തൃശ്ശൂർ ലോക്‌സഭയിൽ വോട്ട് ചെയ്തവർ പിന്നീട് അപ്രത്യക്ഷരായി, തെളിവുകൾ പുറത്തുവിട്ട് കോൺഗ്രസ്
തൃശ്ശൂർ: 2024-ലെ ലോക്‌സഭാ തിരഞ്ഞെടുപ്പിൽ തൃശ്ശൂരിൽ വോട്ട് രേഖപ്പെടുത്തിയ നിരവധി പേരെ വരാനിരിക്കുന്ന തദ്ദേശ തിരഞ്ഞെടുപ്പിനുള്ള വോട്ടർ പട്ടികയിൽ നിന്ന് ദുരൂഹമായി കാണാനില്ല. ഫ്ലാറ്റുകളുടെ വിലാസം ഉപയോഗിച്ച് വ്യാപകമായി കള്ളവോട്ടർമാരെ ചേർത്തുവെന്ന യുഡിഎഫിന്റെയും എൽഡിഎഫിന്റെയും ദീർഘകാലമായുള്ള ആരോപണം ശരിവെക്കുന്ന നിർണായക തെളിവുകൾ കോൺഗ്രസ് പുറത്തുവിട്ടു.
തൃശ്ശൂർ കോർപ്പറേഷനിലെ പൂങ്കുന്നം വാർഡിലെ 30-ാം നമ്പർ ബൂത്തിലെ നാല് അപ്പാർട്ട്മെൻ്റ് കോംപ്ലക്സുകളുടെ (ക്യാപിറ്റൽ വില്ലേജ്, ടോപ്പ് പാരഡൈസ്, ശ്രീ ശങ്കരി, ചൈത്രം) വിലാസത്തിൽ മാത്രം 45 വ്യാജ വോട്ടർമാരുണ്ടെന്നാണ് കോൺഗ്രസിന്റെ പ്രധാന കണ്ടെത്തൽ. ലോക്‌സഭാ തിരഞ്ഞെടുപ്പ് പട്ടികയും തദ്ദേശ തിരഞ്ഞെടുപ്പ് പട്ടികയും താരതമ്യം ചെയ്യുമ്പോൾ ഞെട്ടിക്കുന്ന ക്രമക്കേടുകളാണ് പുറത്തുവരുന്നത്.
45 വോട്ടർമാർക്ക് എന്തുസംഭവിച്ചു?
- 29 പേർ: സംസ്ഥാനത്തെ ഒരു തദ്ദേശ സ്ഥാപനത്തിലെയും വോട്ടർ പട്ടികയിൽ ഇപ്പോൾ ഇവരുടെ പേരില്ല. ഇവർ പൂർണ്ണമായും ‘അപ്രത്യക്ഷരായി’.
- 14 പേർ: തൃശ്ശൂർ ലോക്‌സഭാ മണ്ഡലത്തിന് പുറത്തുള്ള വാർഡുകളിൽ വോട്ടർമാരായി മാറി.
- 2 പേർ: തൃശ്ശൂർ മണ്ഡലത്തിനുള്ളിൽ തന്നെ, ഒരാൾ വലപ്പാടും മറ്റൊരാൾ ചൂണ്ടലിലുമായി പട്ടികയിൽ ഇടംപിടിച്ചു.
വോട്ട് തൃശ്ശൂരിൽ, വിലാസം മറ്റ് ജില്ലകളിൽ
ഒരേ ഫ്ലാറ്റിൽ താമസിക്കുന്നവരായി ലോക്‌സഭാ പട്ടികയിലുണ്ടായിരുന്ന പലരും ഇപ്പോൾ മറ്റ് ജില്ലകളിലെ പഞ്ചായത്തുകളിലാണ് വോട്ടർമാരായിരിക്കുന്നത്. ഇതിന്റെ വ്യക്തമായ തെളിവുകളും കോൺഗ്രസ് പുറത്തുവിട്ടു.
- ജിതേഷ് (അത്തോളി പഞ്ചായത്ത്, കോഴിക്കോട്)
- എസ്. അജയകുമാർ, എസ്. സന്തോഷ് കുമാർ (തിരുവനന്തപുരം കോർപ്പറേഷൻ)
- ജി. ഹരിപ്രസാദ് (തിരുവല്ല മുനിസിപ്പാലിറ്റി, പത്തനംതിട്ട)
- അനിജാമോൾ (തലയാഴം പഞ്ചായത്ത്, കോട്ടയം)
- വീണ (വെളിയങ്കോട് പഞ്ചായത്ത്, മലപ്പുറം)
- അശോകൻ (മുളന്തുരുത്തി പഞ്ചായത്ത്, എറണാകുളം)
ഇതുകൂടാതെ, മറ്റുചിലർ അയൽ മണ്ഡലമായ ആലത്തൂരിലെ കുന്നംകുളം, വേലൂർ, അവണൂർ, കൈപ്പറമ്പ് തുടങ്ങിയ വിവിധ തദ്ദേശ സ്ഥാപനങ്ങളിലെ വോട്ടർമാരായും മാറിയിട്ടുണ്ട്. ഒരാൾക്ക് ഇരട്ട വോട്ട് ഉള്ളതായും പാർട്ടി കണ്ടെത്തിയിട്ടുണ്ട്. ലോക്‌സഭാ തിരഞ്ഞെടുപ്പ് ഫലത്തെ സ്വാധീനിക്കാൻ ആസൂത്രിതമായി നടത്തിയ തട്ടിപ്പാണിതെന്ന് ആരോപിച്ച് കോൺഗ്രസ് ഔദ്യോഗികമായി പരാതി നൽകി.
