മദ്യലഹരിയിൽ യുവതി കാറോടിച്ചത് റെയിൽവേ ട്രാക്കിലൂടെ; 15 ട്രെയിനുകൾ വഴിതിരിച്ചുവിട്ടു | Video
ഹൈദരാബാദ്: തെലങ്കാനയിൽ മദ്യലഹരിയിലായിരുന്ന യുവതി കാർ റെയിൽവേ ട്രാക്കിലൂടെ ഓടിച്ചതിനെ തുടർന്ന് 15 ട്രെയിനുകൾ വഴിതിരിച്ചുവിട്ടു. ഉത്തർപ്രദേശ് സ്വദേശിനിയായ 34-കാരിയാണ് രംഗ റെഡ്ഡി ജില്ലയിലെ ശങ്കർപള്ളിക്ക് സമീപം കിയ സോനെറ്റ് കാറുമായി റെയിൽവേ ട്രാക്കിൽ ഭീകരാന്തരീക്ഷം സൃഷ്ടിച്ചത്. സംഭവത്തിന്റെ വീഡിയോ ദൃശ്യങ്ങൾ സാമൂഹ്യ മാധ്യമങ്ങളിൽ വൈറലാണ്.
വൈറൽ വീഡിയോയിൽ
യുവതി റെയിൽവേ ട്രാക്കിലൂടെ കാർ ഓടിക്കുന്നതും, പിന്നീട് പോലീസും നാട്ടുകാരും റെയിൽവേ ജീവനക്കാരും ചേർന്ന് ഇവരെ തടഞ്ഞുനിർത്താൻ ശ്രമിക്കുന്നതും വീഡിയോയിൽ കാണാം. കാറിൽ നിന്ന് ബലമായി പുറത്തിറക്കി കൈകൾ ബന്ധിച്ചപ്പോൾ, എന്ന് യുവതി ഹിന്ദിയിൽ അലറിവിളിക്കുന്നതും ദൃശ്യങ്ങളിലുണ്ട്.
പോലീസ് പറയുന്നത്
സംഭവത്തിൽ യുവതിയെ അറസ്റ്റ് ചെയ്തതായി റെയിൽവേ പോലീസ് സൂപ്രണ്ട് ചന്ദന ദീപ്തി അറിയിച്ചു. ഇവർ അടുത്തിടെ വരെ ഒരു മൾട്ടി-നാഷണൽ കമ്പനിയിൽ ജോലി ചെയ്യുകയായിരുന്നു. മാനസിക അസ്വാസ്ഥ്യം പ്രകടിപ്പിക്കുന്ന യുവതി, ആത്മഹത്യ ചെയ്യാനും അത് ഒരു കൊലപാതകമായി ചിത്രീകരിക്കാനും ശ്രമിച്ചതാണോ എന്നും പോലീസ് സംശയിക്കുന്നുണ്ട്. കാറിൽ നിന്ന് ഇവരുടെ ഡ്രൈവിംഗ് ലൈസൻസും പാൻ കാർഡും കണ്ടെടുത്തിട്ടുണ്ട്.
ഒഴിവായത് വൻ ദുരന്തം
യുവതിയുടെ ഈ സാഹസത്തെ തുടർന്ന്, ബെംഗളൂരു-ഹൈദരാബാദ് സർവീസ് ഉൾപ്പെടെ 10 മുതൽ 15 വരെ പാസഞ്ചർ ട്രെയിനുകളാണ് വഴിതിരിച്ചുവിട്ടത്. ഇത് ഒരു വലിയ ദുരന്തം ഒഴിവാക്കാൻ സഹായിച്ചതായി റെയിൽവേ അധികൃതർ അറിയിച്ചു.
2023-ൽ കേരളത്തിലെ കണ്ണൂരിലും സമാനമായ സംഭവം നടന്നിരുന്നു. അന്ന് മദ്യലഹരിയിലായിരുന്ന ഒരാൾ കാറുമായി റെയിൽവേ ട്രാക്കിലേക്ക് ഓടിച്ചുകയറ്റിയിരുന്നു.
