ന്യൂഡൽഹി: ചൈന വളം കയറ്റുമതിക്ക് നിയന്ത്രണങ്ങൾ കടുപ്പിച്ചതോടെ, രാജ്യത്തെ കർഷകർക്ക് ആശ്വാസമായി സൗദി അറേബ്യയുമായി ദീർഘകാല വളം ഇറക്കുമതി കരാറിൽ ഒപ്പുവെച്ച് ഇന്ത്യ. ഡൈ-അമോണിയം ഫോസ്ഫേറ്റ് (ഡിഎപി) വളം വിതരണം ചെയ്യുന്നതിനുള്ള കരാർ, ഇന്ത്യയുടെ ഭക്ഷ്യസുരക്ഷ ഉറപ്പാക്കുന്നതിൽ ഒരു നിർണായക ചുവടുവെപ്പാണ്.
സൗദിയിലെ പ്രമുഖ ഖനന കമ്പനിയായ ‘മാഅദെൻ’ (Ma’aden), ഇന്ത്യയിലെ ഇന്ത്യൻ പൊട്ടാഷ് ലിമിറ്റഡ് (ഐപിഎൽ), ക്രിഭ്‌കോ, കോൾ ഇന്ത്യ ലിമിറ്റഡ് എന്നീ കമ്പനികളുമായിട്ടാണ് കരാറിൽ ഒപ്പുവെച്ചത്. അഞ്ച് വർഷത്തേക്കുള്ള കരാർ പ്രകാരം, പ്രതിവർഷം 3.1 ദശലക്ഷം മെട്രിക് ടൺ ഡിഎപി വളം സൗദി ഇന്ത്യക്ക് നൽകും. ഇരു രാജ്യങ്ങൾക്കും സമ്മതമാണെങ്കിൽ, കരാർ അഞ്ച് വർഷത്തേക്ക് കൂടി നീട്ടാനും വ്യവസ്ഥയുണ്ട്.
ചൈനയെ ആശ്രയിക്കുന്നത് കുറയ്ക്കാൻ
യൂറിയ കഴിഞ്ഞാൽ ഇന്ത്യയിൽ ഏറ്റവും കൂടുതൽ ഉപയോഗിക്കുന്ന വളമാണ് ഡിഎപി. ഇതിനായി ഇന്ത്യ പ്രധാനമായും ആശ്രയിച്ചിരുന്നത് ചൈനയെയായിരുന്നു. എന്നാൽ, കഴിഞ്ഞ രണ്ട് മാസമായി ചൈന ഇന്ത്യയിലേക്കുള്ള വളം കയറ്റുമതി നിർത്തിവെച്ചിരിക്കുകയാണ്. കയറ്റുമതിക്ക് ഔദ്യോഗികമായി നിരോധനമില്ലെങ്കിലും, കയറ്റുമതിക്ക് ആവശ്യമായ നിർബന്ധിത പരിശോധനകൾ ഇന്ത്യൻ കപ്പലുകൾക്ക് ചൈനീസ് അധികൃതർ നൽകുന്നില്ല. ഇതോടെയാണ് ഇന്ത്യ പ്രതിസന്ധിയിലായത്.
ചൈനയിൽ നിന്നുള്ള ഇറക്കുമതി നിലച്ചതോടെ, യൂറോപ്പ്, റഷ്യ, പശ്ചിമേഷ്യ എന്നിവിടങ്ങളിൽ നിന്ന് 15-20% വരെ ഉയർന്ന വില നൽകിയാണ് ഇന്ത്യൻ കമ്പനികൾ അസംസ്കൃത വസ്തുക്കൾ ഇറക്കുമതി ചെയ്തിരുന്നത്.
തന്ത്രപരമായ സൗഹൃദം
“ചില രാജ്യങ്ങൾ വളം വിതരണത്തിൽ നിയന്ത്രണങ്ങൾ കാണിക്കുന്ന ഈ സമയത്ത്, റിയാദിന്റെ ഈ സഹായം ഇന്ത്യയുടെ സുഹൃത്തുക്കളും പങ്കാളികളും നമ്മളോടൊപ്പം ചേർന്ന് പ്രവർത്തിക്കുന്നു എന്നതിന്റെ തെളിവാണ്,” എന്ന് ഒരു മുതിർന്ന സർക്കാർ ഉദ്യോഗസ്ഥൻ പറഞ്ഞു.
കേന്ദ്ര രാസവള മന്ത്രി ജെ.പി. നദ്ദയുടെ സൗദി സന്ദർശനത്തിനിടെയാണ് സുപ്രധാനമായ ഈ കരാറുകൾ ഒപ്പുവെച്ചത്. ഡിഎപിക്ക് പുറമെ, യൂറിയ പോലുള്ള മറ്റ് പ്രധാന വളങ്ങളുടെ കാര്യത്തിലും സഹകരണം വ്യാപിപ്പിക്കാൻ ഇരു രാജ്യങ്ങളും തമ്മിൽ ചർച്ചകൾ നടന്നു.
