സ്വർണവില പവന് 360 രൂപ വർധിച്ച് 72,500 കടന്നു
കൊച്ചി: സംസ്ഥാനത്ത് സ്വർണവിലയിൽ തുടർച്ചയായ രണ്ടാം ദിവസവും വൻ വർധന. ഏതാനും ദിവസങ്ങൾക്കുള്ളിൽ 3000-ൽ അധികം രൂപയുടെ ഇടിവ് രേഖപ്പെടുത്തിയ ശേഷമാണ് ഈ തിരിച്ചുവരവ്. ഇന്ന് ഒരു പവൻ സ്വർണത്തിന് 360 രൂപ വർധിച്ച് 72,520 രൂപയായി. ഇതോടെ സ്വർണവില വീണ്ടും 72,500 രൂപയ്ക്ക് മുകളിലെത്തി.
ഒരു ഗ്രാം സ്വർണത്തിന്റെ വിലയിലും വർധനയുണ്ടായി. ഗ്രാമിന് 45 രൂപയാണ് ഇന്ന് കൂടിയത്. ഇതോടെ ഒരു ഗ്രാം സ്വർണത്തിന്റെ വില 9065 രൂപയായി. കഴിഞ്ഞ രണ്ടാഴ്ചക്കിടെ പവന് 3000 രൂപയിലധികം കുറഞ്ഞ ശേഷമാണ് ഇന്നലെ മുതൽ വില വീണ്ടും ഉയരാൻ തുടങ്ങിയത്. ഈ രണ്ടു ദിവസം കൊണ്ട് മാത്രം പവന് 1200 രൂപയുടെ വർധനവാണ് രേഖപ്പെടുത്തിയത്.
ജൂൺ 13-ന് സ്വർണവില ചരിത്രത്തിലെ ഏറ്റവും ഉയർന്ന നിരക്കായ 74,320 രൂപ മറികടന്നിരുന്നു. എന്നാൽ 75,000 കടന്ന് കുതിക്കുമെന്ന സൂചനകൾക്കിടെ പിന്നീടുള്ള ദിവസങ്ങളിൽ വില കുത്തനെ ഇടിയുകയായിരുന്നു.
സുരക്ഷിതമായ നിക്ഷേപമെന്ന നിലയിൽ സ്വർണത്തിലേക്ക് കൂടുതൽ ആളുകൾ ആകർഷിക്കപ്പെടുന്നതാണ് വില ഇപ്പോഴും ഉയർന്ന തലത്തിൽ തുടരാൻ കാരണമെന്ന് വിപണി വിദഗ്ധർ ചൂണ്ടിക്കാണിക്കുന്നു. ആഗോള വിപണിയിലെ ചലനങ്ങളും ഡോളറിന്റെ മൂല്യത്തിലെ വ്യതിയാനങ്ങളുമാണ് സ്വർണവിലയെ പ്രധാനമായും സ്വാധീനിക്കുന്നത്.
