ദുബായ്: കനത്ത ചൂടിനിടയിലും യുഎഇയുടെ വിവിധ ഭാഗങ്ങളിൽ മഴയും മൂടൽമഞ്ഞും. അൽ ദഫ്ര മേഖലയിലെ മെസൈറയിൽ താപനില 48 ഡിഗ്രി സെൽഷ്യസ് വരെ ഉയർന്നപ്പോഴും, രാജ്യത്ത് അസ്ഥിരമായ കാലാവസ്ഥ തുടരുകയാണ്. വാരാന്ത്യത്തിൽ കാലാവസ്ഥയിൽ വലിയ മാറ്റങ്ങൾ പ്രതീക്ഷിക്കാമെന്നും, വെള്ളി മുതൽ തിങ്കൾ വരെ മഴയും ചെറിയ ആലിപ്പഴ വർഷവും ഉണ്ടാകാൻ സാധ്യതയുണ്ടെന്നും ദേശീയ കാലാവസ്ഥാ കേന്ദ്രം (NCM) മുന്നറിയിപ്പ് നൽകി.
കാരണം ന്യൂനമർദ്ദം
ഇന്റർട്രോപ്പിക്കൽ കൺവെർജൻസ് സോണിന്റെ (ICTZ) സ്വാധീനവും, തെക്ക് നിന്നുള്ള ഉപരിതല, ഉപരിതല ന്യൂനമർദ്ദവുമാണ് കാലാവസ്ഥയിലെ ഈ മാറ്റത്തിന് കാരണമെന്ന് എൻസിഎം പുറത്തിറക്കിയ ജാഗ്രതാ നിർദ്ദേശത്തിൽ പറയുന്നു. അറേബ്യൻ കടലിൽ നിന്നും ഒമാൻ ഉൾക്കടലിൽ നിന്നും ഈർപ്പമുള്ള കാറ്റ് യുഎഇയിലേക്ക് വീശുന്നതും മഴമേഘങ്ങൾ രൂപപ്പെടാൻ കാരണമാകും.
മഴ എവിടെയൊക്കെ?
വെള്ളിയാഴ്ച (ജൂലൈ 25) മുതൽ തിങ്കളാഴ്ച (ജൂലൈ 28) വരെ രാജ്യത്തിന്റെ കിഴക്കൻ, തെക്കൻ മേഖലകളിലും ചില ഉൾപ്രദേശങ്ങളിലും മഴ ലഭിക്കുമെന്നാണ് പ്രവചനം. വിവിധ തീവ്രതയിലുള്ള മഴയോടൊപ്പം, ഇടിമിന്നലും ചിലപ്പോൾ ചെറിയ ആലിപ്പഴ വർഷവും പ്രതീക്ഷിക്കാം.
