പാകിസ്താൻ കരഞ്ഞുപറഞ്ഞു; നെഹ്റുവിന്റെ മണ്ടത്തരം തിരുത്തി: ആഞ്ഞടിച്ച് പ്രധാനമന്ത്രി

ന്യൂഡൽഹി: ‘ഓപ്പറേഷൻ സിന്ദൂർ’ ചർച്ചയ്ക്ക് ലോക്സഭയിൽ മറുപടി നൽകി പ്രധാനമന്ത്രി നരേന്ദ്ര മോദി. ഇന്ത്യയുടെ ആക്രമണം താങ്ങാനാവാതെ പാകിസ്താൻ സൈന്യം “ബസ് കരോ, ബഹുത് മാരാ…” (നിർത്തൂ, ഒരുപാട് അടിച്ചു…) എന്ന് ഇന്ത്യൻ ഡി.ജി.എം.ഒയോട് കരഞ്ഞുപറഞ്ഞുവെന്ന് പ്രധാനമന്ത്രി വെളിപ്പെടുത്തി. യു.എസ്. മധ്യസ്ഥത വഹിച്ചെന്ന പ്രതിപക്ഷ വാദങ്ങളെ തള്ളിയ പ്രധാനമന്ത്രി, നെഹ്റുവിന്റെ കാലത്തുണ്ടായ “വൻ മണ്ടത്തരം” തന്റെ സർക്കാർ തിരുത്തിയെന്നും, പ്രതിപക്ഷത്തെ രൂക്ഷമായി പരിഹസിക്കുകയും ചെയ്തു.

ഓപ്പറേഷൻ സിന്ദൂർ സംബന്ധിച്ച പ്രധാനമന്ത്രിയുടെ പ്രസംഗത്തിലെ 5 പ്രധാന കാര്യങ്ങൾ:

1. ട്രംപിന്റെ അവകാശവാദങ്ങൾക്ക് മറുപടി ഓപ്പറേഷൻ നിർത്താൻ ഒരു ലോക നേതാവും ഇന്ത്യയോട് ആവശ്യപ്പെട്ടിട്ടില്ലെന്ന് പ്രധാനമന്ത്രി തറപ്പിച്ചുപറഞ്ഞു. “മെയ് 9-ന് രാത്രി യു.എസ്. വൈസ് പ്രസിഡന്റ് ജെ.ഡി. വാൻസ് വിളിച്ച് പാകിസ്താൻ വലിയൊരു ആക്രമണത്തിന് തയ്യാറെടുക്കുകയാണെന്ന് മുന്നറിയിപ്പ് നൽകി. അതാണ് പാകിസ്താന്റെ പദ്ധതിയെങ്കിൽ അവർ വലിയ വില നൽകേണ്ടി വരുമെന്നും, വെടിയുണ്ടകൾക്ക് പകരം പീരങ്കിയുണ്ടകൾ കൊണ്ട് മറുപടി നൽകുമെന്നും ഞാൻ അദ്ദേഹത്തോട് പറഞ്ഞു,” മോദി വ്യക്തമാക്കി.

2. പാകിസ്താൻ മുട്ടുമടക്കി ഇന്ത്യൻ സേന പാകിസ്താനെ ഒരിക്കലും മറക്കാത്ത പാഠം പഠിപ്പിച്ചു. ഇന്ത്യയുടെ തിരിച്ചടിയിൽ പാകിസ്താൻ മുട്ടുമടക്കി. പാകിസ്താൻ തൊടുത്തുവിട്ട ആയിരത്തോളം ഡ്രോണുകളും മിസൈലുകളും ഇന്ത്യ പാതിവഴിയിൽ തകർത്തുവെന്നും അദ്ദേഹം കൂട്ടിച്ചേർത്തു.

3. നെഹ്റുവിന്റെ മണ്ടത്തരം തിരുത്തി പഹൽഗാം ഭീകരാക്രമണത്തിന് ശേഷം, ജവഹർലാൽ നെഹ്റു ഒപ്പുവെച്ച സിന്ധു നദീജല കരാർ തന്റെ സർക്കാർ നിർത്തിവെച്ചതായി പ്രധാനമന്ത്രി പ്രഖ്യാപിച്ചു. “ഇന്ത്യയുടെ താൽപര്യങ്ങൾ പണയം വെക്കുന്നത് കോൺഗ്രസിന്റെ പഴയ ശീലമാണ്. ഇന്ത്യയിൽ നിന്ന് ഉത്ഭവിക്കുന്ന നദികളിലെ 80% ജലവും പാകിസ്താന് നൽകിയ നെഹ്റുവിന്റെ നടപടി എന്ത് തരം നയതന്ത്രമാണ്? രക്തവും വെള്ളവും ഒരുമിച്ച് ഒഴുകില്ലെന്ന് ഇന്ത്യ ഉറച്ച നിലപാടെടുത്തു,” മോദി പറഞ്ഞു.

4. കോൺഗ്രസിനെതിരെ പരിഹാസം ഓപ്പറേഷൻ സിന്ദൂർ ചർച്ചയിൽ ശശി തരൂർ, മനീഷ് തിവാരി തുടങ്ങിയ നേതാക്കളെ സംസാരിക്കാൻ അനുവദിക്കാത്തതിനെയും പ്രധാനമന്ത്രി പരിഹസിച്ചു. “കോൺഗ്രസിലെ ചില വലിയ നേതാക്കൾക്ക് ഇന്ത്യയുടെ നിലപാട് ലോകത്തിന് മുന്നിൽ അവതരിപ്പിച്ചതിൽ വേദനയുണ്ട്. ഒരുപക്ഷേ ചിലരെ പാർലമെന്റിൽ സംസാരിക്കുന്നതിൽ നിന്ന് വിലക്കിയിരിക്കാം,” അദ്ദേഹം പറഞ്ഞു.

5. പ്രതിപക്ഷത്തിന്റെ ഇരട്ടത്താപ്പ് സൈനിക നടപടികളെ എതിർക്കാൻ പ്രതിപക്ഷം ഓരോ തവണയും ഓരോ കാരണം കണ്ടെത്തുകയാണെന്ന് പ്രധാനമന്ത്രി കുറ്റപ്പെടുത്തി. “ഭീകരർ കരയുന്നു, അവരുടെ യജമാനന്മാർ കരയുന്നു, അതുകണ്ട് ഇവിടെ ചിലരും കരയുന്നു. സർജിക്കൽ സ്ട്രൈക്കിന്റെ സമയത്ത് ഒരു കളി കളിച്ചു, അത് നടന്നില്ല. വ്യോമാക്രമണത്തിന്റെ സമയത്ത് വേറൊരു കളി. അതും നടന്നില്ല. ഇപ്പോൾ ഓപ്പറേഷൻ സിന്ദൂർ നടന്നപ്പോൾ പുതിയ തന്ത്രം – ‘എന്തിന് നിർത്തി?’ എന്ന്. നിങ്ങളെ ഓർത്ത് രാജ്യം മുഴുവൻ ചിരിക്കുകയാണ്,” മോദി പറഞ്ഞു.