മാവേലിക്കര: യാത്രക്കാർക്ക് ടിക്കറ്റ് നൽകേണ്ട കെഎസ്ആർടിസി കണ്ടക്ടർ കഞ്ചാവ് വിൽപനക്കിടെ എക്സൈസ് പിടിയിൽ. ഹരിപ്പാട് ഡിപ്പോയിലെ കണ്ടക്ടറായ ഭരണിക്കാവ് പള്ളിക്കൽ സ്വദേശി ജിതിൻ കൃഷ്ണ(35)യെയാണ് ആലപ്പുഴ എക്സൈസ് സ്പെഷൽ സ്ക്വാഡ് അറസ്റ്റ് ചെയ്തത്. ഇയാളിൽ നിന്ന് 1.286 കിലോഗ്രാം കഞ്ചാവ് പിടിച്ചെടുത്തു.
ജിതിൻ കഞ്ചാവ് വിൽപന നടത്തുന്നതായി എക്സൈസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ഒരു മാസത്തോളമായി ഇയാൾ നിരീക്ഷണത്തിലായിരുന്നു. ബുധനാഴ്ച പുലർച്ചെ മാവേലിക്കര മൂന്നാംകുറ്റിക്ക് സമീപം ആലിൻചുവട് ജംക്‌ഷനിൽ വാഹനപരിശോധന നടത്തുന്നതിനിടെയാണ് ജിതിൻ വലയിലായത്. 2010 മുതൽ കെഎസ്ആർടിസിയിൽ കണ്ടക്ടറായി ജോലി ചെയ്തുവരികയായിരുന്നു ഇയാൾ.
ആലപ്പുഴ എക്സൈസ് സ്പെഷൽ സ്ക്വാഡ് സർക്കിൾ ഇൻസ്പെക്ടർ എ. സെബാസ്റ്റ്യൻ്റെ നേതൃത്വത്തിലായിരുന്നു അറസ്റ്റ്. പ്രിവന്റീവ് ഓഫിസർമാരായ സി.പി.സാബു, എം.റെനി, ബി.അഭിലാഷ്, പി.അനിലാൽ, ടി.ജിയേഷ്, കെ.ആർ.രാജീവ്, സിവിൽ എക്സൈസ് ഓഫിസർമാരായ സാജൻ ജോസഫ്, സുലേഖ, ഭാഗ്യനാഥ് എന്നിവരും അന്വേഷണ സംഘത്തിലുണ്ടായിരുന്നു. പ്രതിയെ മാവേലിക്കര മജിസ്ട്രേട്ട് കോടതിയിൽ ഹാജരാക്കി റിമാൻഡ് ചെയ്തു.
