തിരുവനന്തപുരം: കേരള പത്രപ്രവർത്തക യൂണിയന്റെ (KUWJ) ആസ്ഥാനമായ തിരുവനന്തപുരം കേസരി സ്മാരക ട്രസ്റ്റിൽ നടന്ന ഗുരുതരമായ സാമ്പത്തിക ക്രമക്കേടുകളെക്കുറിച്ച് അന്വേഷിക്കാൻ യൂണിയൻ സംസ്ഥാന കമ്മിറ്റി തീരുമാനിച്ചു. പാലക്കാട്ട് ചേർന്ന സംസ്ഥാന കമ്മിറ്റി യോഗത്തിലാണ് അന്വേഷണത്തിനായി മൂന്നംഗ ഓഡിറ്റ് കമ്മിറ്റിയെ നിയോഗിച്ചത്.
പ്രധാന ആരോപണങ്ങൾ
ഡിജിറ്റൽ ലൈബ്രറി സ്ഥാപിക്കുന്നതിനായി ലഭിച്ച 30 ലക്ഷം രൂപയുടെ സർക്കാർ ഫണ്ട് തിരിമറി നടത്തിയെന്നതാണ് പ്രധാന ആരോപണം. ഇത് സംബന്ധിച്ച് ഐപിആർഡിയും ധനവകുപ്പും നൽകിയ നോട്ടീസുകൾക്ക് ട്രസ്റ്റിന്റെ ചുമതലയുള്ള കെയുഡബ്ലിയുജെ തിരുവനന്തപുരം ജില്ലാ കമ്മിറ്റിക്ക് കൃത്യമായ മറുപടി നൽകാനായിട്ടില്ല. കഴിഞ്ഞ രണ്ട് വർഷമായി ഓഡിറ്റ് ചെയ്യാത്ത കണക്കുകളാണ് ജില്ലാ കമ്മിറ്റി പൊതുയോഗങ്ങളിൽ അവതരിപ്പിച്ചതെന്നും സംസ്ഥാന കമ്മിറ്റി കണ്ടെത്തി.
കെട്ടിട വാടകയിനത്തിൽ മാസം ലക്ഷങ്ങൾ വരുമാനമുണ്ടായിട്ടും ട്രസ്റ്റിന് 50 ലക്ഷം രൂപയുടെ കടബാധ്യതയുണ്ടെന്ന കണക്കുകളും സംശയമുയർത്തുന്നു. വെള്ളക്കരം അടയ്ക്കാത്തതിന് ട്രസ്റ്റിന് ജപ്തി നോട്ടീസ് ലഭിച്ചിരുന്നു. ആദായ നികുതി, പി.എഫ് വകുപ്പുകളിൽ നിന്നുള്ള നോട്ടീസുകൾക്കും ട്രസ്റ്റ് മറുപടി നൽകിയിട്ടില്ല.
ആരോപണ വിധേയർ
ദേശാഭിമാനിയിലെ സുരേഷ് വെള്ളിമംഗലം പ്രസിഡന്റും ന്യൂസ് 18-ലെ കിരൺ ബാബു സെക്രട്ടറിയുമായിരുന്ന കാലത്താണ് സർക്കാർ ഫണ്ട് തിരിമറി ഉൾപ്പെടെയുള്ള ക്രമക്കേടുകൾ നടന്നതെന്നാണ് ആരോപണം. ഇവർക്ക് ശേഷം വന്ന മനോരമയിലെ ഷില്ലർ സ്റ്റീഫൻ, കൈരളിയിലെ അനുപമ നായർ എന്നിവർ ഭാരവാഹികളായ സമിതി, ഈ ക്രമക്കേടുകൾ ഒളിപ്പിച്ചുവെക്കാൻ ശ്രമിച്ചതായും ആക്ഷേപമുണ്ട്.
അന്വേഷണ സമിതി
ഗുരുതരമായ ഈ ആരോപണങ്ങളുടെ പശ്ചാത്തലത്തിലാണ് സംസ്ഥാന കമ്മിറ്റിയുടെ നേരിട്ടുള്ള ഇടപെടൽ. മാതൃഭൂമിയിലെ റജി ആർ നായർ കൺവീനറായ മൂന്നംഗ ഓഡിറ്റ് കമ്മിറ്റിക്കാണ് അന്വേഷണ ചുമതല.
