‘അതേ നാണയത്തിൽ മറുപടി നൽകാനറിയാം’; ഷാഫിക്കെതിരായ അതിക്രമത്തിൽ CPM-ന് മുന്നറിയിപ്പുമായി വി.ഡി. സതീശൻ
തിരുവനന്തപുരം: വടകര എം.പി ഷാഫി പറമ്പിലിനെതിരെ സിപിഎം-ഡിവൈഎഫ്ഐ പ്രവർത്തകർ നടത്തിയ പ്രതിഷേധത്തെ അതിരൂക്ഷമായി വിമർശിച്ച് പ്രതിപക്ഷ നേതാവ് വി.ഡി. സതീശൻ. ഷാഫിക്കെതിരായ അസഭ്യവർഷവും സമരാഭാസവും ജനാധിപത്യ വിരുദ്ധവും മര്യാദകേടുമാണെന്ന് അദ്ദേഹം വാർത്താക്കുറിപ്പിൽ പറഞ്ഞു.
പിണറായി വിജയൻ സർക്കാരും സിപിഎമ്മും നേരിടുന്ന ഗുരുതരമായ ആരോപണങ്ങളിൽ നിന്ന് ജനശ്രദ്ധ തിരിക്കാനുള്ള ഗൂഢനീക്കമാണ് ഇത്തരം പ്രതിഷേധങ്ങൾക്ക് പിന്നിലെന്ന് സതീശൻ ആരോപിച്ചു. “സിപിഎമ്മിന്റെ നുണപ്രചരണങ്ങളെ തള്ളിക്കളഞ്ഞ് വടകരയിലെ ജനങ്ങൾ തിരഞ്ഞെടുത്ത ജനപ്രതിനിധിയാണ് ഷാഫി പറമ്പിൽ. അദ്ദേഹത്തെ ഒറ്റതിരിഞ്ഞ് ആക്രമിക്കാനുള്ള ശ്രമത്തെ ശക്തമായി പ്രതിരോധിക്കും,” സതീശൻ വ്യക്തമാക്കി.
“ഇത്തരം മൂന്നാംകിട നാടകങ്ങൾക്ക് അതേ നാണയത്തിൽ മറുപടി നൽകാൻ കോൺഗ്രസിനും യുഡിഎഫിനും അറിയാമെന്ന കാര്യം മറക്കരുത്. ഇത് തുടർന്നാൽ മുഖ്യമന്ത്രിക്കും മന്ത്രിമാർക്കും ലൈംഗികാരോപണ കേസുകളിൽപ്പെട്ട എൽഡിഎഫ് നേതാക്കൾക്കും റോഡിലിറങ്ങാൻ കഴിയില്ല,” എന്ന് പ്രതിപക്ഷ നേതാവ് ശക്തമായ മുന്നറിയിപ്പ് നൽകി. ലൈംഗിക ആരോപണം നേരിട്ടവരെ സംരക്ഷിച്ച പിണറായി വിജയനെതിരെയാണ് സിപിഎം പ്രവർത്തകർ യഥാർത്ഥത്തിൽ പ്രതിഷേധിക്കേണ്ടതെന്നും അദ്ദേഹം കൂട്ടിച്ചേർത്തു. യുഡിഎഫിന്റെ ക്ഷമയും ജനാധിപത്യ ബോധവും ഒരു ദൗർബല്യമായി കണരുതെന്നും അദ്ദേഹം ഓർമ്മിപ്പിച്ചു.
