കോടാലി പരാമർശം കോടാലിയായി ; പരസ്പരം പരിഹസിച്ച് എംവി ​ഗോവിന്ദനും പിവി അൻവറും

തൃശൂര്‍ : പിവി അൻവര്‍ കോടാലിയെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ. സെക്രട്ടറിയുടെ പരിഹാസത്തിന് മറുപടിയുമായി പിവി അൻവര്‍ രം​ഗത്ത്. തൃശൂര്‍ വരവൂരിൽ നടന്ന പരിപാടിക്കിടെയാണ് സിപിഎം സംസ്ഥാന സെക്രട്ടറിക്ക് മറുപടിയായി പിവി അൻവറിന്റെ പ്രതികരണം ഉണ്ടായത്. തന്നെ പരിഹസിക്കുന്ന എംവി ഗോവിന്ദന് കോടാലി എന്തെന്നതിനെ കുറിച്ച് ക്ലാസെടുക്കണമെന്നും കോടാലി എന്താണെന്ന് അറിയാത്തവരുടെ മുമ്പിലാണ് കോടാലി കഥ പറയുന്നതെന്നുമാണ് പിവി അൻവറിന്റെ പരിഹാസം.

ഈ അടുത്തകാലത്താണ് ഇടത് മുന്നണിയെ പ്രതിരോധത്തിലാക്കി പിവി അൻവർ പാർട്ടി വിടുന്നത് . പാർട്ടിക്കെതിരെയും മുഖ്യമന്ത്രിക്കെതിരെയുമെല്ലാം അതിരൂക്ഷ വിമർശനമുന്നയിച്ച് കൊണ്ടിരിക്കുന്ന പിവി അൻവറിനെ സിപിഎം സംസ്ഥാന സെക്രട്ടറി കോടാലിയാണ് അൻവർ എന്ന് പറഞ്ഞ് പരിഹസിച്ചിരുന്നു. പി വി അൻവര്‍ കോടാലിയാണെന്ന് പണ്ടേ പറഞ്ഞതല്ലെയെന്നായിരുന്നു എംവി ഗോവിന്ദന്‍റെ പരിഹാസം. ഇതിനു പിന്നാലെയാണ് എംവി ഗോവിന്ദന് ക്ലാസ് എടുക്കണമെന്ന് പറഞ്ഞ് അൻവര്‍ തിരിച്ചടിച്ചത്.