ഇൻസ്റ്റാഗ്രാം വഴി വിവാഹവാഗ്ദാനം നൽകി പീഡിപ്പിച്ചു; പോലീസുകാരനെതിരേ ഡോക്ടറുടെ പരാതി
തൃശൂർ ഐ.ആർ. ബറ്റാലിയനിലെ പോലീസുകാരനെതിരേ ബലാത്സംഗ പരാതി ഉയർന്നിരിക്കുകയാണ്. കൊച്ചിയിലെ ഡോക്ടർ യുവതിയാണ് പരാതി നൽകിയിരിക്കുന്നത്. ഇൻസ്റ്റഗ്രാമിലൂടെ പരിചയപ്പെട്ട ഇയാൾ വിവാഹ വാഗ്ദാനം നൽകി പീഡിപ്പിച്ചുവെന്നാണ് യുവതി പറയുന്നുത്.
തിരുവനന്തപുരം സ്വദേശിയായ തൃശ്ശൂര്‍ ഐ.ആര്‍. ബറ്റാലിയനിലെ പോലീസുകാരനെതിരേയാണ് പരാതി.തമ്പാനൂർ പൊലീസാണ് ഡോക്ടറുടെ പരാതിയുടെ അടിസ്ഥാനത്തിൽ കേസെടുത്തിരിക്കുന്നത്. യുവതിയുടെ പരാതി പ്രകാരം, തിരുവനന്തപുരത്തേക്ക് വിളിച്ച് വരുത്തി ഒരു ഹോട്ടലിൽ വെച്ച് ബലാത്സംഗം നടത്തിയെന്നാണ്.
പ്രതിക്കെതിരായ കേസിൽ വിവിധ വകുപ്പുകൾ ചുമത്തിയിട്ടുണ്ടെങ്കിലും, ഇയാളെ പിടികൂടാൻ പോലീസിന് ഇതുവരെയും സാധിച്ചിട്ടില്ല. ഇപ്പോള്‍ പ്രതി അവധിയിലായതിനാൽ ഒളിവിലാണ്, കൂടാതെ കേരളത്തിന് പുറത്തേക്ക് കടന്നിരിക്കാനിടയുണ്ടെന്ന സംശയവും ഉന്നയിക്കപ്പെടുന്നു.
പൊലീസുകാരൻ വിവാഹിതനാണെന്ന കാര്യം യുവതിയോട് മറച്ചുവെച്ചതിനോടൊപ്പം, ഇയാൾ സെക്‌സ് റാക്കറ്റുമായി ബന്ധമുള്ള ആളായിരിക്കാമെന്ന് സംശയിക്കുന്നതായി യുവതിയുടെ പരാതിയിലുണ്ട്. ഇപ്പോൾ പ്രതിയെ കണ്ടെത്താനും കസ്റ്റഡിയിൽ എടുക്കാനും പൊലീസിന്റെ ശ്രമങ്ങൾ തുടരുകയാണെന്നത് മാത്രമാണ് ലഭ്യമായ അവസാന വിവരം.
