താൻ ഒരു വർഷം മുഴുവൻ കാത്തിരുന്നത് എന്തിനാണെന്ന ചോദ്യത്തിന് കുടുംബം ഉത്തരം നൽകാത്തത് ദുരൂഹത വർധിപ്പിക്കുന്നു. സ്വത്ത് തർക്കങ്ങളിൽ എതിർകക്ഷികളുടെ അവകാശവാദം ദുർബലപ്പെടുത്താൻ പത്രപരസ്യങ്ങൾ ഉപയോഗിക്കുന്നത് പതിവാണെങ്കിലും, മരണശേഷം ഭാര്യയെ ‘മുൻ ഭാര്യ’യാക്കുന്ന തരത്തിലുള്ള ഈ നീക്കം അത്യപൂർവവും നാട്ടുകാർക്ക് ഞെട്ടലുളവാക്കുന്നതുമായി.
