ലണ്ടൻ: യൂറോപ്യൻ യൂണിയന്റെ ഉപരോധം നിലനിൽക്കെ, റഷ്യൻ എണ്ണയുടെ ഏറ്റവും വലിയ ഉപഭോക്താവായി സൗദി അറേബ്യ. വേനൽക്കാലത്തെ വർധിച്ച ഊർജ്ജ ആവശ്യകതയാണ് സൗദിയെ റഷ്യൻ എണ്ണ ഇറക്കുമതി ചെയ്യാൻ പ്രേരിപ്പിച്ചത്. 2025 ജൂൺ മാസത്തിലെ കണക്കുകൾ പ്രകാരം, റഷ്യയുടെ ഫ്യൂവൽ ഓയിലിന്റെയും വാക്വം ഗ്യാസ് ഓയിലിന്റെയും (VGO) പ്രധാന ലക്ഷ്യസ്ഥാനം സൗദി അറേബ്യയായിരുന്നുവെന്ന് എൽഎസ്ഇജി ഡാറ്റ വ്യക്തമാക്കുന്നു.
2023 ഫെബ്രുവരിയിൽ യൂറോപ്യൻ യൂണിയൻ റഷ്യൻ എണ്ണ ഉൽപ്പന്നങ്ങൾക്ക് പൂർണ്ണമായ ഉപരോധം ഏർപ്പെടുത്തിയതിന് ശേഷം, മിഡിൽ ഈസ്റ്റേൺ, ഏഷ്യൻ രാജ്യങ്ങളാണ് റഷ്യൻ എണ്ണയുടെ പ്രധാന വിപണി.
സൗദിയിലേക്ക് ഇറക്കുമതി കുതിച്ചുയർന്നു
റഷ്യൻ തുറമുഖങ്ങളിൽ നിന്ന് സൗദി അറേബ്യയിലേക്കുള്ള നേരിട്ടുള്ള ഇന്ധന എണ്ണ, വിജിഒ കയറ്റുമതി ജൂണിൽ 9% വർധിച്ച് 0.8 ദശലക്ഷം മെട്രിക് ടണ്ണായി. അതേസമയം, ഇന്ത്യയിലേക്കും തുർക്കിയിലേക്കുമുള്ള റഷ്യൻ എണ്ണ കയറ്റുമതിയിൽ വലിയ കുറവുണ്ടായി. ഇന്ത്യയിലേക്കുള്ള കയറ്റുമതി 49% കുറഞ്ഞ് 0.34 ദശലക്ഷം ടണ്ണായപ്പോൾ, തുർക്കിയിലേക്കുള്ളത് 33% കുറഞ്ഞ് 0.28 ദശലക്ഷം ടണ്ണായി.
ഈജിപ്തിലെ ഐൻ സുഖ്‌ന ടെർമിനൽ, സിംഗപ്പൂർ, സെനഗൽ, ചൈന എന്നിവയായിരുന്നു ജൂണിലെ മറ്റ് പ്രധാന ഇറക്കുമതിക്കാർ.
യെമനിലെ ഹൂതി വിമതരുടെ ആക്രമണ ഭീഷണിയെ തുടർന്ന്, ചെങ്കടൽ വഴിയുള്ള ഗതാഗതം ഒഴിവാക്കി, ആഫ്രിക്കൻ മുനമ്പ് വഴിയാണ് റഷ്യൻ എണ്ണക്കപ്പലുകൾ ഇപ്പോൾ ഏഷ്യയിലേക്ക് സഞ്ചരിക്കുന്നത്.
