മുംബൈ: ഗൗതം അദാനിയുടെ നേതൃത്വത്തിലുള്ള അദാനി ഗ്രൂപ്പ് തങ്ങളുടെ എഫ്എംസിജി (നിത്യോപയോഗ സാധനങ്ങൾ) സംയുക്ത സംരംഭത്തിൽ നിന്ന് പിന്മാറുന്നു. ‘ഫോർച്യൂൺ’ ബ്രാൻഡ് ഭക്ഷ്യ എണ്ണകളുടെ നിർമ്മാതാക്കളായ എഡബ്ല്യുഎൽ അഗ്രി ബിസിനസ് ലിമിറ്റഡിലെ (പഴയ അദാനി വിൽമർ) 20 ശതമാനം ഓഹരികൾ സിംഗപ്പൂർ ആസ്ഥാനമായ വിൽമർ ഇന്റർനാഷണലിന് വിറ്റു. 7,150 കോടി രൂപയുടെതാണ് ഈ കൂറ്റൻ ഇടപാട്.
മാറുന്ന ഓഹരി പങ്കാളിത്തം
ഈ ഇടപാട് പൂർത്തിയായതോടെ എഡബ്ല്യുഎൽ അഗ്രി ബിസിനസിലെ വിൽമറിന്റെ ഓഹരി പങ്കാളിത്തം 64 ശതമാനമായി ഉയരുകയും അവർ ഭൂരിപക്ഷ ഓഹരി ഉടമകളാവുകയും ചെയ്യും. അദാനി ഗ്രൂപ്പിന്റെ ഓഹരി പങ്കാളിത്തം 11 ശതമാനമായി കുറയും. എഫ്എംസിജി രംഗം പൂർണ്ണമായി വിട്ട് ഊർജ്ജം, ഗതാഗതം, ലോജിസ്റ്റിക്സ് തുടങ്ങിയ അടിസ്ഥാന സൗകര്യ വികസന പദ്ധതികളിൽ കൂടുതൽ ശ്രദ്ധ കേന്ദ്രീകരിക്കാനാണ് അദാനി ഗ്രൂപ്പിന്റെ നീക്കം.
നേരത്തെ ഈ വർഷം ജനുവരിയിൽ 13.5 ശതമാനം ഓഹരികൾ 4,850 കോടി രൂപയ്ക്ക് അദാനി വിറ്റിരുന്നു. ബാക്കിയുള്ള 10.42% ഓഹരികൾ കൂടി മുൻകൂട്ടി നിശ്ചയിച്ച നിക്ഷേപകർക്ക് വിൽക്കുമെന്ന് കമ്പനി റെഗുലേറ്ററി ഫയലിംഗിൽ അറിയിച്ചു.
ഓഹരി വിപണിയിലെ കുതിപ്പ്
വൻകിട ഇടപാട് നടന്ന വാർത്ത പുറത്തുവന്നതോടെ എഡബ്ല്യുഎൽ അഗ്രി ബിസിനസിന്റെ ഓഹരി വിലയിൽ 8 ശതമാനത്തിലധികം കുതിപ്പുണ്ടായി. ബിഎസ്ഇയിൽ ഓഹരി വില 283.85 രൂപ വരെ ഉയർന്നു.
