കൊല്ലം: ദീർഘദൂര യാത്രകളിലെ ഗതാഗതക്കുരുക്കും യാത്രാക്ഷീണവും ഒഴിവാക്കാൻ വിപ്ലവകരമായ മാറ്റത്തിനൊരുങ്ങി ഇന്ത്യൻ റെയിൽവേ. യാത്രക്കാർക്ക് അവരുടെ സ്വകാര്യ കാറുകളിൽ ഇരുന്ന് തന്നെ ട്രെയിനിൽ യാത്ര ചെയ്യാൻ സൗകര്യമൊരുക്കുന്ന ‘റോൾ-ഓൺ, റോൾ-ഓഫ്’ (റോ-റോ) സർവീസ് പരീക്ഷണാടിസ്ഥാനത്തിൽ ആരംഭിക്കുന്നു. കൊങ്കൺ റെയിൽവേയാണ് ഈ പുതിയ പദ്ധതിക്ക് തുടക്കമിടുന്നത്.
വരാനിരിക്കുന്ന ഗണേശോത്സവത്തോടനുബന്ധിച്ചാണ് കൊങ്കൺ പാതയിൽ പുതിയ സർവീസ് ആരംഭിക്കുന്നത്. സ്വകാര്യ കാറുകൾ, എസ്‌യുവികൾ എന്നിവ ട്രെയിനിലെ പ്രത്യേക വാഗണുകളിലേക്ക് കയറ്റി യാത്ര തുടരാം എന്നതാണ് ഇതിന്റെ പ്രത്യേകത. യാത്രയിലുടനീളം യാത്രക്കാർക്ക് തങ്ങളുടെ കാറിനുള്ളിൽ തന്നെ ഇരുന്ന് സുരക്ഷിതമായി യാത്ര ചെയ്യാനും കാഴ്ചകൾ ആസ്വദിക്കാനും സാധിക്കും.
പരീക്ഷണ ഓട്ടം കൊങ്കൺ പാതയിൽ
പൈലറ്റ് സർവീസിനായി കൊളാഡ് മുതൽ ഗോവ വരെയുള്ള റൂട്ടാണ് കൊങ്കൺ റെയിൽവേ തിരഞ്ഞെടുത്തിരിക്കുന്നത്. ഓഗസ്റ്റ് 27 മുതൽ പദ്ധതി ആരംഭിക്കാനാണ് സാധ്യതയെന്ന് അധികൃതർ സൂചന നൽകുന്നു.
നിലവിൽ ദീർഘദൂര ട്രക്കുകൾക്കായി കൊങ്കൺ പാതയിൽ വിജയകരമായി റോ-റോ സർവീസ് നടത്തുന്നുണ്ട്. ഇന്ധന ലാഭം, യാത്രാസമയം കുറയ്ക്കൽ, റോഡിലെ തിരക്ക് ഒഴിവാക്കൽ എന്നിവയാണ് ഇതിന്റെ പ്രധാന നേട്ടങ്ങൾ. ഈ മാതൃകയാണ് ഇപ്പോൾ കാറുകളിലേക്കും വ്യാപിപ്പിക്കുന്നത്.
കാറുകൾ കയറ്റുന്നതിനായി ട്രെയിൻ വാഗണുകളിൽ ആവശ്യമായ മാറ്റങ്ങൾ വരുത്തുന്നതിനുള്ള നടപടികൾ റെയിൽവേ ആരംഭിച്ചു കഴിഞ്ഞു. റോഡിലെ ഗതാഗതക്കുരുക്ക് ഒഴിവാക്കുന്നതിനൊപ്പം, കാർബൺ ബഹിർഗമനം കുറയ്ക്കുന്നതിനും ഈ പദ്ധതി സഹായിക്കും. പരീക്ഷണം വിജയിച്ചാൽ, രാജ്യത്തെ പ്രധാന വിനോദസഞ്ചാര റൂട്ടുകളിലടക്കം സമാനമായ റോ-റോ സർവീസ് ആരംഭിക്കാൻ ഇന്ത്യൻ റെയിൽവേയ്ക്ക് പദ്ധതിയുണ്ട്.
