ദുബായ്: ബോളിവുഡ് സിനിമകളിലൂടെയും ലൂസിഫറിലെ ബോബിയായും മലയാളികള്‍ക്ക് സുപരിചിതനായ നടൻ വിവേക് ഒബ്റോയി ഇപ്പോൾ കോടികളുടെ ബിസിനസ് സാമ്രാജ്യത്തിന് ഉടമയാണ്. ഏകദേശം 1200 കോടി രൂപയാണ് താരത്തിന്റെ ആസ്തി.
അഭിനയത്തിൽ സജീവമായിരുന്ന കാലത്തുതന്നെ ബിസിനസ് രംഗത്തും ശ്രദ്ധ കേന്ദ്രീകരിച്ച വിവേക്, ഇപ്പോൾ ദുബായ് കേന്ദ്രീകരിച്ച് തന്റെ റിയൽ എസ്റ്റേറ്റ് കമ്പനി നടത്തുകയാണ്. കോവിഡ് കാലത്ത് താൽക്കാലികമായി ദുബായിലേക്ക് മാറിയ താരം, പിന്നീട് കുടുംബത്തോടൊപ്പം അവിടെ സ്ഥിരതാമസമാക്കുകയായിരുന്നു.
ദുബായിലെ ജീവിതം
“ദുബായ് ഇപ്പോൾ എന്റെ രണ്ടാം വീടാണ്. കോവിഡ് സമയത്ത് ഒരു ചെറിയ കാലയളവിലേക്കാണ് ഇവിടേക്ക് വന്നത്. എന്നാൽ ഇവിടുത്തെ ജീവിതം ഇഷ്ടപ്പെട്ടതോടെ കുടുംബം ഇവിടെ തുടരാൻ തീരുമാനിക്കുകയായിരുന്നു. നാട്ടിൽ നിന്ന് അധികം ദൂരമില്ലാത്തതിനാൽ ഒരു മറുനാട്ടിൽ താമസിക്കുന്നതായി തോന്നുന്നില്ല,” എന്ന് ഒരു യൂട്യൂബ് ചാനലിന് നൽകിയ അഭിമുഖത്തിൽ വിവേക് പറഞ്ഞു. ദുബായിലെ പോസിറ്റീവ് അന്തരീക്ഷവും ബിസിനസ് സൗഹൃദപരമായ നിയമങ്ങളും തന്റെ സമ്പത്ത് വർധിക്കാൻ സഹായിച്ചതായും അദ്ദേഹം കൂട്ടിച്ചേർത്തു.
1200 കോടിയുടെ ബിസിനസ് സാമ്രാജ്യം
സിനിമയിൽ നിന്നുള്ള വരുമാനത്തെ മാത്രം ആശ്രയിച്ച് ജീവിക്കാൻ ആഗ്രഹിക്കാത്തതുകൊണ്ടാണ് താൻ ബിസിനസ് രംഗത്തേക്ക് തിരിഞ്ഞതെന്ന് വിവേക് മുൻപ് പറഞ്ഞിട്ടുണ്ട്.
- റിയൽ എസ്റ്റേറ്റ്: യുഎഇ കേന്ദ്രീകരിച്ച് പ്രവർത്തിക്കുന്ന വിവേകിന്റെ റിയൽ എസ്റ്റേറ്റ് കമ്പനിക്ക് ഏകദേശം 7 ബില്യൺ ഡോളറിന്റെ (ഏകദേശം 58,000 കോടി രൂപ) ആസ്തിയുണ്ട്. ഇത് പൂർണ്ണമായും കടബാധ്യതയില്ലാത്ത കമ്പനിയാണെന്നും അദ്ദേഹം പറയുന്നു.
- ഡയമണ്ട് ബിസിനസ്: ലബോറട്ടറിയിൽ നിർമ്മിക്കുന്ന വജ്രങ്ങളുടെ ബിസിനസ്സായ ‘സൊളിറ്റാരിയോ’യിൽ വിവേകിന് നിക്ഷേപമുണ്ട്. കഴിഞ്ഞ സാമ്പത്തിക വർഷം ഈ കമ്പനി 95-100 കോടി രൂപയുടെ വരുമാനം നേടി.
- മറ്റ് നിക്ഷേപങ്ങൾ: 30 മില്യൺ പൗണ്ട് മൂല്യമുള്ള ഒരു പ്രീമിയം ജിൻ ബ്രാൻഡിൽ 21 ശതമാനം ഓഹരിയും, 3400 കോടി രൂപ മൂല്യമുള്ള, വിദ്യാർത്ഥികളുടെ ഫീസ് അടയ്ക്കാൻ സഹായിക്കുന്ന ഒരു ഫിനാൻസ് സ്റ്റാർട്ടപ്പിലും വിവേക് പങ്കാളിയാണ്.
2000-ന്റെ തുടക്കത്തിൽ സിനിമയിലെത്തിയ വിവേക്, 2009 മുതലാണ് ബിസിനസ് രംഗത്ത് കൂടുതൽ സജീവമായത്. സിനിമയിലെ ലോബികളുടെ നിയന്ത്രണങ്ങളിൽ നിന്ന് സാമ്പത്തികമായി സ്വതന്ത്രനാകാനായിരുന്നു ഈ തീരുമാനമെന്നും അദ്ദേഹം വ്യക്തമാക്കിയിട്ടുണ്ട്.
