ത്രില്ലർ ചിത്രം ‘ആനന്ദ് ശ്രീബാല’നവംബർ 15ന്
‘ആനന്ദ് ശ്രീബാല’നവംബർ 15ന് പ്രേക്ഷകർക്ക് മുന്നിലെത്തും. സംവിധായകൻ വിനയന്റെ മകൻ വിഷ്ണു വിനയ് ആദ്യമായി സംവിധാനം ചെയ്യുന്ന ചിത്രമാണിത്. ‘മാളികപ്പുറം’, ‘2018’ തുടങ്ങിയ വൻ വിജയങ്ങൾക്കു ശേഷം കാവ്യ ഫിലിം കമ്പനിയുടെയും ആൻ മെഗാ മീഡിയയുടെയും ബാനറിൽ എത്തുന്ന ഈ ചിത്രത്തിൽ അർജുൻ അശോകനും അപർണ ദാസും മുഖ്യവേഷങ്ങളിൽ അഭിനയിക്കുന്നു. ‘മാളികപ്പുറം’ എന്ന മെഗാ ഹിറ്റിന്റെ തിരക്കഥ രചിച്ച അഭിലാഷ് പിള്ള തന്നെയാണ് ഈ ചിത്രത്തിനും കഥയെഴുതിയിരിക്കുന്നത്.
കേരളത്തിൽ നടന്ന ഒരു യഥാർഥ സംഭവത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. പ്രിയ വേണുവും നീതാ പിന്റോയും ചേർന്ന് നിർമ്മിക്കുന്ന ചിത്രത്തിന്റെ ടീസർ ശ്രദ്ധേയമായ പ്രതികരണം നേടിയിരുന്നു.
സംഗീതയെ ഏറെ നാളുകൾക്കുശേഷം മലയാള സിനിമയിൽ മുഴുനീള വേഷത്തിൽ കാണുന്നതിന്റെ പ്രത്യേകതയും ‘ആനന്ദ് ശ്രീബാല’ക്കുണ്ട്. ‘ചിന്താവിഷ്ടയായ ശ്യാമള’ എന്ന ചിത്രത്തിലൂടെ പ്രേക്ഷകഹൃദയം കീഴടക്കിയ സംഗീത, ഈ ചിത്രത്തിലൂടെ വീണ്ടും പ്രേക്ഷകരുടെ മുന്നിൽ എത്തുന്നു.
സൈജു കുറുപ്പ്, ധ്യാൻ ശ്രീനിവാസൻ, അജു വർഗീസ്, ഇന്ദ്രൻസ്, സംഗീത, മനോജ് കെ. യു., ശിവദ, അസീസ് നെടുമങ്ങാട്, കോട്ടയം നസീർ, നന്ദു, മാളവിക മനോജ് എന്നിവരാണ് ചിത്രത്തിലെ മറ്റ് പ്രധാന താരങ്ങൾ.
ചിത്രത്തിന് സംഗീതം ഒരുക്കുന്നത് രഞ്ജിൻ രാജാണ്. വിഷ്ണു നാരായണൻ ഛായാഗ്രഹണം നിർവഹിക്കുകയും കിരൺ ദാസ് എഡിറ്റിംഗ് നിർവഹിക്കുകയും ചെയ്യുന്നു. ലൈൻ പ്രൊഡ്യൂസർമാരായി ഗോപകുമാർ ജി. കെ.യും സുനിൽ സിംഗും പ്രവർത്തിക്കുന്നു. പ്രൊഡക്ഷൻ കൺട്രോളർ ഷാജി പട്ടിക്കര, ചീഫ് അസ്സോസിയേറ്റ് ഡയറക്ടർ ബിനു ജി. നായർ, ഡിസൈൻ ഓൾഡ് മോങ്ക്സ്, സ്റ്റീൽസ് ലെബിസൺ ഗോപി, ടീസർ കട്ട് അനന്ദു ഷെജി അജിത്, പി.ആർ. ആൻഡ് മാർക്കറ്റിംഗ് വൈശാഖ് വടക്കേവീട്, ജിനു അനിൽകുമാർ എന്നിവരും ടീമിൽ ഉൾപ്പെട്ടിരിക്കുന്നു.
