ന്യൂ ഡൽഹി: അഹമ്മദാബാദ് വിമാന ദുരന്തത്തിന്റെ പശ്ചാത്തലത്തിൽ, സുരക്ഷാ പരിശോധനകൾ കർശനമാക്കുന്നതിന്റെ ഭാഗമായി എയർ ഇന്ത്യ നിരവധി വിദേശ സർവീസുകൾ താൽക്കാലികമായി നിർത്തിവെക്കുകയോ വെട്ടിക്കുറയ്ക്കുകയോ ചെയ്തു. ജൂലൈ 15 വരെയാണ് നിയന്ത്രണങ്ങൾ. ബോയിംഗ് 787, 777 വിമാനങ്ങൾ ഉപയോഗിച്ചുള്ള ദീർഘദൂര സർവീസുകളിലാണ് പ്രധാനമായും മാറ്റങ്ങൾ വരുത്തിയിരിക്കുന്നത്.
അപ്രതീക്ഷിതമായി യാത്രകൾ മുടങ്ങുന്നത് ഒഴിവാക്കാനും സർവീസുകൾ കൃത്യസമയം പാലിക്കുന്നുണ്ടെന്ന് ഉറപ്പാക്കാനുമാണ് ഈ നടപടിയെന്ന് എയർ ഇന്ത്യ അധികൃതർ അറിയിച്ചു. യാത്രക്കാർക്ക് ടിക്കറ്റ് തുക പൂർണ്ണമായി തിരികെ നൽകുകയോ അല്ലെങ്കിൽ അധിക തുക ഈടാക്കാതെ യാത്ര പുനഃക്രമീകരിക്കുകയോ ചെയ്യുമെന്ന് എയർ ഇന്ത്യ സിഇഒ ക്യാംബെൽ വിൽസൺ അറിയിച്ചു.
പൂർണ്ണമായി റദ്ദാക്കിയ സർവീസുകൾ (ജൂലൈ 15 വരെ)
- ഡൽഹി-നെയ്‌റോബി (ആഴ്ചയിൽ 4 സർവീസുകൾ)
- അമൃത്‌സർ-ലണ്ടൻ (ഗാറ്റ്‌വിക്ക്) (ആഴ്ചയിൽ 3 സർവീസുകൾ)
- ഗോവ (മോപ)-ലണ്ടൻ (ഗാറ്റ്‌വിക്ക്) (ആഴ്ചയിൽ 3 സർവീസുകൾ)
സർവീസുകൾ വെട്ടിക്കുറച്ച പ്രധാന റൂട്ടുകൾ (ജൂലൈ 15 വരെ)
- വടക്കേ അമേരിക്ക:
- ഡൽഹി-ടൊറന്റോ: ആഴ്ചയിൽ 13 സർവീസുകൾ 7 ആയി കുറച്ചു.
- ഡൽഹി-വാൻകൂവർ: 7 സർവീസുകൾ 5 ആയി കുറച്ചു.
- ഡൽഹി-സാൻ ഫ്രാൻസിസ്കോ: 10 സർവീസുകൾ 7 ആയി കുറച്ചു.
- ഡൽഹി-ഷിക്കാഗോ: 7 സർവീസുകൾ 3 ആയി കുറച്ചു.
- ഡൽഹി-വാഷിംഗ്ടൺ: 5 സർവീസുകൾ 3 ആയി കുറച്ചു.
- യൂറോപ്പ്:
- ഡൽഹി-ലണ്ടൻ (ഹീത്രൂ): 24 സർവീസുകൾ 22 ആയി കുറച്ചു.
- ബെംഗളൂരു-ലണ്ടൻ (ഹീത്രൂ): 7 സർവീസുകൾ 6 ആയി കുറച്ചു.
- ഡൽഹി-പാരീസ്: 14 സർവീസുകൾ 12 ആയി കുറച്ചു.
- ഡൽഹി-മിലാൻ: 7 സർവീസുകൾ 4 ആയി കുറച്ചു.
- ഓസ്‌ട്രേലിയ:
- ഡൽഹി-മെൽബൺ, ഡൽഹി-സിഡ്‌നി: 7 സർവീസുകൾ 5 ആയി കുറച്ചു.
ജൂൺ 12-ന് അഹമ്മദാബാദിൽ എയർ ഇന്ത്യ-171 വിമാനം തകർന്നുവീണ് 241 പേർ മരിച്ച സംഭവത്തെ തുടർന്നാണ് സുരക്ഷാ പരിശോധനകൾ കർശനമാക്കാൻ എയർ ഇന്ത്യ തീരുമാനിച്ചത്. പശ്ചിമേഷ്യയിലെ വ്യോമപാതകൾ അടച്ചതും ചില വിമാനത്താവളങ്ങളിലെ രാത്രികാല നിയന്ത്രണങ്ങളും സർവീസുകളെ ബാധിച്ചിട്ടുണ്ടെന്നും എയർ ഇന്ത്യ അറിയിച്ചു.
