ലണ്ടൻ: യമനിലെ ഹൂതി വിമതരുടെ ആക്രമണം നിലച്ചെങ്കിലും, ലോകത്തിലെ ഏറ്റവും തിരക്കേറിയ കപ്പൽ പാതകളിലൊന്നായ ചെങ്കടലിലേക്ക് മടങ്ങിവരാൻ മടിച്ച് ഷിപ്പിംഗ് കമ്പനികൾ.
അടുത്തിടെ നടന്ന ഇറാൻ-ഇസ്രായേൽ സംഘർഷം മേഖലയിൽ വീണ്ടും അനിശ്ചിതത്വം സൃഷ്ടിച്ചതോടെ, പഴയതുപോലെ കപ്പൽ ഗതാഗതം പുനഃസ്ഥാപിക്കാൻ ഇനിയും ഒരു വർഷമെങ്കിലും എടുത്തേക്കുമെന്ന് ഷിപ്പിംഗ് രംഗത്തെ വിദഗ്ധർ പറയുന്നു.
അന്താരാഷ്ട്ര നാണയ നിധിയുടെ (IMF) പോർട്ട് വാച്ച് ഡാറ്റ അനുസരിച്ച്, 2023-ൽ പ്രതിദിനം ശരാശരി 73 കപ്പലുകൾ കടന്നുപോയിരുന്ന ചെങ്കടൽ വഴി, ഈ വർഷം സഞ്ചരിക്കുന്നത് വെറും 34 കപ്പലുകൾ മാത്രമാണ്.
പകുതിയിലധികം കുറവ്. 2023-ലും 2024-ലുമായി 176 കപ്പലുകൾക്ക് നേരെയാണ് ഹൂതികൾ ആക്രമണം നടത്തിയത്. എന്നാൽ, ഈ വർഷം ഇതുവരെ ഒരു ആക്രമണവും റിപ്പോർട്ട് ചെയ്തിട്ടില്ല. എന്നിട്ടും കപ്പലുകൾ മടങ്ങിവരുന്നില്ല.
പുതിയ യുദ്ധഭീതി: ഹൂതികൾ അടങ്ങിയെങ്കിലും, ഇറാനും ഇസ്രായേലും തമ്മിൽ നടന്ന യുദ്ധം മേഖല ഇപ്പോഴും സുരക്ഷിതമല്ലെന്ന സന്ദേശമാണ് ഷിപ്പിംഗ് കമ്പനികൾക്ക് നൽകുന്നത്. “ഈ മേഖല എപ്പോൾ വേണമെങ്കിലും വീണ്ടും കലുഷിതമാകാമെന്നും, ഇസ്രായേൽ പ്രധാനമന്ത്രിയുടെയോ, അമേരിക്കൻ പ്രസിഡന്റിന്റെയോ, ഇറാനിലെ ഏതെങ്കിലും നേതാവിന്റെയോ ഒരു നിമിഷത്തെ തീരുമാനത്തിൽ എല്ലാം മാറിമറിയാമെന്നും” റിസ്ക് ഇന്റലിജൻസിലെ സീനിയർ അനലിസ്റ്റായ ഡിർക്ക് സീബൽസ് പറയുന്നു.
പുതിയ വഴി, പുതിയ ‘ഷെഡ്യൂൾ’: ഹൂതി ആക്രമണത്തെ തുടർന്ന്, മിക്ക കമ്പനികളും ആഫ്രിക്കൻ വൻകര ചുറ്റിയുള്ള ദൈർഘ്യമേറിയ പാതയിലേക്ക് തങ്ങളുടെ സർവീസുകൾ മാറ്റിയിരുന്നു. ഇതൊരു വലിയ ലോജിസ്റ്റിക്കൽ പ്രക്രിയയായിരുന്നു. ഇനി വീണ്ടും പഴയ ചെങ്കടൽ-സൂയസ് കനാൽ പാതയിലേക്ക് മാറുന്നത് മറ്റൊരു വലിയ സാമ്പത്തിക, ലോജിസ്റ്റിക് തലവേദനയാണ്.
സാമ്പത്തികമായി നഷ്ടം: ചെങ്കടലിലെ ഇൻഷുറൻസ് പ്രീമിയവും, സൂയസ് കനാൽ കടക്കുന്നതിനുള്ള ഭീമമായ ഫീസും (ഒരു കപ്പലിന് പലപ്പോഴും 5 ലക്ഷം ഡോളറിലധികം) ഒഴിവാക്കി ആഫ്രിക്കൻ റൂട്ടിലൂടെ പോകുന്നതാണ് നിലവിൽ ലാഭകരമെന്ന് പല കമ്പനികളും കരുതുന്നു.
