മുംബൈ: അനിൽ അംബാനിയുടെ നേതൃത്വത്തിലുണ്ടായിരുന്ന റിലയൻസ് കമ്മ്യൂണിക്കേഷൻസിന്റെ (ആർകോം) വായ്പാ അക്കൗണ്ട് സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) തട്ടിപ്പായി പ്രഖ്യാപിച്ചു.
ഇതോടെ, അനിൽ അംബാനിയുടെ മറ്റ് കമ്പനികളായ റിലയൻസ് പവർ, റിലയൻസ് ഇൻഫ്രാസ്ട്രക്ചർ എന്നിവയുടെ ഓഹരികൾക്ക് വ്യാഴാഴ്ച വിപണിയിൽ വൻ ഇടിവുണ്ടായി. റിലയൻസ് ഇൻഫ്ര 5 ശതമാനം ഇടിഞ്ഞ് ലോവർ സർക്യൂട്ടിലെത്തിയപ്പോൾ, റിലയൻസ് പവറിന്റെ ഓഹരികൾക്ക് 4.8 ശതമാനം നഷ്ടമുണ്ടായി.
കമ്പനിയുടെ മുൻ ഡയറക്ടർ എന്ന നിലയിൽ അനിൽ അംബാനിയുടെ പേര് തട്ടിപ്പുമായി ബന്ധപ്പെട്ട് റിസർവ് ബാങ്കിന് (ആർബിഐ) റിപ്പോർട്ട് ചെയ്യുമെന്ന് എസ്ബിഐ അറിയിച്ചതായി ആർകോം വെളിപ്പെടുത്തി. നിലവിൽ പാപ്പരത്ത നടപടികൾ നേരിടുന്ന കമ്പനിക്ക് ഇത് മറ്റൊരു നിയമപരമായ തിരിച്ചടിയാണ്.
12,692 കോടിയുടെ തട്ടിപ്പ്
2020-ൽ നടത്തിയ ഒരു ഫോറൻസിക് ഓഡിറ്റിന്റെ അടിസ്ഥാനത്തിലാണ് എസ്ബിഐയുടെ പുതിയ നടപടി. ആകെ 31,580 കോടി രൂപയുടെ വായ്പയിൽ നിന്ന് 12,692 കോടി രൂപ, അതായത് 41 ശതമാനത്തോളം തുക, മറ്റ് താൽപര്യമുള്ള കക്ഷികളിലേക്ക് വകമാറ്റിയതായി ഓഡിറ്റിൽ കണ്ടെത്തിയിരുന്നു. അനുബന്ധ കമ്പനികൾ വഴി പണം കൈമാറിയും, കോർപ്പറേറ്റ് നിക്ഷേപങ്ങൾ വഴിയും ഇടപാടുകൾ മറച്ചുവെക്കാൻ ശ്രമിച്ചതായും റിപ്പോർട്ടിൽ പറയുന്നു.
നടപടി ഏകപക്ഷീയമെന്ന് അംബാനി
അതേസമയം, എസ്ബിഐയുടെ നടപടി ഏകപക്ഷീയവും സ്വാഭാവിക നീതിയുടെ ലംഘനവുമാണെന്ന് അനിൽ അംബാനിയുടെ നിയമസംഘം പ്രതികരിച്ചു. തനിക്ക് കമ്പനിയുടെ ദൈനംദിന പ്രവർത്തനങ്ങളിൽ ഒരു പങ്കുമില്ലായിരുന്നുവെന്നും, മറുപടി നൽകാൻ ആവശ്യമായ രേഖകൾ ബാങ്ക് നൽകിയില്ലെന്നും അവർ വാദിച്ചു. മറ്റ് ഡയറക്ടർമാർക്കെതിരായ സമാനമായ നോട്ടീസുകൾ പിൻവലിച്ചിട്ടും, അംബാനിയെ മാത്രം ലക്ഷ്യം വെക്കുന്നത് അന്യായമാണെന്നും, എസ്ബിഐയുടെ ഉത്തരവ് പിൻവലിക്കണമെന്നും അവർ ആവശ്യപ്പെട്ടു.
നേരത്തെ, കാനറാ ബാങ്കും ആർകോം വായ്പ തട്ടിപ്പായി പ്രഖ്യാപിച്ചിരുന്നെങ്കിലും, ആ ഉത്തരവ് ഡൽഹി ഹൈക്കോടതി റദ്ദാക്കിയിരുന്നു.
