ഇന്ത്യൻ കപ്പൽ ഗതാഗത രംഗത്തേക്ക് 10,000 കോടി രൂപയുമായി യൂറോപ്യൻ കമ്പനികൾ; നേട്ടം രാജ്യത്തിന്
ന്യൂഡൽഹി: ഇന്ത്യൻ കപ്പൽ ഗതാഗത മേഖലയ്ക്ക് പുത്തനുണർവ് നൽകിക്കൊണ്ട് 10,000 കോടി രൂപയുടെ വമ്പൻ വിദേശനിക്ഷേപം. സൈപ്രസ് ആസ്ഥാനമായുള്ള ഇന്റർഓറിയന്റ് നാവിഗേഷനും ഡെൻമാർക്കിലെ ഡാൻഷിപ്പ് & പാർട്‌ണേഴ്‌സും ചേർന്നാണ് ഈ ചരിത്രപരമായ നിക്ഷേപം നടത്തുന്നത്. 2005-ൽ ഈ മേഖല വിദേശനിക്ഷേപത്തിനായി പൂർണ്ണമായി തുറന്നുകൊടുത്തതിന് ശേഷമുള്ള ഏറ്റവും വലിയ ഒറ്റത്തവണ നിക്ഷേപമാണിത്.
ചൊവ്വാഴ്ചയാണ് ഇരു കമ്പനികളും തങ്ങളുടെ നിക്ഷേപ പദ്ധതി ഔദ്യോഗികമായി പ്രഖ്യാപിച്ചത്. ഈ പദ്ധതിക്ക് കീഴിൽ വാങ്ങുന്ന എല്ലാ കപ്പലുകളും ഇന്ത്യൻ പതാകയ്ക്ക് കീഴിൽ രജിസ്റ്റർ ചെയ്യും. ഇത് ഇന്ത്യയുടെ കപ്പൽ ഗതാഗത ശേഷി ഗണ്യമായി വർധിപ്പിക്കാൻ സഹായിക്കും.
രാജ്യത്തിന് നേട്ടങ്ങൾ ഏറെ
ഈ നിക്ഷേപത്തിന്റെ ഏറ്റവും വലിയ നേട്ടങ്ങളിലൊന്ന് ഇന്ത്യയുടെ കയറ്റുമതി-ഇറക്കുമതി ചരക്കുകൾ നീക്കുന്നതിലൂടെ ലഭിക്കുന്ന വരുമാനം രാജ്യത്തിന്റെ സമ്പദ്‌വ്യവസ്ഥയിൽ തന്നെ നിലനിൽക്കും എന്നതാണ്. ഇത് ആഭ്യന്തര വ്യാപാരത്തെ ശക്തിപ്പെടുത്തുന്നതിനും ആയിരക്കണക്കിന് പുതിയ തൊഴിലവസരങ്ങൾ സൃഷ്ടിക്കുന്നതിനും കാരണമാകും.
1979-ൽ സ്ഥാപിതമായ ഇന്റർഓറിയന്റ് നാവിഗേഷൻ, നിലവിൽ ലോകമെമ്പാടുമായി 100-ൽ അധികം കപ്പലുകൾ പ്രവർത്തിപ്പിക്കുന്ന, അന്താരാഷ്ട്ര ഷിപ്പിംഗ് രംഗത്തെ പ്രമുഖരാണ്. ഡെൻമാർക്ക് ആസ്ഥാനമായുള്ള ഡാൻഷിപ്പ് & പാർട്‌ണേഴ്‌സ് കപ്പൽ ബ്രോക്കിംഗ്, വാണിജ്യ മാനേജ്‌മെന്റ് തുടങ്ങിയ സമുദ്ര സംബന്ധമായ സേവനങ്ങൾ നൽകുന്ന കമ്പനിയാണ്. ഈ നിക്ഷേപം ഇന്ത്യയുടെ സമുദ്ര മേഖലയിലെ വളർച്ചയ്ക്ക് വലിയ കുതിപ്പേകുമെന്ന് വിദഗ്ദ്ധർ വിലയിരുത്തുന്നു.
