മുംബൈ: രാജ്യത്തെ പ്രമുഖ വ്യവസായ ഗ്രൂപ്പായ അദാനി, വായ്പകൾക്കായി ആഭ്യന്തര വിപണിയെ കൂടുതലായി ആശ്രയിക്കുന്നു. ഗ്രൂപ്പിന്റെ മൊത്തം ദീർഘകാല കടം 2.6 ലക്ഷം കോടി രൂപ കവിഞ്ഞപ്പോൾ, അതിൽ 50 ശതമാനവും ഇന്ത്യൻ ബാങ്കുകളിൽ നിന്നും മറ്റ് ധനകാര്യ സ്ഥാപനങ്ങളിൽ നിന്നുമാണ്. കഴിഞ്ഞ വർഷം ഇത് 40 ശതമാനം മാത്രമായിരുന്നു. ഇതോടെ വിദേശ വായ്പകളുടെ വിഹിതം 60 ശതമാനത്തിൽ നിന്ന് 50 ശതമാനമായി കുറഞ്ഞു.
2025 ജൂണിൽ അവസാനിച്ച 12 മാസത്തിനിടെ ഗ്രൂപ്പിന്റെ മൊത്തം കടത്തിൽ 20 ശതമാനത്തിന്റെ വർധനവുണ്ടായി. റിപ്പോർട്ടുകൾ പ്രകാരം, ഇന്ത്യൻ രൂപയിലുള്ള വായ്പകളുടെ പങ്ക് വർധിച്ചപ്പോൾ ഡോളർ ബോണ്ടുകൾ വഴിയുള്ള ധനസമാഹരണം കുറഞ്ഞു.
ആഭ്യന്തര വിപണിയിൽ പലിശ നിരക്ക് കുറഞ്ഞതും, അദാനി ഗ്രൂപ്പ് കമ്പനികളുടെ ക്രെഡിറ്റ് റേറ്റിംഗ് മെച്ചപ്പെട്ടതുമാണ് ഇന്ത്യൻ ബാങ്കുകളെ കൂടുതലായി ആശ്രയിക്കാൻ കാരണം. പൊതുമേഖലാ ബാങ്കുകളിൽ നിന്നുള്ള വായ്പാ വിഹിതം 13 ശതമാനത്തിൽ നിന്ന് 18 ആയും, ബാങ്കിതര ധനകാര്യ സ്ഥാപനങ്ങളിൽ (NBFC) നിന്നുള്ള വിഹിതം 19 ശതമാനത്തിൽ നിന്ന് 25 ആയും ഉയർന്നു. അതേസമയം സ്വകാര്യ ബാങ്കുകളുടെ വിഹിതം 2 ശതമാനത്തിൽ മാറ്റമില്ലാതെ തുടരുന്നു.
കടബാധ്യത വർധിച്ചെങ്കിലും, അദാനി ഗ്രൂപ്പിന്റെ പ്രവർത്തന വരുമാനത്തിലും ലാഭത്തിലും ശക്തമായ വളർച്ചയുണ്ട്. 2025 സാമ്പത്തിക വർഷത്തിൽ ഗ്രൂപ്പിന്റെ നികുതിക്ക് ശേഷമുള്ള ലാഭം 40,565 കോടി രൂപയായിരുന്നു. 90 ശതമാനത്തിലധികം വരുമാനവും ആസ്തികളുമായി ബന്ധിപ്പിച്ചിട്ടുള്ളതിനാൽ, ഗ്രൂപ്പിന് സുസ്ഥിരമായ പണമൊഴുക്ക് ഉറപ്പാക്കാൻ കഴിയുന്നുണ്ട്. 60,000 കോടി രൂപയുടെ കരുതൽ ധനശേഖരവും ഗ്രൂപ്പിനുണ്ട്. മൂഡീസ്, ഫിച്ച്, എസ് ആൻഡ് പി തുടങ്ങിയ ആഗോള റേറ്റിംഗ് ഏജൻസികൾ അടുത്ത കാലത്തായി അദാനി ഗ്രൂപ്പിലെ ചില കമ്പനികളുടെ റേറ്റിംഗ് ഉയർത്തിയിരുന്നു.
