കോഴിക്കോട്: നഗരത്തിലെ മലാപ്പറമ്പ് കേന്ദ്രീകരിച്ച് നടന്ന പെൺവാണിഭക്കേസിലെ മുഖ്യ സൂത്രധാരകരായ പോലീസുകാരെ അന്വേഷണസംഘം അറസ്റ്റ് ചെയ്തു. ദിവസങ്ങളായി ഒളിവിൽ കഴിഞ്ഞിരുന്ന പോലീസ് ഡ്രൈവർമാരായ ഷൈജിത്തിനെയും സനിത്തിനെയുമാണ് താമരശ്ശേരിയിലെ രഹസ്യ കേന്ദ്രത്തിൽ നിന്ന് നാടകീയമായി പിടികൂടിയത്. പ്രതികളെ പിടികൂടുന്നത് വൈകുന്നതിലും, ഇവർക്ക് മുൻകൂർ ജാമ്യം നേടാൻ അവസരം ഒരുക്കുകയാണെന്നും ആരോപിച്ച് വ്യാപകമായ പ്രതിഷേധം ഉയർന്നതിന് പിന്നാലെയാണ് അറസ്റ്റ്.
നേരത്തെ പിടിയിലായ നടത്തിപ്പുകാരി ബിന്ദുവിനെയും മറ്റ് മൂന്ന് സ്ത്രീകളെയും ഒരുമിച്ചിരുത്തി ചോദ്യം ചെയ്തപ്പോഴാണ് കേന്ദ്രത്തിന്റെ യഥാർത്ഥ നടത്തിപ്പുകാർ പോലീസുകാരാണെന്ന നിർണായക വിവരം പുറത്തുവന്നത്. പ്രതിദിനം അരലക്ഷം മുതൽ ഒരു ലക്ഷം രൂപ വരെ വരുമാനമുണ്ടായിരുന്ന റാക്കറ്റിൽ നിന്ന് വലിയൊരു വിഹിതം ഇവർ കൈപ്പറ്റിയിരുന്നതായും അന്വേഷണത്തിൽ വ്യക്തമായി.
അന്വേഷണം ഭൂമിയിടപാടുകളിലേക്കും
പെൺവാണിഭത്തിലൂടെ ലഭിച്ച പണം ഉപയോഗിച്ച് പ്രതികൾ നഗരത്തിലും പരിസരപ്രദേശങ്ങളിലും ഭൂമി വാങ്ങിക്കൂട്ടിയെന്ന വിവരവും പോലീസിന് ലഭിച്ചിട്ടുണ്ട്. വിദേശത്തുള്ള ഒരാളുമായി ചേർന്ന് നടത്തിയ ഭൂമിയിടപാടുകളെക്കുറിച്ചും, മലാപ്പറമ്പിൽ അടുത്തിടെ ലക്ഷങ്ങൾ മുടക്കി വാങ്ങിയ സ്ഥലത്തെക്കുറിച്ചും പോലീസ് രഹസ്യാന്വേഷണ വിഭാഗം അന്വേഷിക്കുന്നുണ്ട്.
ബന്ധം തുടങ്ങിയത് അഞ്ച് വർഷം മുൻപ്
അഞ്ച് വർഷം മുൻപ് മെഡിക്കൽ കോളേജ് പോലീസ് സ്റ്റേഷനിലെ ഡ്രൈവറായിരുന്ന സമയത്താണ് പ്രതികളിലൊരാൾ മറ്റൊരു കേസുമായി ബന്ധപ്പെട്ട് ബിന്ദുവിനെ പരിചയപ്പെടുന്നത്. പിന്നീട് ഈ ബന്ധം ഉപയോഗിച്ച് അനാശാസ്യ കേന്ദ്രം തുടങ്ങുകയായിരുന്നു. ഒരു മാസം മുൻപ് തന്നെ പോലീസുകാരുടെ ഇടപാടുകളെക്കുറിച്ച് രഹസ്യാന്വേഷണ വിഭാഗം റിപ്പോർട്ട് നൽകിയിരുന്നു. ഇതിന്റെ അടിസ്ഥാനത്തിൽ നടക്കാവ് ഇൻസ്പെക്ടറുടെ നേതൃത്വത്തിലുള്ള സംഘം കർശനമായ നിരീക്ഷണം നടത്തിവരികയായിരുന്നു.
