തൊടുപുഴ: വിഷം ഉള്ളിൽ ചെന്ന് ചികിത്സയിലായിരുന്ന യുവതി മരിച്ച സംഭവം കൊലപാതകമെന്ന് തെളിഞ്ഞു. ഭർത്താവ് ബലമായി വിഷം നൽകുകയായിരുന്നുവെന്ന യുവതിയുടെ മരണമൊഴിയുടെ അടിസ്ഥാനത്തിൽ, ഭർത്താവിനെതിരെ പൊലീസ് കൊലക്കുറ്റം ചുമത്തി. പുറപ്പുഴ ആനിമൂട്ടിൽ ജോർലി (34) ആണ് മരിച്ചത്. സംഭവത്തിൽ ഭർത്താവ് പുറപ്പുഴ ആനിമൂട്ടിൽ ടോണി മാത്യുവിനെ (43) കരിങ്കുന്നം പൊലീസ് അറസ്റ്റ് ചെയ്തു.
ഇക്കഴിഞ്ഞ ജൂൺ 26-നാണ് ജോർലിയെ വിഷം ഉള്ളിൽ ചെന്ന് ഗുരുതരാവസ്ഥയിൽ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചത്. ചികിത്സയിലിരിക്കെ, വ്യാഴാഴ്ച വൈകുന്നേരത്തോടെയാണ് ജോർലി മരണത്തിന് കീഴടങ്ങിയത്. ആശുപത്രിയിൽ വെച്ച് മജിസ്‌ട്രേട്ടിനും പൊലീസിനും നൽകിയ മൊഴിയാണ് കേസിൽ നിർണായകമായത്. ഭർത്താവ് ടോണി മാത്യു കവിളിൽ കുത്തിപ്പിടിച്ച ശേഷം കുപ്പിയിലുണ്ടായിരുന്ന വിഷം വായിലേക്ക് ബലമായി ഒഴിച്ചു നൽകുകയായിരുന്നു എന്നാണ് ജോർലി മൊഴി നൽകിയത്.
സ്ത്രീധന പീഡനമെന്ന് അച്ഛന്റെ പരാതി
വിവാഹസമയം 20 പവൻ സ്വർണ്ണാഭരണങ്ങളും രണ്ട് ലക്ഷം രൂപയും നൽകിയിരുന്നുവെന്നും, പിന്നീട് ഭർതൃവീട്ടുകാരുടെ നിർബന്ധപ്രകാരം നാല് ലക്ഷം രൂപ കൂടി നൽകിയെന്നും ജോർലിയുടെ പിതാവ് പല്ലാരിമംഗലം സ്വദേശി ജോൺ പൊലീസിന് നൽകിയ പരാതിയിൽ പറയുന്നു. ഈ പണവും സ്വർണ്ണവും ടോണിയും മാതാപിതാക്കളും ചേർന്ന് ധൂർത്തടിച്ച് നശിപ്പിച്ചു. വീണ്ടും പണം ആവശ്യപ്പെട്ട് ടോണി മകളെ നിരന്തരം ശാരീരികമായും മാനസികമായും പീഡിപ്പിക്കുന്നത് പതിവായിരുന്നുവെന്നും പരാതിയിലുണ്ട്.
തടിപ്പണിക്കാരനായ ടോണി, മിക്ക ദിവസങ്ങളിലും മദ്യപിച്ചെത്തിയാണ് ജോർലിയെ ഉപദ്രവിച്ചിരുന്നത്. മകളുടെ സ്വർണ്ണാഭരണങ്ങൾ പോലും ഇയാൾ മദ്യപാനത്തിനായി വിറ്റുവെന്നും പൊലീസ് കണ്ടെത്തിയിട്ടുണ്ട്.
കൊലക്കുറ്റം ചുമത്തി പൊലീസ്
ജോർലിയുടെ പിതാവിന്റെ പരാതിയെയും, യുവതിയുടെ മരണമൊഴിയെയും തുടർന്ന് ടോണിക്കെതിരെ വധശ്രമത്തിന് കേസെടുത്ത് അറസ്റ്റ് ചെയ്തിരുന്നു. തുടർന്ന് ഇയാളെ വീട്ടിലെത്തിച്ചും വിഷം വാങ്ങിയ കടയിലെത്തിച്ചും തെളിവെടുപ്പ് നടത്തി. ജോർലി മരിച്ചതോടെ, ടോണിക്കെതിരെ കൊലക്കുറ്റം (IPC 302) ചുമത്തുകയായിരുന്നു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ആവശ്യമെങ്കിൽ കൂടുതൽ ചോദ്യം ചെയ്യലിനായി കസ്റ്റഡിയിൽ വാങ്ങുമെന്ന് പൊലീസ് അറിയിച്ചു.
ജോർലിയുടെ സംസ്കാരം ഞായറാഴ്ച 2.30-ന് പൈങ്ങോട്ടൂർ സെന്റ് ആന്റണീസ് ഫൊറോനാ പള്ളിയിൽ നടക്കും.
