പഹൽഗാം ഭീകരരെ വധിച്ചു; തെളിവുകൾ നിരത്തി ലോക്‌സഭയിൽ അമിത് ഷാ
ന്യൂഡൽഹി: ഏപ്രിൽ 22-ന് പഹൽഗാമിൽ ഭീകരാക്രമണം നടത്തിയ മൂന്ന് പാകിസ്താനി ഭീകരരെയും സൈന്യം വധിച്ചതായി കേന്ദ്ര ആഭ്യന്തരമന്ത്രി അമിത് ഷാ ലോക്‌സഭയിൽ സ്ഥിരീകരിച്ചു. ‘ഓപ്പറേഷൻ സിന്ദൂർ’ സംബന്ധിച്ച പ്രത്യേക ചർച്ചയിൽ സംസാരിക്കവെ, ഭീകരരുടെ ഉത്ഭവം ചോദ്യം ചെയ്ത പ്രതിപക്ഷത്തിനെതിരെ ആഞ്ഞടിച്ച അമിത് ഷാ, പാകിസ്താന് ക്ലീൻ ചിറ്റ് നൽകാനുള്ള ഗൂഢാലോചനയാണ് നടക്കുന്നതെന്നും രൂക്ഷമായി വിമർശിച്ചു.
ശ്രീനഗറിന് സമീപം ദച്ചിഗാം വനമേഖലയിൽ തിങ്കളാഴ്ച ‘ഓപ്പറേഷൻ മഹാദേവി’ലൂടെ വധിച്ച ഭീകരർ തന്നെയാണ് പഹൽഗാം ആക്രമണത്തിന് പിന്നിലെന്ന് അമിത് ഷാ വ്യക്തമാക്കി. ലഷ്കർ കമാൻഡറായ സുലൈമാൻ എന്ന ഫൈസൽ, അഫ്ഗാൻ, ജിബ്രാൻ എന്നിവരാണ് കൊല്ലപ്പെട്ടതെന്നും ഇവർ പാകിസ്താനിൽ നിന്നുള്ളവരാണെന്നും അദ്ദേഹം വ്യക്തമാക്കി.
തെളിവുകൾ നിരത്തി, പ്രതിപക്ഷത്തിനെതിരെ ആഞ്ഞടിച്ച് അമിത് ഷാ
ഭീകരർ പാകിസ്താനിൽ നിന്നാണോ എന്ന് സംശയം പ്രകടിപ്പിച്ച മുൻ ആഭ്യന്തരമന്ത്രി പി. ചിദംബരത്തിന്റെ പേരെടുത്ത് പറഞ്ഞായിരുന്നു അമിത് ഷായുടെ വിമർശനം. “അവർ പാകിസ്താനിൽ നിന്നാണെന്നതിന് ഞങ്ങളുടെ പക്കൽ തെളിവുണ്ട്. അവരുടെ വോട്ടർ നമ്പറുകൾ പോലുമുണ്ട്. കൊല്ലപ്പെട്ട ഭീകരരിൽ നിന്ന് കണ്ടെടുത്ത ചോക്ലേറ്റുകൾ പോലും പാകിസ്താനിൽ നിർമ്മിച്ചതാണ്. എന്നിട്ടും അവർ പാകിസ്താനിൽ നിന്നല്ലെന്ന് പറയുമ്പോൾ, ഒരു മുൻ ആഭ്യന്തരമന്ത്രി പാകിസ്താന് ക്ലീൻ ചിറ്റ് നൽകുകയാണ്. പാകിസ്താനെ രക്ഷിക്കാനുള്ള ഈ ഗൂഢാലോചന 130 കോടി ഇന്ത്യക്കാർക്ക് മുന്നിൽ തുറന്നുകാട്ടപ്പെട്ടിരിക്കുന്നു,” അമിത് ഷാ പറഞ്ഞു.
പഹൽഗാം ആക്രമണ സ്ഥലത്തുനിന്ന് ലഭിച്ച വെടിയുണ്ടകളും കൊല്ലപ്പെട്ട ഭീകരരിൽ നിന്ന് പിടിച്ചെടുത്ത തോക്കുകളും (ഒരു എം9 അമേരിക്കൻ റൈഫിളും രണ്ട് എ.കെ-47 തോക്കുകളും) ചണ്ഡീഗഡിലെ ഫോറൻസിക് ലാബിൽ നടത്തിയ ബാലിസ്റ്റിക് പരിശോധനയിൽ 100 ശതമാനവും യോജിച്ചതായി ആറ് വിദഗ്ധർ സാക്ഷ്യപ്പെടുത്തിയ റിപ്പോർട്ടും അമിത് ഷാ സഭയിൽ ഉയർത്തിക്കാട്ടി.
ഓപ്പറേഷൻ സിന്ദൂരിലൂടെ സൂത്രധാരന്മാരെയും വധിച്ചു
പഹൽഗാമിൽ ആക്രമണം നടത്തിയ ഭീകരരെ മാത്രമല്ല, അവരെ അയച്ച സൂത്രധാരന്മാരെയും ‘ഓപ്പറേഷൻ സിന്ദൂർ’ വഴി ഇല്ലാതാക്കിയതായി അമിത് ഷാ പ്രഖ്യാപിച്ചു. “ആക്രമണം നടന്നയുടൻ ഭീകരർ പാകിസ്താനിലേക്ക് രക്ഷപ്പെടാതിരിക്കാൻ ഇന്ത്യൻ ആർമി, സി.ആർ.പി.എഫ്, ജമ്മു കശ്മീർ പോലീസ് എന്നിവർ ചേർന്ന് സുരക്ഷാ വലയം തീർത്തിരുന്നു. ഭീകരർക്ക് അഭയം നൽകിയ ബഷീർ, പർവേസ് എന്നിവരെ മെയ് 22-ന് പിടികൂടി. ഇവരുടെ മൊഴിയുടെ അടിസ്ഥാനത്തിലാണ് ഭീകരരെ തിരിച്ചറിഞ്ഞതും ജൂലൈ 28-ന് ഓപ്പറേഷനിലൂടെ വധിച്ചതും. ഭീകരരെ ഇല്ലാതാക്കിയതിൽ സഭ ഒന്നടങ്കം സന്തോഷിക്കുമെന്നാണ് കരുതിയതെന്നും” അദ്ദേഹം പറഞ്ഞു.
