മുംബൈ: രാജ്യത്തെ ഏറ്റവും വലിയ വിമാനക്കമ്പനിയായ ഇൻഡിഗോയുടെ മാതൃ കമ്പനിയായ ഇന്റർഗ്ലോബ് എന്റർപ്രൈസസ്, കമ്പനിയിലുള്ള തങ്ങളുടെ ഓഹരിയുടെ നാല് ശതമാനം വരെ ബ്ലോക്ക് ഡീലുകളിലൂടെ വിൽക്കാൻ ഒരുങ്ങുന്നതായി റിപ്പോർട്ട്. ഏകദേശം 1 ബില്യൺ ഡോളർ (ഏകദേശം 8,600 കോടി രൂപ) സമാഹരിക്കുകയാണ് ഇതിലൂടെ ലക്ഷ്യമിടുന്നത്.
ഇൻഡിഗോ സഹസ്ഥാപകൻ രാഹുൽ ഭാട്ടിയയാകും ഓഹരികൾ വിൽക്കുകയെന്നാണ് സൂചന. ഒരു വർഷത്തിനിടെ ഇത് രണ്ടാം തവണയാണ് ഭാട്ടിയ ഓഹരികൾ വിൽക്കാനൊരുങ്ങുന്നത്. മറ്റൊരു സഹസ്ഥാപകനായ രാകേഷ് ഗംഗ്‌വാൾ കമ്പനിയിൽ നിന്ന് പടിപടിയായി പുറത്തുപോകുമെന്ന് 2022-ൽ പ്രഖ്യാപിച്ചതിന് ശേഷം, തന്റെ ഓഹരി പങ്കാളിത്തം വലിയ തോതിൽ കുറച്ചിരുന്നു. ഇതിന് പിന്നാലെയാണ് ഭാട്ടിയയുടെ നീക്കം.
2025 മാർച്ചിലെ കണക്കനുസരിച്ച്, ഇന്റർഗ്ലോബ് എന്റർപ്രൈസസിന് ഇൻഡിഗോയിൽ 35.71 ശതമാനം ഓഹരി പങ്കാളിത്തമാണുള്ളത്. രാകേഷ് ഗംഗ്‌വാളിനും ബന്ധപ്പെട്ട സ്ഥാപനങ്ങൾക്കുമായി 13.53 ശതമാനം ഓഹരികളുമുണ്ട്.
ഓഹരി വിപണിയിൽ ഇടിവ്
ഈ വാർത്തകൾ പുറത്തുവന്നതിന് പിന്നാലെ, ജൂൺ 13-ന് ഇൻഡിഗോയുടെ ഓഹരി വില നാല് ശതമാനത്തിലധികം ഇടിഞ്ഞ് 5,224 രൂപയിലെത്തി. അഹമ്മദാബാദിലെ എയർ ഇന്ത്യ വിമാന ദുരന്തവും വർദ്ധിച്ചുവരുന്ന എണ്ണവിലയും വ്യോമയാന മേഖലയിലെ ഓഹരികളെ പ്രതികൂലമായി ബാധിച്ചിട്ടുണ്ട്. എന്നാൽ ഈ ഇടിവുണ്ടായിട്ടും, 2025-ൽ ഇതുവരെ ഇൻഡിഗോ ഓഹരികൾ 14 ശതമാനത്തിലധികം നേട്ടമുണ്ടാക്കിയിട്ടുണ്ട്.
മികച്ച സാമ്പത്തിക പ്രകടനമാണ് കമ്പനി അടുത്തിടെ കാഴ്ചവെച്ചത്. 2025 സാമ്പത്തിക വർഷത്തിലെ നാലാം പാദത്തിൽ ഇൻഡിഗോയുടെ അറ്റാദായം 62 ശതമാനം വർധിച്ച് 3,068 കോടി രൂപയിലെത്തിയിരുന്നു.
