തമന്ന ഭാട്ടിയയും കാമുകനും നടനുമായ വിജയ് വര്‍മയും വിവാഹിതരാകുന്നു. 2025ലാണ് ഇവര്‍ വിവാഹം കഴിക്കാനൊരുങ്ങുന്നതെന്നാണ് റിപ്പോര്‍ട്ട്. പൊതുവേദികളില്‍ ഒരുമിച്ചെത്താന്‍ തുടങ്ങിയതോടെയാണ് ഇരുവരും തമ്മില്‍ പ്രണയത്തിലാണെന്ന് ഗോസിപ്പ് പുറത്ത് വന്നത്. പിന്നീട് താരങ്ങള്‍ ആ ബന്ധം ശരിവയ്ക്കുകയായിരുന്നു. വിവാഹശേഷം താമസിക്കാനായി ഇരുവരും മനോഹരമായ വീട് അന്വേഷണത്തിലാണ് ഇപ്പോഴെന്നാണ് പുറത്ത് വരുന്ന റിപ്പോര്‍ട്ട്. വാര്‍ത്ത ഇരുവരും ഔദ്യോഗികമായി സ്ഥിരീകരിച്ചിട്ടില്ല.
ലസ്റ്റ് സ്റ്റോറീസ് എന്ന സിനിമയില്‍ ഒരുമിച്ച് അഭിനയിച്ചപ്പോഴാണ് ഇരുവരും തമ്മില്‍ പ്രണയത്തിലാകുന്നത്. പിന്നീട് ഇരുവരും തമ്മില്‍ ഡേറ്റിങ് ആരംഭിക്കുകയും ചെയ്തിരുന്നു. 2023 ല്‍ ശുഭങ്കര്‍ മിശ്രയുമായുള്ള അഭിമുഖത്തില്‍ വിജയ് വര്‍മ്മ തന്നെയാണ് തമന്നയെ പ്രണയിക്കുന്നുവെന്ന് തുറന്ന് പറഞ്ഞത്.
പിന്നീട് വിജയ് വര്‍മ്മയെക്കുറിച്ചുള്ള ചോദ്യത്തില്‍ തന്റെ ‘സന്തോഷകരമായ സ്ഥലം’ എന്നാണ് തമന്ന വിശേഷിപ്പിച്ചത്. പ്രണയം സ്ഥിരീകരിക്കാതെ ഒളിച്ചുവയ്ക്കാന്‍ തങ്ങള്‍ താല്‍പര്യപ്പെടുന്നില്ലെന്നാണ് വിജയ് വര്‍മ്മ പ്രണയത്തെ പറ്റി വെളിപ്പെടുത്തിയത്.
