എഡ്ജ്ബാസ്റ്റൺ: ഇംഗ്ലണ്ടിനെതിരായ രണ്ടാം ടെസ്റ്റിൽ ഇന്ത്യയെ വിജയത്തിലേക്ക് നയിച്ച തകർപ്പൻ പ്രകടനത്തിന് ശേഷവും ഇന്ത്യൻ നായകൻ ശുഭ്മാൻ ഗില്ലിന് ബിസിസിഐയിൽ നിന്ന് കനത്ത താക്കീത് ലഭിക്കാൻ സാധ്യത. മത്സരത്തിൽ ഇരട്ട സെഞ്ചുറിയും സെഞ്ചുറിയും നേടി ടീമിന്റെ വിജയശില്പിയായെങ്കിലും, കളിക്കളത്തിലെ ഒരു ചെറിയ പിഴവാണ് ഗില്ലിന് വിനയായത്.
എഡ്ജ്ബാസ്റ്റൺ ടെസ്റ്റിന്റെ ആദ്യ ഇന്നിംഗ്‌സിൽ 269 റൺസും രണ്ടാം ഇന്നിംഗ്‌സിൽ 161 റൺസും നേടിയ ഗിൽ, രണ്ടാം ഇന്നിംഗ്‌സ് ഡിക്ലയർ ചെയ്യാനായി പവലിയനിൽ നിന്ന് പുറത്തേക്ക് വന്നപ്പോൾ ധരിച്ചിരുന്നത് ‘നൈക്കി’ (Nike) ബ്രാൻഡിന്റെ ടൈറ്റ്സ് ആയിരുന്നു. ഇന്ത്യൻ ടീമിന്റെ ഔദ്യോഗിക കിറ്റ് സ്പോൺസർമാർ ‘അഡിഡാസ്’ (Adidas) ആണ്, കരാർ പ്രകാരം കളിക്കാർ അഡിഡാസിന്റെ ഉൽപ്പന്നങ്ങൾ മാത്രമേ ധരിക്കാൻ പാടുള്ളൂ.
തിടുക്കത്തിൽ സംഭവിച്ച പിഴവാകാം ഇതെന്നാണ് കരുതപ്പെടുന്നത്. എങ്കിലും, സ്പോൺസർഷിപ്പ് നിയമങ്ങൾ ലംഘിച്ചതിന് ബിസിസിഐ ഗില്ലിനോട് വിശദീകരണം ചോദിച്ച് കാരണം കാണിക്കൽ നോട്ടീസ് നൽകാൻ സാധ്യതയുണ്ട്.
അഡിഡാസിന് എന്ത് നടപടി എടുക്കാം?
2023 മെയ് മാസത്തിൽ ബിസിസിഐയും അഡിഡാസും തമ്മിൽ 250 കോടി രൂപയുടെ സ്പോൺസർഷിപ്പ് കരാറിൽ ഏർപ്പെട്ടിരുന്നു. 2028 മാർച്ച് വരെയാണ് ഈ കരാറിന്റെ കാലാവധി. കരാർ ലംഘനം ചൂണ്ടിക്കാട്ടി അഡിഡാസിന് പലതരം നടപടികൾ സ്വീകരിക്കാൻ സാധിക്കും.
- കരാർ റദ്ദാക്കാനുള്ള അവകാശം അഡിഡാസിനുണ്ട്.
- കരാറിലെ നിബന്ധനകൾ പാലിക്കാത്തതിന് ബിസിസിഐയിൽ നിന്ന് നഷ്ടപരിഹാരം ആവശ്യപ്പെടാം.
- ബിസിസിഐയോട് ഔദ്യോഗികമായി വിശദീകരണം തേടാം.
- ഒരു താക്കീത് നൽകി സ്പോൺസർഷിപ്പ് തുടരാനും സാധ്യതയുണ്ട്.
കരാറിന്റെ വിശദാംശങ്ങൾ
ബിസിസിഐ-അഡിഡാസ് പങ്കാളിത്തത്തിൽ സ്പോൺസർഷിപ്പ് ഫീസും, ഉൽപ്പന്നങ്ങളുടെ വിൽപ്പനയിൽ നിന്നുള്ള റോയൽറ്റിയും ഉൾപ്പെടുന്നു. ഒരു മത്സരത്തിന് 75 ലക്ഷം രൂപയാണ് അഡിഡാസ് ബിസിസിഐക്ക് നൽകുന്നത്.
മുൻ സ്പോൺസർമാരായിരുന്ന നൈക്കി ഒരു മത്സരത്തിന് 88 ലക്ഷം രൂപയായിരുന്നു നൽകിയിരുന്നത്. ഇതുകൂടാതെ, അഞ്ചുവർഷത്തെ കരാർ കാലയളവിൽ ഉൽപ്പന്നങ്ങളുടെ വിൽപ്പനയിൽ നിന്ന് വർഷം 10 കോടി രൂപ റോയൽറ്റിയായും ബിസിസിഐക്ക് ലഭിക്കും.
