ദുബായിൽ ‘മാളത്തോൺ’ പ്രഖ്യാപിച്ച് ഷെയ്ഖ് ഹംദാൻ

ദുബായ്: കനത്ത ചൂടിൽ വ്യായാമം മുടങ്ങിയവർക്ക് ആശ്വാസമായി പുതിയ ഫിറ്റ്നസ് സംരംഭത്തിന് ദുബായിൽ തുടക്കമായി. ദുബായ് കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പ്രഖ്യാപിച്ച ‘ദുബായ് മാളത്തോൺ’ (Dubai Mallathon) എന്ന പദ്ധതി, ഷോപ്പിംഗ് മാളുകളെ ഇൻഡോർ ഫിറ്റ്നസ് ട്രാക്കുകളാക്കി മാറ്റും. ഓഗസ്റ്റ് മാസം മുഴുവൻ, രാവിലെ 7 മണി മുതൽ 10 മണി വരെ ദുബായിലെ ഏഴ് പ്രമുഖ മാളുകളിൽ പൊതുജനങ്ങൾക്ക് സൗജന്യമായി നടക്കാനും ഓടാനും സൗകര്യമൊരുക്കും.

ദുബായ് സോഷ്യൽ അജണ്ട 33-ന്റെ ഭാഗമായുള്ള ഈ സംരംഭം, വേനൽക്കാലത്ത് സുരക്ഷിതവും ശീതീകരിച്ചതുമായ അന്തരീക്ഷത്തിൽ വ്യായാമം ചെയ്യാൻ ആളുകളെ പ്രോത്സാഹിപ്പിക്കാൻ ലക്ഷ്യമിടുന്നു.

‘മാളത്തോണിൽ’ പങ്കെടുക്കുന്ന മാളുകൾ

ദുബായ് മാൾ, ദുബായ് ഹിൽസ് മാൾ, സിറ്റി സെന്റർ ദെയ്റ, സിറ്റി സെന്റർ മിർദിഫ്, മാൾ ഓഫ് ദി എമിറേറ്റ്സ്, ദുബായ് മറീന മാൾ, ദി സ്പ്രിംഗ്സ് സൂക്ക് എന്നീ ഏഴ് പ്രധാന മാളുകളിലാണ് ഇതിനായി പ്രത്യേക ട്രാക്കുകൾ സജ്ജീകരിച്ചിരിക്കുന്നത്.

“ലളിതമായ ആശയം, ശക്തമായ ലക്ഷ്യം: ആരോഗ്യകരവും സജീവവുമായ ജീവിതശൈലി ദൈനംദിന ഇടങ്ങളിലേക്ക് കൊണ്ടുവരിക,” എന്ന് ഷെയ്ഖ് ഹംദാൻ എക്സിൽ കുറിച്ചു. “നിങ്ങൾ വെക്കുന്ന ഓരോ ചുവടും നമ്മളെ കൂടുതൽ ആരോഗ്യമുള്ള ഒരു ദുബായിലേക്ക് അടുപ്പിക്കുന്നു,” എന്നും അദ്ദേഹം കൂട്ടിച്ചേർത്തു.

എങ്ങനെ പങ്കെടുക്കാം?

‘ദുബായ് മാളത്തോണിൽ’ പങ്കെടുക്കാൻ യാതൊരു ഫീസുമില്ല. www.dubaimallathon.ae എന്ന ഔദ്യോഗിക വെബ്സൈറ്റ് വഴി രജിസ്റ്റർ ചെയ്യാം. രജിസ്റ്റർ ചെയ്യുന്നവർക്ക്, സംരംഭത്തിൽ പങ്കാളികളാണെന്ന് സ്ഥിരീകരിക്കുന്ന ഒരു ഡിജിറ്റൽ കാർഡ് ലഭിക്കും.

ഈ സംരംഭത്തിന്റെ ഭാഗമായി മാളുകളിലെ റെസ്റ്റോറന്റുകളും മറ്റ് വ്യാപാര സ്ഥാപനങ്ങളും പ്രത്യേക ഓഫറുകളും നൽകും. ഫിറ്റ്നസ് ട്രാക്കിംഗ് സംവിധാനങ്ങൾ, ആരോഗ്യ ബോധവൽക്കരണ സ്റ്റേഷനുകൾ, കുട്ടികൾക്കായി പ്രത്യേക സ്ഥലങ്ങൾ, ഗൈഡഡ് സ്ട്രെച്ചിംഗ് വ്യായാമങ്ങൾ എന്നിവയും മാളത്തോണിന്റെ ഭാഗമായി ഒരുക്കിയിട്ടുണ്ട്.

ദുബായ് റൺ, ദുബായ് ഫിറ്റ്നസ് ചലഞ്ച് തുടങ്ങിയ വിജയകരമായ ഫിറ്റ്നസ് സംരംഭങ്ങൾക്ക് പിന്നാലെയാണ് ഷെയ്ഖ് ഹംദാൻ പുതിയ ‘മാളത്തോൺ’ പ്രഖ്യാപിച്ചിരിക്കുന്നത്.