ഓഹരി വിപണിയിലെ തകർച്ച, നികുതി, തെറ്റായ നിക്ഷേപങ്ങൾ എന്നിവയെക്കുറിച്ചെല്ലാം നാം ആശങ്കപ്പെടാറുണ്ട്. എന്നാൽ ഇവയെക്കാളെല്ലാം അപകടകാരിയായി, നമ്മുടെ സമ്പാദ്യത്തെ ഓരോ ദിവസവും നിശബ്ദമായി കാർന്നുതിന്നുന്ന ഒരു ‘കൊലയാളി’യുണ്ട് – പണപ്പെരുപ്പം (Inflation). ഓഹരി വിപണി തകരുമ്പോൾ വാർത്താ തലക്കെട്ടുകൾ ഉണ്ടാകുമെങ്കിലും, പണപ്പെരുപ്പം നിങ്ങളുടെ സമ്പത്തിനെ സാവധാനത്തിലും എന്നാൽ കൂടുതൽ അപകടകരമായും ഇല്ലാതാക്കുന്നു.
എന്താണ് പണപ്പെരുപ്പമെന്ന ‘നിശബ്ദ കൊലയാളി’?
സാധനങ്ങളുടെയും സേവനങ്ങളുടെയും വിലയിൽ കാലക്രമേണയുണ്ടാകുന്ന വർധനവാണ് പണപ്പെരുപ്പം. വർഷത്തിൽ 5% അല്ലെങ്കിൽ 7% വർധനവ് എന്നത് ഒറ്റനോട്ടത്തിൽ ചെറുതായി തോന്നാം. എന്നാൽ വർഷങ്ങൾക്കിപ്പുറം ഇത് നിങ്ങളുടെ പണം കൊണ്ട് സാധനങ്ങൾ വാങ്ങാനുള്ള കഴിവിനെ (Purchasing Power) ഇല്ലാതാക്കും.
ഒരു ഉദാഹരണം നോക്കാം: വാർഷിക പണപ്പെരുപ്പം ശരാശരി 7% ആണെങ്കിൽ, ഇന്ന് നിങ്ങളുടെ കയ്യിലുള്ള 1 കോടി രൂപയ്ക്ക് 20 വർഷം കഴിഞ്ഞ് വെറും 25.84 ലക്ഷം രൂപയുടെ വിലയേ ഉണ്ടാകൂ. അതായത്, 20 വർഷത്തിന് ശേഷം ഇന്നത്തെ ഒരു കോടിയുടെ മൂല്യമുള്ള ഒരു തുക വേണമെങ്കിൽ, നിങ്ങൾ ഏകദേശം 4 കോടി രൂപ സമാഹരിക്കേണ്ടി വരും.
ചെലവുകൾ കുതിച്ചുയരുമ്പോൾ
7% പണപ്പെരുപ്പം അനുസരിച്ച്, ഇന്നത്തെ ചില പ്രധാന ചെലവുകൾ 20 വർഷം കഴിഞ്ഞ് എങ്ങനെയായിരിക്കുമെന്ന് നോക്കാം:
- ഇന്ന് വർഷം 1 ലക്ഷം രൂപ സ്കൂൾ ഫീസുള്ള കുട്ടിക്ക്, 20 വർഷം കഴിഞ്ഞ് 3.87 ലക്ഷം രൂപ നൽകേണ്ടി വരും.
- ഇന്ന് 5 ലക്ഷം രൂപ ചെലവുള്ള ഒരു ശസ്ത്രക്രിയയ്ക്ക്, 20 വർഷം കഴിഞ്ഞ് 19.35 ലക്ഷം രൂപയാകും.
- ഇന്ന് മാസം 50,000 രൂപ വീട്ടുചെലവുള്ള ഒരു കുടുംബത്തിന്, 20 വർഷം കഴിഞ്ഞ് മാസം 1.93 ലക്ഷം രൂപ വേണ്ടിവരും.
അതുകൊണ്ട്, 20 വർഷത്തിന് ശേഷം വിരമിക്കുമ്പോൾ ഒരു കോടി രൂപയുമായി സുഖമായി ജീവിക്കാമെന്ന് കരുതുന്നുണ്ടെങ്കിൽ വീണ്ടും ചിന്തിക്കുക. ഒരുപക്ഷേ, കുറച്ച് വർഷത്തെ അടിസ്ഥാന ജീവിതച്ചെലവുകൾക്ക് പോലും ആ തുക മതിയാകാതെ വരും.
