ന്യൂഡൽഹി: ബജറ്റ് എയർലൈനായ സ്പൈസ്ജെറ്റും മുൻ പ്രൊമോട്ടറായ കലാനിധി മാരനും തമ്മിലുള്ള ദീർഘകാല നിയമപോരാട്ടത്തിൽ സ്പൈസ്ജെറ്റിന് നിർണായക വിജയം. 1,300 കോടി രൂപയിലധികം നഷ്ടപരിഹാരം ആവശ്യപ്പെട്ട് കലാനിധി മാരനും അദ്ദേഹത്തിന്റെ കമ്പനിയായ KAL എയർവേയ്‌സും നൽകിയ അപ്പീൽ സുപ്രീം കോടതി തള്ളി. ഡൽഹി ഹൈക്കോടതിയുടെ മുൻ വിധി ശരിവെച്ചുകൊണ്ടാണ് സുപ്രീം കോടതിയുടെ ഈ നടപടി. ഈ വാർത്ത പുറത്തുവന്നതിന് പിന്നാലെ സ്പൈസ്ജെറ്റിന്റെ ഓഹരി വിലയിൽ 2.7% വർധനവുണ്ടായി.
ഹൈക്കോടതിയുടെ രൂക്ഷ വിമർശനം
“ന്യായവിധി അനുകൂലമായാൽ മാത്രം സ്വീകരിക്കാം എന്ന രീതിയിലുള്ള ഒരു ചൂതാട്ടമാണ്” മാരന്റെ ഭാഗത്തുനിന്നുണ്ടായതെന്ന് നേരത്തെ ഡൽഹി ഹൈക്കോടതി രൂക്ഷമായി വിമർശിച്ചിരുന്നു. അപ്പീലുകൾ ഫയൽ ചെയ്യുന്നതിൽ മനഃപൂർവം കാലതാമസം വരുത്തിയെന്നും, വസ്തുതകൾ മറച്ചുവെച്ചുവെന്നും ചൂണ്ടിക്കാട്ടിയാണ് ഹൈക്കോടതി മാരന്റെ ഹർജി തള്ളിയത്. ഈ കണ്ടെത്തലുകൾ സുപ്രീം കോടതിയും അംഗീകരിച്ചു.
കേസിന്റെ നാൾവഴികൾ
2015 ഫെബ്രുവരിയിലാണ് കലാനിധി മാരനും കാൽ എയർവേയ്‌സും തങ്ങളുടെ 58.46% ഓഹരി പങ്കാളിത്തം സ്പൈസ്ജെറ്റിന്റെ ഇപ്പോഴത്തെ ചെയർമാനായ അജയ് സിംഗിന് കൈമാറുന്നത്. എന്നാൽ, കരാർ പ്രകാരം തനിക്ക് നൽകേണ്ടിയിരുന്ന 18 കോടി ഓഹരി വാറന്റുകൾ നൽകിയില്ലെന്ന് കാണിച്ച് 2017-ൽ മാരൻ ഡൽഹി ഹൈക്കോടതിയെ സമീപിച്ചു.
2018-ൽ, ആർബിട്രൽ ട്രിബ്യൂണൽ മാരന്റെ 1,323 കോടിയുടെ നഷ്ടപരിഹാര ആവശ്യം തള്ളുകയും, പകരം 579 കോടി രൂപയും പലിശയും തിരികെ നൽകാൻ വിധിക്കുകയും ചെയ്തു. ഇതിനെതിരെ ഇരുപക്ഷവും കോടതിയെ സമീപിക്കുകയായിരുന്നു.
സുപ്രീം കോടതി വിധി സ്പൈസ്ജെറ്റിന് വലിയ ആശ്വാസമാണ് നൽകുന്നത്. വെള്ളിയാഴ്ച വ്യാപാരം പുരോഗമിക്കവേ, 39.12 രൂപ നിലവാരത്തിലായിരുന്നു ബിഎസ്ഇയിൽ സ്പൈസ്ജെറ്റ് ഓഹരികളുടെ വ്യാപാരം.
