മാരുതിക്ക് ക്ഷീണം, വിൽപ്പനയിൽ 13% ഇടിവ്; സ്വിഫ്റ്റും ബലേനോയും പിന്നോട്ട്, ഡിസയർ ഒന്നാമത്

ന്യൂഡൽഹി: രാജ്യത്തെ ഏറ്റവും വലിയ കാർ നിർമ്മാതാക്കളായ മാരുതി സുസുക്കിക്ക് 2025 ജൂൺ മാസത്തിലെ വിൽപ്പനയിൽ തിരിച്ചടി. മുൻ വർഷം ഇതേ മാസത്തെ അപേക്ഷിച്ച് 13 ശതമാനത്തിന്റെ ഇടിവാണ് കമ്പനിയുടെ ആകെ വിൽപ്പനയിൽ രേഖപ്പെടുത്തിയത്. സ്വിഫ്റ്റ്, ബലേനോ, ഗ്രാൻഡ് വിറ്റാര തുടങ്ങിയ ജനപ്രിയ മോഡലുകളുടെ വിൽപ്പനയിലുണ്ടായ വലിയ കുറവാണ് ഇതിന് പ്രധാന കാരണം. അതേസമയം, സെഡാൻ മോഡലായ ഡിസയർ മികച്ച പ്രകടനം കാഴ്ചവെച്ച് മാരുതിയുടെ ബെസ്റ്റ് സെല്ലറായി മാറി.

2025 ജൂണിൽ 1,18,906 യൂണിറ്റ് കാറുകളാണ് മാരുതി ഇന്ത്യയിൽ വിറ്റത്. 2024 ജൂണിൽ ഇത് 1,37,160 യൂണിറ്റായിരുന്നു.

ഡിസയർ ഒന്നാമത്, ബ്രെസയും എർട്ടിഗയും പിന്നാലെ

കഴിഞ്ഞ മാസം മാരുതിയുടെ ഏറ്റവും കൂടുതൽ വിറ്റഴിഞ്ഞ മോഡൽ ഡിസയറാണ്. 15,484 യൂണിറ്റുകളാണ് നിരത്തിലിറങ്ങിയത്, ഇത് മുൻ വർഷത്തെ അപേക്ഷിച്ച് 15% വളർച്ചയാണ്. കോംപാക്ട് എസ്‌യുവി ബ്രെസ 14,507 യൂണിറ്റുകളുമായി രണ്ടാം സ്ഥാനത്തും, എംപിവി എർട്ടിഗ 14,151 യൂണിറ്റുകളുമായി മൂന്നാം സ്ഥാനത്തുമെത്തി. ബ്രെസ 10% വളർച്ച നേടിയപ്പോൾ, എർട്ടിഗയുടെ വിൽപ്പനയിൽ 11% ഇടിവുണ്ടായി.

വിൽപ്പന ഇടിഞ്ഞ പ്രമുഖർ

മാരുതിയുടെ എക്കാലത്തെയും ജനപ്രിയ മോഡലുകളായ സ്വിഫ്റ്റിനും ബലേനോയ്ക്കും ഈ മാസം കനത്ത തിരിച്ചടിയാണ് നേരിട്ടത്.

• ബലേനോ: വിൽപ്പനയിൽ 40% ഇടിവ്.
• ആൾട്ടോ: 35% ഇടിവ്.
• ഗ്രാൻഡ് വിറ്റാര: 29% ഇടിവ്.
• സ്വിഫ്റ്റ്: 19% ഇടിവ്.

മാരുതി സുസുക്കി മോഡൽ തിരിച്ചുള്ള വിൽപ്പനക്കണക്ക് (ജൂൺ 2025)

വിപണിയിലെ ആധിപത്യം തുടരുമ്പോഴും, പ്രധാന മോഡലുകളുടെ വിൽപ്പനയിലെ ഇടിവ് മാരുതിക്ക് ആശങ്കയുണ്ടാക്കുന്നതാണ്. 2025 സെപ്റ്റംബറോടെ തങ്ങളുടെ ആദ്യ ഇലക്ട്രിക് കാറായ ‘ഇ-വിറ്റാര’ പുറത്തിറക്കി വിപണിയിൽ പുതിയൊരു തരംഗം സൃഷ്ടിക്കാമെന്ന പ്രതീക്ഷയിലാണ് കമ്പനി.