ന്യൂഡൽഹി: അഞ്ച് വർഷത്തെ നീണ്ട ഇടവേളയ്ക്ക് ശേഷം ഇന്ത്യയും ചൈനയും തമ്മിലുള്ള നേരിട്ടുള്ള വിമാന സർവീസുകൾ അടുത്ത മാസം മുതൽ പുനരാരംഭിച്ചേക്കുമെന്ന് റിപ്പോർട്ട്.
ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിൽ പുതിയ അധ്യായം കുറിക്കുന്ന ഈ നീക്കം, നിലവിലെ ആഗോള രാഷ്ട്രീയ സാഹചര്യത്തിൽ ഏറെ പ്രാധാന്യത്തോടെയാണ് വിലയിരുത്തപ്പെടുന്നത്. ചൈനയിൽ ഈ മാസം അവസാനം നടക്കുന്ന ഷാങ്ഹായ് കോ-ഓപ്പറേഷൻ ഓർഗനൈസേഷൻ (SCO) ഉച്ചകോടിയിൽ ഇത് സംബന്ധിച്ച ഔദ്യോഗിക പ്രഖ്യാപനം ഉണ്ടായേക്കുമെന്നും ബ്ലൂംബെർഗ് റിപ്പോർട്ട് ചെയ്യുന്നു.
കോവിഡ് മഹാമാരിയെ തുടർന്നാണ് ഇരു രാജ്യങ്ങളും തമ്മിലുള്ള വിമാന സർവീസുകൾ പൂർണ്ണമായി നിർത്തിവെച്ചത്. നിലവിൽ ഹോങ്കോംഗ്, സിംഗപ്പൂർ തുടങ്ങിയ രാജ്യങ്ങൾ വഴിയാണ് യാത്രക്കാർ ഇരുവശത്തേക്കും സഞ്ചരിക്കുന്നത്. ഏത് നിമിഷവും ചൈനയിലേക്ക് സർവീസ് നടത്താൻ തയ്യാറായിരിക്കാൻ ഇന്ത്യൻ വിമാനക്കമ്പനികൾക്ക് നിർദ്ദേശം ലഭിച്ചതായും റിപ്പോർട്ടിൽ പറയുന്നു.
മാറുന്ന ആഗോള രാഷ്ട്രീയം
റഷ്യയിൽ നിന്ന് എണ്ണ വാങ്ങുന്നതിന്റെ പേരിൽ യുഎസ് പ്രസിഡന്റ് ഡൊണാൾഡ് ട്രംപ് ഇന്ത്യക്ക് മേൽ കടുത്ത ഇറക്കുമതി തീരുവ ചുമത്തിയതിന് പിന്നാലെയാണ് ഈ നിർണായക നീക്കം എന്നത് ശ്രദ്ധേയമാണ്. യുഎസ് നടപടിക്കെതിരെ ഇന്ത്യയെ പരസ്യമായി പിന്തുണച്ച് ചൈന രംഗത്തെത്തിയിരുന്നു.
“ഇന്ത്യയുടെ പരമാധികാരം വിലപേശാനുള്ളതല്ലെന്നും, വിദേശനയ തീരുമാനങ്ങളെ മറ്റ് രാജ്യങ്ങൾക്ക് സ്വാധീനിക്കാനാവില്ലെന്നും” ആയിരുന്നു ചൈനയുടെ പ്രതികരണം. ഇന്ത്യയെ ആനയായും യുഎസ് താരിഫിനെ ബേസ്ബോൾ ബാറ്റായും ചിത്രീകരിക്കുന്ന ഒരു കാർട്ടൂണും ചൈനീസ് എംബസി വക്താവ് പങ്കുവെച്ചിരുന്നു. യുഎസ് സമ്മർദ്ദം ഇന്ത്യയെ റഷ്യയുമായും ചൈനയുമായും കൂടുതൽ അടുപ്പിക്കുന്നു എന്നതിന്റെ വ്യക്തമായ സൂചനയായാണ് ഈ സംഭവവികാസങ്ങൾ വിലയിരുത്തപ്പെടുന്നത്.
വാഷിംഗ്ടൺ സർവീസ് നിർത്തി എയർ ഇന്ത്യ
ചൈനയിലേക്കുള്ള സർവീസുകൾ പുനരാരംഭിക്കുന്നു എന്ന വാർത്ത വന്നതിന് തൊട്ടുപിന്നാലെ, ഡൽഹിയിൽ നിന്ന് വാഷിംഗ്ടണിലേക്കുള്ള നോൺ-സ്റ്റോപ്പ് സർവീസ് സെപ്റ്റംബർ 1 മുതൽ താൽക്കാലികമായി നിർത്തുകയാണെന്ന് എയർ ഇന്ത്യ പ്രഖ്യാപിച്ചതും ശ്രദ്ധേയമായി. 26 ബോയിംഗ് 787-8 വിമാനങ്ങളുടെ അറ്റകുറ്റപ്പണികൾ നടക്കുന്നതിനാൽ വിമാനങ്ങളുടെ ലഭ്യത കുറഞ്ഞതാണ് കാരണമെന്നാണ് എയർ ഇന്ത്യയുടെ ഔദ്യോഗിക വിശദീകരണം. എങ്കിലും, ഈ തീരുമാനത്തിന്റെ സമയവും അന്താരാഷ്ട്ര തലത്തിൽ ചർച്ചയായിട്ടുണ്ട്.
