ന്യൂഡൽഹി: ബജറ്റ് എയർലൈനായ സ്പൈസ്ജെറ്റും മുൻ പ്രൊമോട്ടറായ കലാനിധി മാരനും തമ്മിലുള്ള നിയമപോരാട്ടം പുതിയ തലത്തിലേക്ക്. 1,323 കോടി രൂപയുടെ നഷ്ടപരിഹാരം ആവശ്യപ്പെട്ടുള്ള ഹർജി ഡൽഹി ഹൈക്കോടതി തള്ളിയതിനെതിരെ, കലാനിധി മാരനും അദ്ദേഹത്തിന്റെ കമ്പനിയായ കാൽ എയർവേയ്‌സും സുപ്രീം കോടതിയെ സമീപിച്ചു. ഈ വാർത്ത പുറത്തുവന്നതിന് പിന്നാലെ സ്പൈസ്ജെറ്റിന്റെ ഓഹരി വിലയിൽ 1 ശതമാനത്തോളം ഇടിവുണ്ടായി.
മാരന്റെ ഹർജി ജൂലൈ 18-ന് പരിഗണിക്കാമെന്ന് സുപ്രീം കോടതി സമ്മതിച്ചു. നേരത്തെ, മാരന്റെ ആവശ്യം ആർബിട്രൽ ട്രിബ്യൂണലും പിന്നീട് ഡൽഹി ഹൈക്കോടതിയും തള്ളിയത് സ്പൈസ്ജെറ്റിന് വലിയ ആശ്വാസം നൽകിയിരുന്നു.
ഹൈക്കോടതിയുടെ രൂക്ഷ വിമർശനം
“ന്യായവിധി അനുകൂലമായാൽ മാത്രം സ്വീകരിക്കാം എന്ന രീതിയിലുള്ള ഒരു ചൂതാട്ടമാണ്” മാരന്റെ ഭാഗത്തുനിന്നുണ്ടായതെന്ന് 2024 മെയ് മാസത്തിലെ വിധിയിൽ ഡൽഹി ഹൈക്കോടതി രൂക്ഷമായി വിമർശിച്ചിരുന്നു. അപ്പീലുകൾ ഫയൽ ചെയ്യുന്നതിലുണ്ടായ കാലതാമസം, നടപടിക്രമങ്ങളിലെ വീഴ്ചകൾ, വസ്തുതകൾ മറച്ചുവെക്കൽ എന്നിവ ചൂണ്ടിക്കാട്ടിയാണ് ഹൈക്കോടതി മാരന്റെ ഹർജി തള്ളിയത്.
കേസിന്റെ നാൾവഴികൾ
2015 ഫെബ്രുവരിയിലാണ് കലാനിധി മാരനും കാൽ എയർവേയ്‌സും തങ്ങളുടെ 58.46% ഓഹരി പങ്കാളിത്തം സ്പൈസ്ജെറ്റിന്റെ ഇപ്പോഴത്തെ ചെയർമാനായ അജയ് സിംഗിന് കൈമാറുന്നത്. എന്നാൽ, കരാർ പ്രകാരം തനിക്ക് നൽകേണ്ടിയിരുന്ന 18 കോടി ഓഹരി വാറന്റുകൾ നൽകിയില്ലെന്ന് കാണിച്ച് 2017-ൽ മാരൻ ഡൽഹി ഹൈക്കോടതിയെ സമീപിച്ചു.
2018-ൽ, ആർബിട്രൽ ട്രിബ്യൂണൽ മാരന്റെ 1,323 കോടിയുടെ നഷ്ടപരിഹാര ആവശ്യം തള്ളുകയും, പകരം 579 കോടി രൂപയും പലിശയും തിരികെ നൽകാൻ വിധിക്കുകയും ചെയ്തു. ഇതിനെതിരെ ഇരുപക്ഷവും കോടതിയെ സമീപിക്കുകയായിരുന്നു.
വെള്ളിയാഴ്ച വ്യാപാരം പുരോഗമിക്കവേ, 39.56 രൂപ നിലവാരത്തിലായിരുന്നു ബിഎസ്ഇയിൽ സ്പൈസ്ജെറ്റ് ഓഹരികളുടെ വ്യാപാരം.
