കോട്ടയം: സർക്കാർ, എയ്ഡഡ് സ്കൂളുകളിൽ വിദ്യാർത്ഥികളുടെ എണ്ണം കുറഞ്ഞതിനെ തുടർന്ന് നടപ്പിലാക്കിയ അധ്യാപക പുനർവിന്യാസം ഹൈസ്കൂൾ വിദ്യാർത്ഥികളുടെ പഠനത്തെ പ്രതിസന്ധിയിലാക്കുന്നു. സയൻസ്, കണക്ക് തുടങ്ങിയ പ്രധാന വിഷയങ്ങൾ പഠിപ്പിച്ചിരുന്ന അധ്യാപകർക്ക് തസ്തിക നഷ്ടപ്പെട്ട് മറ്റ് സ്കൂളുകളിലേക്ക് പോകുമ്പോൾ, പകരമെത്തുന്നത് ആ വിഷയങ്ങളിൽ വൈദഗ്ധ്യമില്ലാത്ത അധ്യാപകരാണ്. ഇത് പഠന നിലവാരത്തെ സാരമായി ബാധിക്കുന്നുവെന്ന് അധ്യാപകരും പിടിഎകളും ഒരുപോലെ പരാതിപ്പെടുന്നു.
പത്താം ക്ലാസ്സിന് ശേഷം പഠിക്കാത്ത വിഷയം പഠിപ്പിക്കണം
മറ്റൊരു വിഷയത്തിൽ ബിരുദവും ബി.എഡും നേടിയ അധ്യാപകർക്ക്, തങ്ങൾ പത്താം ക്ലാസ്സിന് ശേഷം പഠിച്ചിട്ടില്ലാത്ത സയൻസ്, കണക്ക് പോലുള്ള വിഷയങ്ങൾ ഹൈസ്കൂൾ ക്ലാസുകളിൽ ഫലപ്രദമായി പഠിപ്പിക്കാൻ കഴിയുന്നില്ല. എൽപി, യുപി ക്ലാസുകളിൽ ഇത് വലിയ പ്രശ്നമല്ലെങ്കിലും, ഹൈസ്കൂൾ തലത്തിൽ ഇത് കുട്ടികളുടെ ഭാവിയെത്തന്നെ ബാധിക്കുമെന്ന ആശങ്ക ശക്തമാണ്.
പുനർവിന്യസിക്കപ്പെടുന്ന അധ്യാപകരെ, അവരുടെ യഥാർത്ഥ വിഷയം പഠിപ്പിക്കുന്നതിനായി ആഴ്ചയിൽ രണ്ട് ദിവസമെങ്കിലും പഴയ സ്കൂളുകളിലേക്ക് (പേരന്റ് സ്കൂൾ) തിരികെ അയക്കണമെന്ന നിർദ്ദേശമാണ് അധ്യാപക സംഘടനകൾ മുന്നോട്ടുവെക്കുന്നത്.
സംഘടനാ സ്വാധീനം സുരക്ഷിത താവളം
തസ്തിക നഷ്ടപ്പെടുന്ന അധ്യാപകരിൽ പലരും, കുട്ടികൾ കൂടുതലുള്ള യുപി സ്കൂളുകളിൽ പ്രഥമാധ്യാപകരുടെ സഹായിയായ ‘ഹെഡ് ടീച്ചർ’ എന്ന തസ്തികയിലേക്കാണ് എത്തുന്നത്. സംഘടനാ സ്വാധീനമുള്ളവർക്ക് ഇതൊരു സുരക്ഷിത താവളമായി മാറുമ്പോൾ, യഥാർത്ഥത്തിൽ ദുരിതത്തിലാകുന്നത് ഹൈസ്കൂൾ വിദ്യാർത്ഥികളാണ്.
മുൻപ് ഇംഗ്ലീഷ് വിഷയത്തിലും സമാനമായ പ്രതിസന്ധിയുണ്ടായിരുന്നു. എല്ലാ സ്കൂളുകളിലും ഇംഗ്ലീഷ് അധ്യാപക തസ്തിക നിർബന്ധമാക്കണമെന്ന കോടതിവിധി വന്നതോടെയാണ് ആ പ്രശ്നത്തിന് പരിഹാരമായത്. സയൻസ് പോലുള്ള വിഷയങ്ങളിലും സ്ഥിരം അധ്യാപകരെ ഉറപ്പാക്കാൻ സർക്കാർ നിയമപരമായ ഇടപെടൽ നടത്തണമെന്ന ആവശ്യം ശക്തമാണ്.
