കുപ്രസിദ്ധ കുറ്റവാളി ഓംപ്രകാശ് ഉൾപ്പെട്ട മയക്കുമരുന്ന് കേസിൽ മലയാള സിനിമാതാരങ്ങളും. ഓംപ്രകാശിനെ സന്ദർശിച്ച താരങ്ങളുടെ പേര് പുറത്തുവിട്ട് പോലീസ്. കുപ്രസിദ്ധ ഗുണ്ടാനേതാവ് ഓംപ്രകാശ് ഉള്‍പ്പെട്ട മയക്കുമരുന്ന് കേസില്‍ മലയാള സിനിമാതാരങ്ങളും പങ്കുണ്ടെന്നാണ് പുതിയ റിപ്പോര്‍ട്ടുകള്‍. പോലീസ് പുറത്തുവിട്ട വിവരങ്ങള്‍ പ്രകാരം, യുവതാരങ്ങളായ പ്രയാഗ മാര്‍ട്ടിനും ശ്രീനാഥ് ഭാസിയും ഓംപ്രകാശിനെ കാണാനെത്തിയതായാണ് സ്ഥിരീകരിച്ചത്. ഇരുവരുടേയും പേര് റിമാന്‍ഡ് റിപ്പോര്‍ട്ടില്‍ ഉള്‍പ്പെടുത്തിയിട്ടുണ്ട്.
എറണാകുളം കുണ്ടന്നൂരിലെ നക്ഷത്ര ഹോട്ടലില്‍ മൂന്ന് മുറികള്‍ കേന്ദ്രീകരിച്ച് പോലീസ് നടത്തിയ അന്വേഷണത്തിലാണ് ഈ വിവരങ്ങള്‍ പുറത്തുവന്നത്. ഹോട്ടലില്‍ ലഹരി പാര്‍ട്ടി നടന്നതായി പൊലീസിന് സൂചനകള്‍ ലഭിച്ചു. ആ പാര്‍ട്ടിയില്‍ 20 പേര് പങ്കെടുത്തതായും പോലീസ് കണ്ടെത്തിയിട്ടുണ്ട്.
ഓംപ്രകാശും കൂട്ടാളി ഷിഹാസും മയക്കുമരുന്ന് ഇടപാട് നടത്തിയെന്ന സംശയത്തില്‍ കഴിഞ്ഞദിവസം നക്ഷത്ര ഹോട്ടലില്‍നിന്ന് പിടിയിലായി. ഓംപ്രകാശിനെതിരെ 20-ഓളം കേസുകള്‍ നിലവിലുണ്ട്. പരിശോധനയില്‍, ഷിഹാസിന്റെ മുറിയില്‍ നിന്നും രാസലഹരികളും മദ്യക്കുപ്പികളും കണ്ടെത്തിയിരുന്നു.
ജാമ്യത്തില്‍ ഇറങ്ങിയശേഷം ഇവര്‍ കൊച്ചിയില്‍ എത്തിയത് പോലീസ് നിരീക്ഷണത്തിലായിരുന്നു. കൊച്ചിയിലെ പ്രമുഖ ഗുണ്ടാസംഘങ്ങളുമായുള്ള ബന്ധവും പരിശോധിക്കപ്പെടുന്നുണ്ട്. എൻ.ഡി.പി.എസ്. നിയമപ്രകാരം ഇവര്‍ക്കെതിരെ കുറ്റം ചുമത്തിയിട്ടുണ്ട്. ഈ അന്വേഷണത്തിന്‍റെ ഭാഗമായിട്ടാണ് ഓംപ്രകാശിനെ കാണാന്‍ സിനിമാതാരങ്ങള്‍ എത്തിയതെന്ന വിവരവും പുറത്തുവന്നിരിക്കുന്നു.
