മുംബൈ: സെപ്റ്റംബർ ഒന്നിന് യുഎഇയിൽ ആരംഭിക്കുന്ന ഏഷ്യാ കപ്പ് ട്വന്റി 20 ക്രിക്കറ്റ് ടൂർണമെന്റിനുള്ള ഇന്ത്യൻ ടീമിനെ ആര് നയിക്കുമെന്ന ആകാംക്ഷയിൽ ക്രിക്കറ്റ് ലോകം. നിലവിലെ നായകൻ സൂര്യകുമാർ യാദവിന്റെ ഫിറ്റ്‌നസ് സംബന്ധിച്ച ആശങ്കകൾ നിലനിൽക്കുന്നതിനാൽ, ടെസ്റ്റ് ടീം നായകൻ ശുഭ്മൻ ഗിൽ, മുൻ നായകൻ ഹാർദിക് പാണ്ഡ്യ എന്നിവരുടെ പേരുകളും സജീവമായി പരിഗണിക്കപ്പെടുന്നുണ്ട്. ടീം പ്രഖ്യാപനം അടുത്ത ദിവസം തന്നെ ഉണ്ടായേക്കുമെന്നാണ് ബിസിസിഐ വൃത്തങ്ങൾ നൽകുന്ന സൂചന.
സൂര്യകുമാർ തന്നെ മുഖ്യ പരിഗണനയിൽ
ക്യാപ്റ്റൻസിയിൽ കാര്യമായ മുൻപരിചയമില്ലാതെ ഇന്ത്യൻ ടി20 ടീമിന്റെ നായകസ്ഥാനം ഏറ്റെടുത്തപ്പോൾ സൂര്യകുമാർ യാദവിന് നേരെ വലിയ വിമർശനങ്ങൾ ഉയർന്നിരുന്നു. എന്നാൽ, കഴിഞ്ഞ രണ്ടു വർഷത്തിനിടെ 22 മത്സരങ്ങളിൽ 17-ലും ഇന്ത്യയെ വിജയത്തിലെത്തിച്ച് സൂര്യകുമാർ ആ വിമർശനങ്ങളുടെയെല്ലാം മുനയൊടിച്ചു.
സമീപകാലത്തെ പ്രകടനങ്ങളും ക്യാപ്റ്റൻസി റെക്കോർഡും പരിഗണിക്കുമ്പോൾ ഏഷ്യാ കപ്പിൽ ഇന്ത്യയെ നയിക്കാനുള്ള ആദ്യ ചോയ്സ് സൂര്യ തന്നെയാണ്. എന്നാൽ അടുത്തിടെ ശസ്ത്രക്രിയയ്ക്ക് വിധേയനായ താരത്തിന്റെ കായികക്ഷമത സംബന്ധിച്ച് ടീം മാനേജ്‌മെന്റിന് ആശങ്കകളുണ്ട്. പരിശീലനം ആരംഭിച്ചെങ്കിലും, പൂർണ്ണ ഫിറ്റ്‌നസ് വീണ്ടെടുത്തുവെന്ന് തെളിയിച്ചാൽ മാത്രമേ 34-കാരനായ സൂര്യകുമാറിന് നായകസ്ഥാനം ഉറപ്പിക്കാനാകൂ.
ഗില്ലും ഹാർദിക്കും രംഗത്ത്
ഒരു മാസം മുൻപ് വരെ ടി20 ടീമിൽ സ്ഥാനം പോലും ഉറപ്പില്ലാതിരുന്ന ശുഭ്മൻ ഗിൽ, ഇപ്പോൾ നായകസ്ഥാനത്തേക്കുള്ള മത്സരത്തിൽ മുന്നിലുണ്ട്. മൂന്നു ഫോർമാറ്റിലും ഒരേ നായകൻ എന്നതിലേക്ക് ബിസിസിഐ മാറുകയാണെങ്കിൽ, ടെസ്റ്റ് നായകൻ എന്ന നിലയിൽ ഗില്ലിന് നറുക്ക് വീഴാൻ സാധ്യതയേറെയാണ്. രോഹിത് ശർമ്മ സ്ഥാനമൊഴിയുന്നതോടെ വൈറ്റ് ബോൾ ക്രിക്കറ്റിലും ഗിൽ നായകനാകുമെന്ന അഭ്യൂഹങ്ങൾ ശക്തമാണ്. ഈ സാഹചര്യത്തിൽ ഏഷ്യാ കപ്പ് ഗില്ലിന് മികച്ചൊരു പരീക്ഷണ വേദിയാകും.
ഒരു കാലത്ത് ടീമിന്റെ നായകനാകുമെന്ന് ഉറപ്പിച്ചിരുന്ന ഹാർദിക് പാണ്ഡ്യയും സാധ്യതാലിസ്റ്റിലുണ്ട്. ഇന്ത്യയെ 16 ടി20 മത്സരങ്ങളിൽ നയിച്ച് 10 വിജയങ്ങൾ സമ്മാനിച്ച ഹാർദിക്കിന് ഐപിഎല്ലിലും മികച്ച ക്യാപ്റ്റൻസി റെക്കോർഡുണ്ട്. 2022-ൽ ഗുജറാത്ത് ടൈറ്റൻസിനെ ഐപിഎൽ ചാമ്പ്യന്മാരാക്കിയതും ഹാർദിക്കിന്റെ നേതൃത്വത്തിലായിരുന്നു.
ശ്രേയസ് അയ്യരും സാധ്യതയിൽ
ഐപിഎല്ലിൽ ഡൽഹി ക്യാപിറ്റൽസിനെയും കൊൽക്കത്ത നൈറ്റ് റൈഡേഴ്‌സിനെയും ഫൈനലിൽ എത്തിച്ച ക്യാപ്റ്റനാണ് ശ്രേയസ് അയ്യർ. ഫ്രാഞ്ചൈസി ക്രിക്കറ്റിലെ ഈ മികവും സമീപകാലത്തെ ബാറ്റിംഗ് ഫോമും പരിഗണിച്ചാൽ ശ്രേയസിന്റെ സാധ്യതയും തള്ളിക്കളയാനാവില്ല. എന്തായാലും, സൂര്യകുമാറിന്റെ ഫിറ്റ്‌നസ് റിപ്പോർട്ടും സെലക്ടർമാരുടെ ദീർഘകാല പദ്ധതികളും അനുസരിച്ചായിരിക്കും അന്തിമ തീരുമാനം.
