ഹരാരെ: ആഫ്രിക്കൻ രാജ്യമായ സിംബാബ്‌വെയിൽ ആനകളുടെ എണ്ണം ക്രമാതീതമായി വർധിച്ചതിനെ തുടർന്ന് അവയെ കൂട്ടത്തോടെ കൊന്നൊടുക്കാൻ സർക്കാർ ഒരുങ്ങുന്നതായി റിപ്പോർട്ട്. ഏതെങ്കിലും കാലാവസ്ഥാ ദുരന്തത്തിന്റെ ഭാഗമായല്ല, മറിച്ച് വന്യജീവി സങ്കേതങ്ങൾക്ക് താങ്ങാനാവാത്ത വിധം ആനകളുടെ എണ്ണം പെരുകിയതാണ് ഈ തീരുമാനത്തിന് പിന്നിൽ. ആദ്യഘട്ടത്തിൽ കുറഞ്ഞത് 50 ആനകളെ കൊല്ലാനാണ് പദ്ധതി.
സിംബാബ്‌വെയിലെ സ്വകാര്യ വന്യജീവി സങ്കേതമായ സേവ് വാലി കൺസർവൻസിയിലാണ് ആനകളെ കൊല്ലുന്ന നടപടികൾ ആരംഭിക്കുക. 800 ആനകളെ മാത്രം ഉൾക്കൊള്ളാൻ ശേഷിയുള്ള ഈ സങ്കേതത്തിൽ നിലവിൽ 2500-ൽ അധികം ആനകളുണ്ട്, ഇത് താങ്ങാവുന്നതിലും മൂന്നിരട്ടിയിലധികമാണ്. എന്നാൽ, എത്രനാൾ ഈ നടപടി തുടരുമെന്നോ, 50 ആനകളിൽ ഇത് അവസാനിക്കുമോ എന്നതിനെക്കുറിച്ചോ വ്യക്തമായ വിവരങ്ങൾ അധികൃതർ പുറത്തുവിട്ടിട്ടില്ല.
കൊല്ലപ്പെടുന്ന ആനകളുടെ മാംസം പ്രാദേശിക സമൂഹങ്ങൾക്ക് വിതരണം ചെയ്യുമെന്നാണ് സർക്കാർ വൃത്തങ്ങൾ അറിയിക്കുന്നത്. അതേസമയം, ആനക്കൊമ്പ് പാർക്കും അധികൃതരും സംരക്ഷിക്കും. 1989 മുതൽ ആനക്കൊമ്പിന്റെ അന്താരാഷ്ട്ര വ്യാപാരം നിയമവിരുദ്ധമാണ്. വേട്ടയാടൽ തടയുന്നതിന്റെ ഭാഗമായിരുന്നു ഈ നിരോധനം. എന്നാൽ, വിൽക്കാൻ അനുമതിയില്ലാത്ത ടൺ കണക്കിന് ആനക്കൊമ്പ് സിംബാബ്‌വെയുടെ പക്കൽ കെട്ടിക്കിടക്കുന്നുണ്ട്.
അടുത്തിടെ ഹരാരെയിൽ 230 കിലോഗ്രാം ആനക്കൊമ്പ് വിൽക്കാൻ ശ്രമിച്ച നാലുപേരെ അറസ്റ്റ് ചെയ്ത സംഭവത്തിന് തൊട്ടുപിന്നാലെയാണ് ആനകളെ കൊല്ലാനുള്ള തീരുമാനം വരുന്നത്. ഇതിനുമുമ്പ് 2024-ലും സിംബാബ്‌വെ ആനകളെ കൊന്നിരുന്നു. കടുത്ത വരൾച്ചയെ തുടർന്നുണ്ടായ ഭക്ഷ്യക്ഷാമം കാരണം അന്ന് 200 ആനകളെയാണ് കൊന്നൊടുക്കിയത്. 1988-ന് ശേഷമുള്ള ആദ്യത്തെ വലിയതോതിലുള്ള ഉന്മൂലനമായിരുന്നു അത്.
“ആനകളുടെ എണ്ണം ക്രമാതീതമായി വർധിക്കുകയും, അവ സ്വന്തം ആവാസ വ്യവസ്ഥയും മറ്റ് മൃഗങ്ങളുടെ ആവാസ വ്യവസ്ഥയും നശിപ്പിക്കുകയും, മണ്ണൊലിപ്പിന് കാരണമാവുകയും, മനുഷ്യരെ കൊല്ലുകയും ചെയ്യുമ്പോൾ, ജനങ്ങളെ പട്ടിണിയിൽ മരിക്കാൻ വിടാനാവില്ല,” എന്നാണ് സർക്കാർ വൃത്തങ്ങൾ ഈ നടപടിയെ ന്യായീകരിക്കുന്നത്.
അതേസമയം, ആവർത്തിച്ചുള്ള ഇത്തരം നടപടികൾ സിംബാബ്‌വെയുടെ ആഗോള പ്രതിച്ഛായക്ക് മങ്ങലേൽപ്പിക്കുമെന്ന് മൃഗസ്നേഹികളും പരിസ്ഥിതി പ്രവർത്തകരും മുന്നറിയിപ്പ് നൽകുന്നു. ആനകൾ രാജ്യത്തെ പ്രധാന വിനോദസഞ്ചാര ആകർഷണമാണ് എന്നതും ശ്രദ്ധേയമാണ്. ഏകദേശം ഒരു ലക്ഷത്തോളം ആനകളുള്ള സിംബാബ്‌വെ, ലോകത്തിലെ രണ്ടാമത്തെ വലിയ ആനസമൂഹമുള്ള രാജ്യമാണ്. ഈ ജീവികൾ പരിസ്ഥിതി വ്യവസ്ഥയുടെ നിർണായക ഭാഗവുമാണ്. ഭാരം കുറയ്ക്കുന്നതിനായി കഴിഞ്ഞ 5 വർഷത്തിനിടെ സേവ് വാലിയിൽ നിന്ന് മാത്രം കുറഞ്ഞത് 200 ആനകളെ മറ്റ് സങ്കേതങ്ങളിലേക്ക് മാറ്റിയിട്ടുണ്ട്.
