തിരുവനന്തപുരം: സംസ്ഥാനത്ത് വെളിച്ചെണ്ണയുടെ വില കുത്തനെ ഉയർന്നതോടെ വിപണിയിൽ വ്യാജ വെളിച്ചെണ്ണയുടെ ഒഴുക്ക് വർധിക്കുന്നതായി റിപ്പോർട്ട്. ഇതേത്തുടർന്ന് ഭക്ഷ്യസുരക്ഷാ വകുപ്പ് “ഓപ്പറേഷൻ നാളികേര” എന്ന പേരിൽ സംസ്ഥാന വ്യാപകമായി പരിശോധനകൾ കർശനമാക്കി. വില വർധനവിന്റെ മറവിൽ ഉപഭോക്താക്കളെ കബളിപ്പിച്ച് ലാഭം കൊയ്യുന്ന സംഘങ്ങളെ പിടികൂടാനാണ് ഭക്ഷ്യസുരക്ഷാ വകുപ്പിന്റെ ഈ നീക്കം.
എന്തൊക്കെയാണ് മായം ചേർക്കുന്നത്?
വില കുറഞ്ഞ പാം കെർണൽ ഓയിൽ, നിറവും മണവുമില്ലാത്ത പെട്രോളിയം ഉൽപ്പന്നമായ ലിക്വിഡ് പാരഫിൻ (മിനറൽ ഓയിൽ), ശുദ്ധീകരിച്ച കരിഓയിൽ എന്നിവയാണ് വെളിച്ചെണ്ണയിൽ പ്രധാനമായും മായം ചേർക്കാൻ ഉപയോഗിക്കുന്നത്. ഹോട്ടലുകളിൽ ഉപയോഗിച്ച് കഴിഞ്ഞ എണ്ണ ശേഖരിച്ച് രാസവസ്തുക്കൾ ചേർത്ത് വീണ്ടും വിപണിയിലെത്തിക്കുന്ന സംഘങ്ങളും സജീവമാണ്. തമിഴ്‌നാട്ടിലെ കാങ്കയം പോലുള്ള കേന്ദ്രങ്ങളിൽ നിന്ന് കിലോയ്ക്ക് 85 രൂപയ്ക്ക് വരെ ലഭിക്കുന്ന കൃത്രിമ എണ്ണകൾ, 80 ശതമാനം വരെ വെളിച്ചെണ്ണയിൽ കലർത്തിയാണ് വിൽക്കുന്നതെന്നും റിപ്പോർട്ടുകളുണ്ട്.
സർക്കാർ പരിശോധന ഇങ്ങനെ
ഭക്ഷ്യസുരക്ഷാ വകുപ്പ് ഉദ്യോഗസ്ഥർ നിർമ്മാണ യൂണിറ്റുകളിൽ നിന്നും കടകളിൽ നിന്നും വെളിച്ചെണ്ണയുടെ സാംപിളുകൾ ശേഖരിച്ച് സർക്കാർ ലാബുകളിൽ വിശദമായ പരിശോധനയ്ക്ക് അയക്കും. സപ്പോണിഫിക്കേഷൻ മൂല്യം, ആസിഡ് മൂല്യം, അയഡിൻ മൂല്യം എന്നിവയിലെ വ്യതിയാനങ്ങൾ പരിശോധിച്ചാണ് മായം കണ്ടെത്തുന്നത്. ശുദ്ധമായ വെളിച്ചെണ്ണയ്ക്ക് നിശ്ചിത മാനദണ്ഡങ്ങളുണ്ട്. ഈ മാനദണ്ഡങ്ങൾ പാലിക്കാത്ത ഉൽപ്പന്നങ്ങൾ വിൽക്കുന്ന കമ്പനികൾക്കെതിരെ കർശന നടപടികൾ സ്വീകരിക്കും.
മായം കണ്ടെത്താം വീട്ടിൽ തന്നെ: ഇതാ ഫ്രിഡ്ജ് ടെസ്റ്റ്
വാങ്ങുന്ന വെളിച്ചെണ്ണയിൽ മായമുണ്ടോ എന്ന് ഉപഭോക്താക്കൾക്ക് വീട്ടിൽ തന്നെ എളുപ്പത്തിൽ കണ്ടെത്താം. ഫുഡ് സേഫ്റ്റി ആൻഡ് സ്റ്റാൻഡേർഡ് അതോറിറ്റി ഓഫ് ഇന്ത്യ (FSSAI) നിർദേശിക്കുന്ന ലളിതമായ പരിശോധന ഇതാ:
- സുതാര്യമായ ഒരു ഗ്ലാസിൽ അല്പം വെളിച്ചെണ്ണ എടുക്കുക.
- ഈ ഗ്ലാസ് 30 മിനിറ്റ് നേരം ഫ്രിഡ്ജിൽ വെക്കുക (ഫ്രീസറിൽ വെക്കരുത്).
- 30 മിനിറ്റിന് ശേഷം പുറത്തെടുത്ത് പരിശോധിക്കുക.
ഫലം: ശുദ്ധമായ വെളിച്ചെണ്ണയാണെങ്കിൽ, അത് പൂർണ്ണമായും കട്ടിപിടിച്ച് ഇളം വെള്ള നിറത്തിലായിട്ടുണ്ടാകും. മായം ചേർത്തിട്ടുണ്ടെങ്കിൽ, കട്ടിയായ വെളിച്ചെണ്ണയ്ക്ക് മുകളിൽ മറ്റ് എണ്ണകൾ പ്രത്യേക പാളിയായി തെളിഞ്ഞുകാണാം. ഇത് വഴി വെളിച്ചെണ്ണയുടെ ശുദ്ധി ഉറപ്പുവരുത്താൻ സാധിക്കും.
പരാതി എവിടെ അറിയിക്കണം?
വെളിച്ചെണ്ണയുടെ ഗുണനിലവാരത്തിൽ സംശയം തോന്നുകയോ മായം ശ്രദ്ധയിൽപ്പെടുകയോ ചെയ്താൽ ഭക്ഷ്യ സുരക്ഷാ വകുപ്പിന്റെ ടോൾ ഫ്രീ നമ്പറായ 1800 425 1125 എന്ന നമ്പറിൽ വിളിച്ച് പരാതി അറിയിക്കാവുന്നതാണ്.
