ദുബായ്: ദുബായിൽ ജോലി നഷ്ടപ്പെട്ടാൽ, വിസയുടെ ഗ്രേസ് പിരീഡ് കഴിഞ്ഞും രാജ്യത്ത് തുടരുന്ന പ്രവാസികൾക്ക് കർശന മുന്നറിയിപ്പുമായി അധികൃതർ. നിയമങ്ങൾ കൃത്യമായി പാലിക്കണമെന്നും, ജോലി നഷ്ടപ്പെട്ടാൽ രാജ്യം വിട്ടതിന് ശേഷം പുതിയ ജോലി കണ്ടെത്തണമെന്നും ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA) ഡയറക്ടർ ജനറൽ ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർരി വ്യക്തമാക്കി.
“നിങ്ങൾ നിയമങ്ങൾ പാലിക്കുകയാണെങ്കിൽ, എന്തുകൊണ്ട് വിസ പുതുക്കിയില്ലെന്നോ, എന്തിന് കാലാവധി കഴിഞ്ഞും രാജ്യത്ത് തുടരുന്നുവെന്നോ ആരും നിങ്ങളോട് ചോദിക്കില്ല,” എന്ന് അദ്ദേഹം മാധ്യമപ്രവർത്തകരോട് പറഞ്ഞു.
പിടികൂടിയത് 32,000 നിയമലംഘകരെ
വിസ, താമസ നിയമങ്ങൾ കർശനമാക്കുന്നതിന്റെ ഭാഗമായി അധികൃതർ രാജ്യവ്യാപകമായി പരിശോധനകൾ ശക്തമാക്കിയിട്ടുണ്ട്. 2025 ജനുവരി മുതൽ ജൂൺ അവസാനം വരെ, വിദേശികളുടെ പ്രവേശന, താമസ നിയമങ്ങൾ ലംഘിച്ച 32,000-ൽ അധികം പേരെ പിടികൂടിയതായി ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) ചൊവ്വാഴ്ച അറിയിച്ചു.
പുതിയ ജോലിക്ക് രാജ്യം വിടണം
“എനിക്ക് ഇവിടെ ജോലി നഷ്ടപ്പെട്ടു, ഞാൻ മറ്റൊന്ന് അന്വേഷിക്കുകയാണ് എന്ന് നിങ്ങൾ പറയുന്നു. ശരി, നിങ്ങൾ ശ്രമിച്ചോളൂ, പക്ഷെ ജോലി നഷ്ടപ്പെട്ടാൽ അതിനൊരു നിയമവ്യവസ്ഥയുണ്ട്,” എന്ന് അൽ മർരി പറഞ്ഞു. ജോലി നഷ്ടപ്പെട്ടാൽ, അനുവദനീയമായ ഗ്രേസ് പിരീഡിനുള്ളിൽ രാജ്യം വിടുകയും, വിദേശത്ത് നിന്ന് പുതിയ ജോലി കണ്ടെത്തിയതിന് ശേഷം പുതിയ വിസയിൽ യുഎഇയിലേക്ക് മടങ്ങിവരികയുമാണ് വേണ്ടതെന്നും അദ്ദേഹം വ്യക്തമാക്കി.
“നിങ്ങൾ നിയമം ലംഘിക്കുന്ന ഒന്നും ചെയ്യേണ്ടതില്ല. നിങ്ങൾ നിയമങ്ങൾ പാലിക്കുകയാണെങ്കിൽ, ഞങ്ങൾ എല്ലാവരും സന്തുഷ്ടരായിരിക്കും,” അദ്ദേഹം കൂട്ടിച്ചേർത്തു.
