ന്യൂഡൽഹി: ഇന്ത്യൻ ടെലികോം വിപണിയിൽ റിലയൻസ് ജിയോയുടെ ആധിപത്യം തുടരുന്നു. മേയ് മാസത്തിൽ 27 ലക്ഷം പുതിയ വരിക്കാരെ ചേർത്തുകൊണ്ട് ജിയോ ബഹുദൂരം മുന്നിലെത്തിയപ്പോൾ, പ്രധാന എതിരാളിയായ ഭാരതി എയർടെലിന് നേടാനായത് 3 ലക്ഷത്തിൽ താഴെ വരിക്കാരെ മാത്രം.
അതേസമയം, കടുത്ത സാമ്പത്തിക പ്രതിസന്ധിയിലുള്ള വോഡഫോൺ ഐഡിയയും (വി) പൊതുമേഖലാ സ്ഥാപനമായ ബിഎസ്എൻഎല്ലും വൻ തകർച്ച നേരിട്ടു. ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) വെള്ളിയാഴ്ച പുറത്തുവിട്ട കണക്കുകളിലാണ് ഈ വിവരങ്ങളുള്ളത്.
പുതിയ വരിക്കാർ: കണക്കുകൾ ഇങ്ങനെ
- റിലയൻസ് ജിയോ: 27 ലക്ഷം പുതിയ വരിക്കാരെ ചേർത്തു.
- ഭാരതി എയർടെൽ: 2.75 ലക്ഷം പുതിയ വരിക്കാരെ ചേർത്തു.
- വോഡഫോൺ ഐഡിയ: 2.74 ലക്ഷം വരിക്കാരെ നഷ്ടപ്പെട്ടു.
- ബിഎസ്എൻഎൽ: 13.5 ലക്ഷം വരിക്കാരെ നഷ്ടപ്പെട്ടു.
വിപണി വിഹിതവും ആകെ വരിക്കാരും
മേയ് അവസാനത്തെ കണക്കനുസരിച്ച്, ഇന്ത്യയിലെ മൊത്തം മൊബൈൽ വരിക്കാരുടെ എണ്ണം 116 കോടിയാണ്.
- ജിയോ: 47.5 കോടി വരിക്കാരുമായി 40.92% വിപണി വിഹിതത്തോടെ ഒന്നാം സ്ഥാനത്ത് തുടരുന്നു.
- എയർടെൽ: 39 കോടി വരിക്കാരുമായി (33.61%) രണ്ടാം സ്ഥാനത്താണ്.
- വോഡഫോൺ ഐഡിയ: 20.4 കോടി വരിക്കാരുമായി (17.61%) മൂന്നാം സ്ഥാനത്ത്.
- ബിഎസ്എൻഎൽ: 9 കോടി വരിക്കാരുമായി (7.82%) നാലാം സ്ഥാനത്ത്.
‘ആക്ടീവ്’ വരിക്കാർ ആർക്ക്?
നെറ്റ്‌വർക്കിൽ സജീവമായി ഉപയോഗിക്കുന്ന വരിക്കാരുടെ എണ്ണത്തിലും ജിയോയാണ് മുന്നിൽ (46.2 കോടി). എന്നാൽ, തങ്ങളുടെ മൊത്തം വരിക്കാരിൽ 99.13% പേരെയും സജീവമായി നിലനിർത്തുന്നത് എയർടെല്ലാണ്. വോഡഫോൺ ഐഡിയയുടെയും ബിഎസ്എൻഎല്ലിന്റെയും സജീവ വരിക്കാരുടെ എണ്ണത്തിൽ വലിയ ഇടിവുണ്ടായിട്ടുണ്ട്.
5ജി ഫിക്സഡ്-വയർലെസ് ആക്സസ് രംഗത്തും റിലയൻസ് ജിയോ തന്നെയാണ് മുന്നിൽ.
