വത്തിക്കാൻ സിറ്റി: ആഗോള കത്തോലിക്കാ സഭയ്ക്ക് പുതിയ ഇടയൻ. അമേരിക്കൻ ഐക്യനാടുകളിൽ നിന്നുള്ള കർദിനാൾ റോബർട്ട് ഫ്രാൻസിസ് പ്രവോസ്ത് പുതിയ മാർപാപ്പയായി തിരഞ്ഞെടുക്കപ്പെട്ടു. ഇദ്ദേഹം ഇനി ലിയോ പതിനാലാമൻ മാർപാപ്പ എന്നറിയപ്പെടും. യുഎസിൽ നിന്നുള്ള ആദ്യത്തെ മാർപാപ്പയാണ് ഇദ്ദേഹം.
പുതിയ മാർപാപ്പയെ തിരഞ്ഞെടുക്കാനുള്ള കോൺക്ലേവ് നടക്കുന്ന സിസ്റ്റീൻ ചാപ്പലിലെ ചിമ്മിനിയിൽ നിന്ന് വെളുത്ത പുക ഉയർന്നതോടെയാണ് പുതിയ മാർപാപ്പ തിരഞ്ഞെടുക്കപ്പെട്ടതായി ഔദ്യോഗികമായി സ്ഥിരീകരിക്കപ്പെട്ടത്. കോൺക്ലേവിൻ്റെ രണ്ടാം ദിവസമാണ് പുതിയ മാർപാപ്പയെ തിരഞ്ഞെടുക്കുന്നത് എന്നത് ശ്രദ്ധേയമാണ്. തിരഞ്ഞെടുക്കപ്പെട്ടതിന് പിന്നാലെ പുതിയ മാർപാപ്പ സ്ഥാനവസ്ത്രങ്ങൾ ധരിച്ച് സെന്റ് പീറ്റേഴ്സ് ബസിലിക്കയുടെ ബാൽക്കണിയിൽ എത്തി വിശ്വാസികളെ അഭിസംബോധന ചെയ്യും.
സെന്റ് പീറ്റേഴ്സ് ചത്വരത്തിൽ തടിച്ചുകൂടിയ വിശ്വാസികൾക്കിടയിൽ വലിയ സന്തോഷപ്രകടനങ്ങൾ ദൃശ്യമായി. വെളുത്ത പുക കണ്ടതോടെ കൂടുതൽ ആളുകൾ ചത്വരത്തിലേക്ക് ഓടിയെത്തി. പലരും സന്തോഷം കൊണ്ട് ആർപ്പുവിളിക്കുകയും ആകാശത്തേക്ക് നോക്കി പ്രാർത്ഥിക്കുകയും ചെയ്തു. ബസിലിക്കയിലെ മണികൾ ഉച്ചത്തിൽ മുഴങ്ങി. പുതിയ മാർപാപ്പയെ തിരഞ്ഞെടുത്തെന്ന വാർത്ത കേൾക്കാനായി ഇന്നലെ 45,000 ത്തിലധികം ആളുകളാണ് സെന്റ് പീറ്റേഴ്സ് ചത്വരത്തിൽ തടിച്ചുകൂടിയത്.
പുതിയ മാർപാപ്പയെ തിരഞ്ഞെടുക്കുന്നതിനുള്ള വോട്ടെടുപ്പിൽ വോട്ടവകാശമുള്ള 133 കർദ്ദിനാൾമാരാണ് പങ്കെടുത്തത്. അതിനാൽ ഒരാൾക്ക് മൂന്നിൽ രണ്ട് ഭൂരിപക്ഷം ലഭിക്കാൻ 89 വോട്ടുകൾ നേടേണ്ടതുണ്ട്. വോട്ടവകാശമുള്ളവരും ഇല്ലാത്തവരുമായ കർദ്ദിനാൾമാർ ഇന്നലെ രാവിലെ ഇന്ത്യൻ സമയം 10 മണിക്ക് സെന്റ് പീറ്റേഴ്സ് ബസിലിക്കയിൽ വിശുദ്ധ കുർബാന അർപ്പിച്ചു. കർദ്ദിനാൾ സംഘത്തിൻ്റെ ഡീൻ കർദ്ദിനാൾ ജിയോവാനി ബറ്റിസ്റ്റ റേ ആയിരുന്നു മുഖ്യ കാർമ്മികൻ.
ഇതോടെ കത്തോലിക്കാ സഭയ്ക്ക് പുതിയ നായകനെ ലഭിച്ചിരിക്കുകയാണ്. ലിയോ പതിനാലാമൻ മാർപാപ്പയുടെ വാക്കുകൾക്കും പുതിയ നയങ്ങൾക്കുമായി ലോകമെമ്പാടുമുള്ള കത്തോലിക്ക വിശ്വാസികൾ കാത്തിരിക്കുന്നു.