ആദായത്തിലെ കള്ളക്കണക്ക്
പലരും തങ്ങളുടെ നിക്ഷേപങ്ങൾക്ക് 7-8% വാർഷിക ആദായം ലഭിക്കുമ്പോൾ സന്തോഷിക്കാറുണ്ട്. എന്നാൽ പണപ്പെരുപ്പവും 7% ആണെങ്കിൽ, നിങ്ങളുടെ യഥാർത്ഥ ആദായം പൂജ്യമാണ്.
- നിങ്ങൾ 1 കോടി രൂപ 8% പലിശ നൽകുന്ന ഒരു നിക്ഷേപ പദ്ധതിയിൽ ഇടുന്നു. 20 വർഷം കഴിഞ്ഞ് അത് ഏകദേശം 4.66 കോടി രൂപയായി വളരും.
- എന്നാൽ, 7% പണപ്പെരുപ്പം കാരണം, ആ 4.66 കോടി രൂപയ്ക്ക് ഇന്നത്തെ കണക്കിൽ ഏകദേശം 1.20 കോടി രൂപയുടെ മൂല്യമേ ഉണ്ടാകൂ. അതായത്, 20 വർഷം കൊണ്ട് നിങ്ങളുടെ സമ്പത്ത് കാര്യമായി വളർന്നില്ല, മൂല്യം നഷ്ടപ്പെടാതെ സംരക്ഷിക്കുക മാത്രമാണ് ചെയ്തത്.
പണപ്പെരുപ്പത്തെ എങ്ങനെ പ്രതിരോധിക്കാം?
പണപ്പെരുപ്പത്തെ മറികടന്ന് ആദായം നേടുമ്പോൾ മാത്രമാണ് സമ്പത്ത് യഥാർത്ഥത്തിൽ വളരുന്നത്. ഇതിനായി ചില കാര്യങ്ങൾ ശ്രദ്ധിക്കാം:
- നിക്ഷേപിക്കുക, വെറുതെ സമ്പാദിക്കരുത്: സേവിങ്സ് അക്കൗണ്ടിലോ സ്ഥിരനിക്ഷേപത്തിലോ (FD) പണം വെച്ചാൽ അതിന്റെ മൂല്യം കാലക്രമേണ കുറയും. പണപ്പെരുപ്പത്തെക്കാൾ വേഗത്തിൽ വളരുന്ന ഇക്വിറ്റി മ്യൂച്വൽ ഫണ്ടുകൾ, ഓഹരികൾ, റിയൽ എസ്റ്റേറ്റ് നിക്ഷേപങ്ങൾ എന്നിവ പരിഗണിക്കുക.
- യഥാർത്ഥ ആദായം തിരിച്ചറിയുക: 9% ആദായം ലഭിച്ചു എന്ന് പറയുമ്പോൾ, പണപ്പെരുപ്പം 7% ആണെങ്കിൽ നിങ്ങളുടെ യഥാർത്ഥ നേട്ടം 2% മാത്രമാണെന്ന് മനസ്സിലാക്കുക.
- നിക്ഷേപങ്ങൾ പുനഃപരിശോധിക്കുക: വർഷത്തിലൊരിക്കലെങ്കിലും നിങ്ങളുടെ നിക്ഷേപങ്ങൾ വിലയിരുത്തി ആവശ്യമായ മാറ്റങ്ങൾ വരുത്തുക.
- വിദഗ്ദ്ധ സഹായം തേടുക: ഒരു സാമ്പത്തിക ഉപദേഷ്ടാവിന്റെ സഹായത്തോടെ പണപ്പെരുപ്പം, നികുതി, ജീവിതശൈലി എന്നിവയെല്ലാം കണക്കിലെടുത്ത് ഒരു ദീർഘകാല നിക്ഷേപ പദ്ധതി തയ്യാറാക്കുക.
പണപ്പെരുപ്പം നിങ്ങളുടെ പണം മാത്രമല്ല, നിങ്ങളുടെ ഭാവിയും സ്വപ്നങ്ങളും കൂടിയാണ് മോഷ്ടിക്കുന്നത്. അതിനാൽ അറിവും കൃത്യമായ നിക്ഷേപങ്ങളും കൊണ്ട് ഈ ‘കള്ളനെ’ പ്രതിരോധിച്ച് നിങ്ങളുടെ സാമ്പത്തിക ഭാവി സുരക്ഷിതമാക്കാം.
